¹ Irivhofika chiramuko, abomu a makuhani osini na vilongozi a-atu apanga njama chinyume cha Jeso aweze kumu-ulaga. ² Amufunga, achimulongoza, na achimulvya kwa pilato mutawali.

³ Chisha vhavho Juda, ariyekala yudzimuguza, arivho-ona vyakukala Jeso yudzihukumiwa, wadziuta na achiudzya vipande mirongo mihahu vya pesa kwa vilongozi abomu achidini na atuminya. ⁴ Na achi-amba, "nidzihenda dambi kwa ku-uguza mulatso usiokala na makosa." Ela ao achi-jibu, "vinahuhusuni utu wani sino? Galole uwe." ⁵ Chisha achivitsuvha vhotsi vihahu vipande vya pesa mumo hekaluni, na achivhauka, na achenda dziulaga.

⁶ Abomu a dini avihala virahu vipande vya pesa na achia-amba, "si tototo chishariya kuzi-ika pesa zizi kahiza hazina kwa kukala ni gharama ya mulatso," ⁷ achiri sumurira utu uo vhamwenga, na pesa iyo ichihumika kugurira munda wa mutu aumbaye nyungu ili azikire ajeni, ⁸ kwa riro munda uo uchi-ihiwa" munda wa mulatso" muhadi rero, ⁹ chisha rirahu neno ririro nenwa ni nabii Yeremia richitimira, vyakukala, "ahala vipande mirongo mihahu vya pesa, garama iriyo hendwa ni Atu a Izraeli kwa ajili ya kwakwe, ¹⁰ na achizihimira kwa kugula munda wa mutu aumbaye nyungu, ngadza-here Bwana arivyo nierekeza."

¹¹ Hikara Jeso arivho ima mbere za Liwali, na Liwali achi-muza, "je we ndiwe Mufalume wa Ayahudi?" Jeso achimujibu, "uwe ndiwe unenaye vivyo."

¹² Ela vhavho arivho shitakiwa ni abomu a dini na vilongozi, ka-ajibire chochosi.

¹³ Chisha Pilato achimwamba, "kudzangwe kugasikira gano mashitaka gosini garigo chinyume cha kwako?" ¹⁴ Ela kamujibire hata neno mwenga, vivyo Liwali achi-angalazika muno.

¹⁵ Hikara kahiza tsikukuu were ni kawaida ya Liwali kumufugula mufungwa mumwenga akale huru andiye tsagulwa ni lulo lukwili lwa Atu. ¹⁶ Vhavho were vhana mufungwa mumwenga sugu aihiwaye dzinare Barabaz.

¹⁷ Hikara arivhokudza vhamwenga, Pilato achi-auza, "ni yuvhiye mumuhenzaye humufugule kwa ajili yenu? Barabaz, hebu Jeso aihiwaye Krisito?" ¹⁸ Amanya vyakukala amugwira kwa sababu ya chuki.

¹⁹ Vhvho arivhokala yusegere kahiza chihi cha utawala, muchewe wahuma neno na achimwamba, "usihende utu wowosi kwa mutu iye asiye na kosa rorosi. Kwa kukala rero nidziteseka muno kahiza ndoso kwa sababu ya mutu iye."

²⁰ Ndivho vhavho Abomu a dini na vilongozi achi-aongola-ongola o lukwili lwa Atu amuvoye Baraba na Jeso aulagwe. ²¹ Liwali achi-auza, "ni yuvhiye kahiza ano airi mumuhenzaye mwino nimurichire?" Achi-amba, "Baraba."

²² Pilato achi-ambira, "nimuhenderedze Jeso aihiwaye Krisito?" osini achimujibu, "mu-ulage." ²³ Naye achi-amba, "nikosarani adziro rihenda?" apiga lonzo muno, "na-aulagwe" ²⁴ vhavho arivho ona vya kukala kaweza kuhenda rorosi, kwa kukala ao atu were adzi-anza kuhenda fujo, wahala madzi, achi-oga mikono mbere za lulo lukwili, na achi-amba, "mimi sina kosa dzulu ya mulatso wa mutu yuyu ariye kana kosa. Lolani enyee."

²⁵ Atu osini achi-amba, "mulatso wa kwakwe na ukale dzulu yehu siswi, na ana ehu." ²⁶ Chisha achi-afugurira Baraba, achimupiga Jeso vikoto na achimulavya ili akasulubishwe.

²⁷ Chisha sikari a mutawali achimuhala Jeso muhadi pritoria kwa mutawali na kundi bomu ra masikari. ²⁸ Achimuvula nguo za kwakwe na achimuvisha kanzu ya rangi tune. ²⁹ Chisha acimutengezera chiremba cha miya na achimuvalisha chitswani, na achimwikira mwanzi kahiza mukono wa kwakwe wa kurya. Achimita mavindi mbereze na achimuvhurya, achi-amba, "salama Bwana, Mufalume wa Ayahudi!" ³⁰ Na achimutsuvhira mahe, na achihala mwanzi na achimupiga chitswani na achimupiga kahiri. ³¹ Arivho kala adzimuvhurya vyakutosha, amuvula irahu kanzu tune na achimuvisha nguo za kwakwe, na achimulongoza kwenda kumusulubisha.

