¹ Muda uo Jeso arivho marigiza kunena maneno gago, achi-amba anafunzi a kwakwe, ² "muna manya vyakukala baada ya tsiku mbiri kundakala na tsiku kuu ya pasaka, na Mwana wa Adamu yundalaviwa asulubiwe."

³ Chidzamala abomu a makuhani na atuminya a ao atu asagala vhamwenga kahiza makalo ga kuhani mubomu, ariye kala yunaihiwa Kayafa. ⁴ Kwa chivimwenga apanga njama ya kumugwira na kumu-ulaga Jeso chisiri. ⁵ Kwa kukala a-amba vyakukala, "visihendeke tsiku ya tsiku kuu, kusudi kusidze kukahendeka fujo kwa oa atu."

⁶ Vhavho Jeso arivho kala Bethania kahiza nyumba ya Simoni ariye kala yuna mahana, ⁷ arivho kala yudzidzigolosa mezani, mwanamuche mumwenga wamukudzira achikala yudzitsukula mukopo wa alabasta wa mafuha garigo-kala niga bei ya gali, na achimumwagira chitswani mwakwe. ⁸ Ela anafunzi akwakwe arivho ona utu uo atsikirwa na achi-amba, "hasara ino ni kwa utu wani? ⁹ Gaga gangakuzwa chasi chibomu cha pesa na kuhewa achiya."

¹⁰ Ela kwakukala Jeso were yunarimanya riro, achi-amba oa, "Ni kwa utu wani yuno mwanamuche munamuyuga? Kwa kukala yudzinihendera chitu chidzo. ¹¹ Tsiku zosini achiya munao, ela mimi kamunda kala vhamwenga nami tsiku zosini. ¹² Kwa kukala arivho gakupula mafuha gaga dzulu ya mwiri wangu, wahenda vivyo kwa ajili ya zikwa ra kwangu. ¹³ Ujeri nina mwambira mwimwi, injili indivho hubiriwa kahiza urimwengu muzima, chihendo adzicho chihenda yuyu mwanamuche chindakala chihci nenwa kwa ajili ya kukumbukirwa iye."

¹⁴ Ndivho kahiza mumwenga wa aon kumi na airi ariye kala yuna-ihiwa Yuda Iskarioti, wakwenda kwa abomu a makuhani ¹⁵ na achi-amba, "munda nipatira utu wani nichimusaliti kwenu? Achimupimira Yuda visiku mirongo mihahu vya pesa. ¹⁶ Kula hangu vhavho achiyeya nafasi ya kumusaliti.

¹⁷ Hata tsiku ya kwanza ya mikkahe yosobumwa hamira anafunzie amwendera Jeso na kumwamba, "Ni lavhi unahenza hukakuandarire urye chakurya cha pasaka?"

¹⁸ Achi-amba, "enendani mudzini kwa mutu fulani na mumwambe, 'Mwalimu yuna-amba, "muda wangu udzitimira. Ninda ihenda pasaka vhamwenga na anafunzi akwangu kahiza nyumbayo." ¹⁹ Anafunziachihenda n gadzahere Jeso adzivyo-alagiza, na achi-andaa chakurya cha pasaka.

²⁰ Irivhofika dziloni, Wasagala kurya chakurya vhamwenga na arahu anafunzi kumi na airi. ²¹ Arivho kala anarya chakurya, achi- amba, "Nina mwambira ujeri vyakukala mumwenga wenu yundanisaliti."

²² Ashononeka muno, na chila mumwenga achi-anza kumuza," ela si mimi jeri, bwana?"

²³ Achi-ajibu, "Yuyahu andiye buma mukonowe vhamwenga na mimi kahiza bakuli ndiye andiye nisaliti. ²⁴ Mwana wa Adamu yundauka here irivyo andikwa. Ela yundamanya mwenye Mutu iye andiye musaliti Mwana wa Adamu! Ni baha kala Mutu iye kavyarirwe." ²⁵ Judas, ariye anga musaliti achi-amba, je ni mimi mwalimu?" Jeso achimwamba, "udzivinena mwenye uwe."

²⁶ Arivho kala anarya chakurya, Jeso achihala mukahe, achi-shukuru, na achiumegula. Achiapa anafunzie na achi-amba, "halani, murye. Uu ni mwiri wangu." ²⁷ Achihala chikombe na achishukuru, na achi-avha na achi-amba, "Inuani mosini kula kwa kahiza chikombe chichi. ²⁸ Kwa kukala uu ni mulatso wa lagano rangu, umwagwao kwa ajili ya anji kwa musamaha wa dambi. ²⁹ Ela nina mwambira mwimwi, sindanwa kahiri matunda ga muzabibu uu, muhadi tsiku irahu nindivho nwa pya vhamwenga namwi kahiza ufalume wa baba."

