¹ Vhavho Jeso arivho kala yuna teremuka tsini kula murimani, lukwili lwa Atu lwamutuwa. ² Lola, mwenye mahana mumwenga wakudza kwakwe na kusujudu mbere za za kwakwe, achiamba, "Bwana, ichikala unahenza, unaweza ukanihenda nikakala musafi."

³ Jeso achiugolosa ikono wa kwakwe na achimugusa, achiamba, "nina henza. Kala musafi." Vhavho achitakaswa mahana ga kwakwe. ⁴ Jeso achimwambira," lola vyakukala usimwambire mutu yoyosi. Gwira njira ya kwako, kadzionyese mwenye kwa kuhani, na ulavye zawadi iriyo Musa waamurisha, kwa ajili ya ushuhuda wa kwao."

⁵ Arivho kala Jeso yunainjira Kapernaumu, jemedari mumwenga achidza kwakwe, achimuuza ⁶ na achimwamba, ", Bwana mutumwa wa kwangu yurere nyumbani wavholoza na yuna maumivu ga kuondosa."

⁷ Jeso achimwamba, "nindakudza na nimuvhoze."

⁸ Yuyahu Jemedari achimujibu na achimwamba, "Bwana, mimi sifaha ta udze uinjire tsini ya dari ya kwangu. Nena neno tu hacheye na mutumishi wa kwangu yundavhola. ⁹ Kwa kukala mimi nami ni mutu niriye na mamulaka, na ninao sikari ario tsini ya kwangu. Nichiamba kwa mumwenga, 'enenda', na yunaenenda, na kwa munjine, 'inzo, 'na yunaddza, na kwa mutumwa wa kwangu,' henda vino na yundahenda vivyo."

¹⁰ Arivhokala Jeso yudzigasikira gaga, waangalala na achiambira arahu ariokala ana mutuwa, "ninamwambiriza ujeri vyakukala sidzangwe kupata kuona mutu mwenye imani ngadza iye kahiza Izraeli. ¹¹ Ninamwambiriza mwimwi, anji andakudza kula momborero na mtswerero wa dzuwa, andasagala kahiza meza vhamwenga na Aburahamu, Isaka, na Jakobo, kahiza ufalume mulunguni. ¹² Ela ahoho a ufalume andatsuvhiwa konze dzizani, ambako kunachiriro kusaga meno." ¹³ Jesu achmwamba yuyahu jemedari, "enenda! Kadzahere udzivyo amini, navihendeke vivyo kwako." Na kahiza saa iyo iyo Mutumwa achivhozwa.

¹⁴ Vhavho Jeso arivhofika kahiza nyumba ya petero wamuona mutsedza wa Petero yurere na here ni mukongo wa homa. ¹⁵ Jeso achimukusa mukono wa kwakwe, na homa ya kwakwe ichimuricha. Chisha achilamula na achianza kumuhumikira.

¹⁶ Na rivho fika dziloni, Atu achimurehera Jeso anji ariotawalwa ni pepo. Achiazola pepo kwa neno na ariokala ni akongo achiavhoza. ¹⁷ Kahiza hali ii gatimira garahu garigokala gagombwa ni Isaya nabii, achiamba, "Iye mwenye wahala makongo ga kwehu na achitsukula, manyonge ga kwehu."

¹⁸ Chisha Jeso arivhoona lulo lukwili ludzimuzunguluka, walavya malagizo ga kwenda nyambu ya bahari ya Galilaya. ¹⁹ Chisha mwandishi mumwenga achidza kwakwe achimwambira, "mwalimu nindakutuwa vhovhosi undivhoenenda."

²⁰ Jeso achimwambira, "mbweha ana mina, na tsongo a angani ana nyumba zao, Ela mwana wa Adamu kana vhakwika chitswache."

²¹ Mwanafunzi munjine achimwambira, "Bwana, niruhusu nende nikamuzike baba kwanza."

²² Ela Jeso achimwambira nituwa, na ariche o akufa azike Atu ao a kufa."

²³ Jeso arivhoinjira kwenye dau, anafunzi a kwakwe achimutuwa dauni. ²⁴ Lola, vhachiunuka imbi bomu dzulu ya bahari, chasi cha kukala dau richibiningizwa ni maimbi. Ela Jeso achikala yurere. ²⁵ Anafunzi a kwakwe amukudzira na achimulamusa, achimwamba, "Bwana huokole siswi, huvhevhi hufe!"

²⁶ Jeso achiambira," kwadze munaogovha mwino enye imani tite?" ndivho arivho uka na achichemera pyeho na bahari. Chisha kuchikala na kuhurira muno. ²⁷ Anafunzi achiangalala na achiambira, "ni Mutu wachidzedze yuno, vya kukala hata pyeho na bahari vina mutii iye?"

²⁸ Jeso arivho kudza nyambu injine na tsi injine ya Amagadara, ana lume airi ariotawalwa ni pepo akutana naye. Ariokala anaomborera mbirani na here anabudzya muno, chasi cha kukala kakuna musafiri andiye weza kuchirira njira iyo. ²⁹ Lola, apiga lonzo na achiamba," huna utu wani wa kuuhenda kwako, Mwana wa Mulungu? Ukudza vhavha kuhutesa kabila ya tsiku kazidzafika?" ³⁰ Hikara kundi bomu ra nguluwe here rinarisa, here si kure na arivho kala, ³¹ pepo aenderera kumubembereza Jeso na achimwamba," ichikala unda huchemere huombole, huvhirike kahiza kundi rirahu ra nguluwe."

³² Jeso achiambira, "enendani! 'Pepo achiaombola na achiainjira arahu nguluwe, na lola, kundi rosini richitetremka kula murimani na richiferera madzini. ³³ Ario kala ana risa nguluwe achichimbira. Na arivho enenda mudzini achieleza chila chitu chirichohendeka kwa arahu Analume ario kala na mapepo. ³⁴ Lola, mudzi muzima wakudza umuone Jeso. Arivho mona amubembereza auke kahiza lalo ra kwao.