³² Arivho-ombola konze, achimuona mutu wa kula krene dzinare nu Simoni, ariye mulazimisha kwenda vhamwenga naye ili amutsukurire Jeso musalaba. ³³ Arivho fika vhatu vhaihiwavho gologota, maana ya kwakwe "vhatu vha fuvu ra chitswa." ³⁴ Achimuvha siki ririro kala ridzitsanganywa na nyongo anwe. Ela arivho itata, kawezere kunwa. ³⁵ Arivho kala adzimusulubisha achigavya nguo za kwakwe kwa kupiga kura, ³⁶ na achi sagala na achimurinda. ³⁷ Dzulu ya chitswa cha kwakwe aika mashitaka ga ulongo, garigo andikwa, "Yuyu ni Jeso, Mufalume wa Ayahudi." ³⁸ Aivi airi achihukumiwa vhamwenga na iye, mumwenga mukono wa kurya na munjine mukono wa kumotso. ³⁹ Arahu ario kala anachira na vhavho amuzarahu, achi-tukusa tukusa vitswa vya kwao ⁴⁰ na achi-amba, "uwe uriye kala una-amba unahenza urivunze hekalu na urijenge kwa tsiku tahu, dzi-okole mwenye kwanza! Ichikala u mwana wa Mulungu, tserera vhotsi kula vhavho musalabani!"

⁴¹ Kahiza hali ngadza iyo abomu a makuhani amuhendera muzaha, vhamwenga na andishi na vilongozi, na achi-amba, ⁴² "waokola anjine, ela kaweza kudzi-okola mwenye. Iye ni Mufalume wa Ayahudi. Na-atserere vhotsi kula musalabani ndivho hundivho mwamini. ⁴³ Yunamukuluvhira Mulungu kwa vivyo richa iye Mulungu amuokole hikara, ichikala yunahenza, Kwa kukala wa-amba "Mimi ni mwana wa Mulungu." ⁴⁴ Na arahu aivi ariokala adzi-sulubiwa vhamwenga naye anenena maneno ga kumuvhurya.

⁴⁵ Hikara kula risaa ra tandahu kwa kala na dziza kahiza tsi yosini muhadi saa chenda. ⁴⁶ Irivho fika saa chenda, Jeso achirira kwa sauti bomu na achi-mba, Eloi, Eloi, lama sabaktani?" maana ya kwakwe, Mulungu wangu, Mulungu wangu, kwadze udziniricha?" ⁴⁷ Vhavho hivho kahiza ao ario-kala adzi-ima asikira, achi-amba, "Yuna mwiha Eliya." ⁴⁸ Hikara mumwenga wao achi-usa malo na achihala sifongo, achiudzaza siki ra utsungu, achirihunga mudatani, achi-mupa Jeso ili anwe.

⁴⁹ Na ao ario-sala achi-amba, "muricheni hacheye, richani hulole ichikala Eliya yundakudza amokole." ⁵⁰ Chisha Jeso achirira kavhiri kwa sauti bomu na achi-iomboza roho ya kwakwe. ⁵¹ Lola, paziya ya hekalu ichitaruka ichigavika viteme viri kula dzulu muhadi vhotsi, na tsi' ichitukuka, na mawe gachi-avuka avuka. ⁵² Mbira zichifuguka na miri ya Atu atakatifu ariokala afa ichifufuka. ⁵³ Na achi-ombola mbirani baada ya kufufuka kwa kwakwe, achi-injira mudzi mutakatifu na Atu anji achi-aona.

⁵⁴ Chisha shikari arahu ario-kala anamulorera Jeso achi-ona mutetemeko wa tsi' na mautu garigo kala ganahendeka, akala aoga muno na achi-amba, "ni yuyu ni Mwana wa Mulungu," ⁵⁵ Ana ache anji kula galilaya ario kala adzimutuwa Jeso ili kumuhumikira were a vhavho ana mulorera kwa kure. ⁵⁶ Kahiza ao were ni mariamu Magdalena, Mariamu ameye yakobo na Yusufu, na Ameye ana a Zebedayo.

⁵⁷ Irivhofika dziloni, kwa kudza mutu ariye kala ni tajiri kulaira Arimathia arye ihiwa Yusufu, ariye kala naye mwanafunzi wa Jeso. ⁵⁸ Achimwendera Pilato na achi-uvoya mwiri wa Jeso. Chisha pilato achilagiza auhewe o mwiri. ⁵⁹ Yusufu achi-uhala uo mwiri, achi-ufunga na sanza tana ya sufi, ⁶⁰ na achenda ulaza kahiza mbiraye mbivya ariyo kala waitsonga dziweni. Chisha achivhingilisa dziwe bomu achibiningiza muryango wa yo mbira na achi-enenda. ⁶¹ Mariamu Magdaleni na Mariamu yuyahu munjine were avhavho asegere, kanda kanda ya yo mbira.

⁶² Tsiku iriyo tuwizira, iriyo ni tsiku baada ya matayarisho, Abomu a makuhani na mafarisayo akutana vhamwenga kwa Pilato. ⁶³ Achi-mwmba, "Bwana unakumbukira vyakukala yuyahu mulongo arivhokala yu moyo wa amba, 'Baada ya tsiku tahu yundafufuka kavhiri.' ⁶⁴ Kwa vivyo lagiza vyakukala mbira irindwe tototo muhadi tsiku tahu, bila vivyo anafunzi a kwakwe anaweza kudza na akamwuiya na aambire atu vya kukala yudzifufuka kahiza ario-fa' na ulongo wa mwisho undalakala mui kuriko urahu wa kwanzo."

⁶⁵ Pilato achi-ambira, "halani arinzi. Enendani mukaike urinzi here muwezavyo." ⁶⁶ Kwa vivyo akwenda kuhenda urinzi mbirani, achipiga muhuri dziwe na achi-ika asikari.