¹ Jeso achiinjira dauni, achivuka, na achifika kahiza mudzi ariokala yunaishi. ² Lola, achimurehera mutu ariyevholoza yudzilazwa godoroni. Arivhoiona imani ya kwao, Jeso achimwamba iye mutu ariyevholoza," mwanangu, ukale na furaha, dambi za kwako zidzisamehewa."

³ Lola, baadhi ya alimu a sheria anena ao kwa ao, "yuyu mutu yuna kufuru" ⁴ Jeso achimanya maazo ga kwao na achiamba," kwa utuwani munaaza mai mioyoni mwenu? ⁵ Ni chivhicho chiricho rahisi, kwamba, 'dambi za kwako zidzisamehewa; hebu kwamba, 'ima na uenende'? ⁶ Ela mumanye vyakukala mwana wa mwanadamu yunao uwezo wa kusamehe dambi, "Wanena gaga kwa iye ariye vholoza, "unuka, hala godoro ra kwako, na uenende nyumbani kwako." ⁷ Ndivho yuyahu Mutu arivho ima na achienenda kwakwe nyumbani. ⁸ Lukwili lurivho gaona gago lwaangalala na luchimulika Mulungu, ariye yudziapatira Atu uwezo uo.

⁹ Na Jeso arivhokala yunachirira na vhavho wamuona mutu aihiwaye Matayo, ariye kala yusegere vhatu vha atozao kodi. Achmwamba, "nituwa." Achiima na achimutuwa. ¹⁰ Na Jeso arivho sagala mumo nyumbani ili arye chakurya, lola, atoza kodi anji akudza na enye dambi na achirya chakurya vhamwenga na Jeso na anafunzi a kwakwe.

¹¹ Mafarisayo arivho ona mautu gago, achiamba Anafunzi a kwawkwe," kwadze mwalimu wenu yunarya chakurya na atoza kodi na Atu enye dambi?"

¹² Jeso arivhosikira mautu gago, naye achiamba, "Atu ario ni azima kahitaji muganga, isivhokala arahu ario ni akongo tu. ¹³ Munafaha muenende mukadzifundishe maana ya kwakwe; 'ninahenza mbazi na wala si sadaka.' Kwa kukala sidzire kwa enye haki atubu, ela kwa enye dambi."

¹⁴ Ndivho anafunzi Anafunzi a Johana arivho mukudzira na achimwamba, "kwa utuwani sino na mafarisayo hunafunga, ela kwadze Anafunzi a kwako kafunga" ¹⁵ Jeso achiambira, "je aimirizi anaweza kukala na huzuni muda Bwana harusi yukere vhamwenga nao? Ela tsiku zinadza andivho kala bwana harusi yundauswa kula kwao, vhavho ndivho andivho funga.

¹⁶ Kakuna mutu afumaye chira chiraka chivya kahiza demu ra nguo ra kapindi, kwa kukala cho chiraka chindatarura ro demu ra nguo, na kuahuka kwa kwakwe kunda kala kubomu. ¹⁷ Hebu kakuna Atu abumao uchi mupvya kahiza chiya cha uchi cha kapindi. Achibuma, cho chiya chinaahuka, uchi undatsamuka, na cho chiya chinda banangika. Badala vivyo, anabuma uchi muvhya kahiza chiya chivhya, na vyosini kavinda banangika."

¹⁸ Arivho Jeso yunaambira mautu gago, lalo, mubomu mumwenga wakudza achimupigira mavindi. Achimwamba, "mwanangu wa chiche yedzefa hikara, ela inzo ikamwikire mukono naye yunda fufuka." ¹⁹ Ndivho Jeso Jeso achiima na achimutuwa, na Anafunzi a kwakwe pia. ²⁰ Lola, mwanamuche ariye kala yuna muruwo kwa miaka murongo mumwenga na miri wakudza vhevhi na achigusa mutsa wa nguo ya kwakwe.

²¹ Kwa kukala wa aza moyoni mwakwe, "ichikala tu ndagusa nguo ya kwakwe nindavhola."

²² Ela Jeso achigalika na arivho mona achikwamba, "mwanangu, dzivhe moyo, imaniyo idzikuvhoza." Na muda uo uo mwanamuche achivhola.

²³ Vhavho Jeso arivhofika kahiza nyumba iye mubomu, waona mupigaji chivoti na lukwili were lunapiga lonzo. ²⁴ Achiamba, "vhaukeni vhano, kwa kukala musichana kadzafa, ta yurere." Ela achimutseka na kumuvhurya. ²⁵ Vho lukwili lurivho ombozwa konze, achiinjira chumbani na achimugwira mukono wa kwakwe, na musichana achiunuka. ²⁶ Zo habari zizo zichitsalarira eneo rosini.

²⁷ Vho Jeso arivho chirira, alume airi vipofu achimutuwa. Achienderera kuomboza sauti za kwao na achamba, "hunavoya uhonere mbazi mwana wa Daudi." ²⁸ Vho Jeso arivho kudza mumo nyumbani, ao alume ario vipofu amukudzira, Jeso achiamba, "je munaamini vya kukala kuhenda vino? Achiamba, "ndiyo Bwana."

²⁹ Ndivho Jeso achiaguta matso ga kwao na achiamba, "navihendeke vivyo kwenu ngadza imani yenu irivyo," ³⁰ na matso gao gachifuguka. Ndo Jeso achiadinisira achialagiza Ao na achiamba, "lolani mutu yoyosi asimanye kuhusu utu uu." ³¹ Ela o Atu airi achiuka na achitangaza utu uo kahiza eneo rosini.

³² Vhavho arahu analume airi arivhokala anenenda, lolani, mutu mumwenga bubu ariyegolomokwa ni pepo achirehewa kwa Jeso. ³³ Vhavho arivhoombozwa, yuyahu mutu bubu acianza kunena. Lukwili luchiangalala na achiamba, "mautu ngadza gaga kagadza hendeka Israeli."

³⁴ Ela mafarisayo achiamba, "kwa utawala wa pepo, yunaomboza pepo."

³⁵ Jeso achenda kahiza midzi yosini na vidzidzi. Naye achienderera kufundisha kahiza masinagogi, achihubiri injiki ya ufalume na kuvhoza manyonge ga chila aina makongo. ³⁶ Vhavho arivho luona lo lukwili, achiaonera mbazi, kwa kukala ayugika na kuvudzika myoyo. Were angadza here ni ng'onzi asiokala na murisa. ³⁷ Achiamba anafunzi akwakwe, "mavuno ni manji, ela ahenzi a kazi niachache. ³⁸ Kwa vivyo bee hiraka muvoyeni Bwana wa mavuno, ili kukala ahume ahenzi a kazi kahiza mavuno."