³⁰ Arivhokala amarigiza kwimba wira, aombola achienenda kahiza murima wa mizeituni.

³¹ Chisha Jeso achi-amba, "usiku uu mwimwi mosini mundadzikwala kwa ajili yangu, kwa kukala idzi-andikwa, 'nindamupiga murisa na kundi ra ng'onzi rindatsamuka.' ³² Ela baada ya kufufuka kwangu, nindamutangulia kwenenda Galilaya."

³³ Ela Petero achimwamba, "hata ichikala osini andakukahala kwa mautu gandigokupata, mimi sindakukahal."

³⁴ Jeso achimujibu, "Ninakwambira ujeri, usiku uu kabla jogolo karidzangwe kwihika undanikahala mara tahu."

³⁵ Petero achimwamba, hata kala ni kufa na uwe sindakukahala, "Na anafunzi anjine osini achinena ngadza vivyo.

³⁶ Baadaye Jeso achi-enenda vhatu vhaihiwavho Gathesemane na achiamba anafunzie. "Kalani vhavha mino ninenenda kurahu nikavoye." ³⁷ Achimuhala Petero na ana airi a Zebedayo na achi-anza kuyugika na kushononeka. ³⁸ Chisha achia-amba "Roho yangu ina- shononeka muno, chasi cha kufa. Salani vhavha na muchese vhamwenga nami." ³⁹ Wasengera mbere chasi, achidzilaza chinabunabu, na achivoya. Achi-amba, "Baba, ichikala vindaidimikika, chikombe chichi chiniukire. Ela, visikale here nihenzavyo mimi, ela uhenzavyo uwe. ⁴⁰ Achi-aendera anafunzie na achi-aona arere usinizi, na achimwamba Petero, "Kwa utuwani, kamukaweza kuchesa nami kwa risaa rimwenha? ⁴¹ Chesani na kuvoya ili musi-injireni majezoni. Roho inahenza, ela mwiri nimunyonge."

⁴² Achi-enenda mara ya vhiri kuvoya. Achi-amba, "Baba, ichikala utu uu kawidimikika kutsa ni pata muhadi nichinwerere chikombe chichi, mahenzo ga kwako nagatimire.

⁴³ Achi-uya kavhiri na achi-aona ausinzizini arere, kwa kukala matso gao were ni maziho. ⁴⁴ Chisha achi-aricha kavhiri, achienenda, achivoya lwa hahu, achinena maneno gagogago. ⁴⁵ Chidzamala Jeso achi-aendera anafunzie na achi-amba, "muchere murere na kudzioyeza? Lolani saa idzitimira na Mwana wa Adamu yuna-salitiwa mikononi mwa enye dambi. ⁴⁶ Lamukani, huvhaukeni. Lola, yuyahu anisalitiye yufika vhevhi."

⁴⁷ Vhavho vhokala yuchere nena, Judas, mumwenga wa arahu murongo mumwenga na airi, achidza. Lukwili lwa atu lwakudza vhamwenga na iye kula kwa abomu a makuhani na atuminya a-atu. Akudza na miundu na marungu. ⁴⁸ Chisha mutu ariye kala musaliti wa Jeso achia-aonyesa ishara, achi-amba, "yuyahu ariye ninda-mupa busu iye ndeye. Mugwireni." ⁴⁹ Vhavho arivho kudza tu achidza kwa Jeso na achi-amba, "achimulamusa, Mwalimu" na achimubusu.

⁵⁰ Jeso achimwamba, "musena, rihende riro ridziro kureha." Ndivho arivho kudza, achimugolosera mikono Jeso, na achimugwira. ⁵¹ Lola, mumwenga wa arahu ario kala vhamwenga na Jeso wagolosa mukonowe achi-omboza mundu, na achimukata sikiro muhumiki wa kuhani mubomu. ⁵² Ndivho Jeso arivho mwambira," udzya munduo vhatu udzivho uomboza, kwa kukala osini ahumirao mundu anda-angamizwa kwa uo mundu. ⁵³ Kwani munaona vyakukala siweza kumuiha Baba naye akanihumira zaidi ya makundi murongo mumwenga na mairi ga malaika? ⁵⁴ Ela ni chidzedzedze maandiko gangatimizwa, vivi ndivyo vifahavyo kuhendeka"?

⁵⁵ Vhavho ndivho arivho nena na lukwili lwa Atu, "je mudzikudza na miundu na marungu munigwire ngadza here ni mwivi? Chila tsiku nasagala hekaluni nichifundisha, na kamunigwirire. ⁵⁶ Ela gaga gosini gadzihendeka ili maandiko ga manabii gatimire." Ndivho anafunzi a kwakwe achimuricha na achichimbira.

⁵⁷ Arahu ario mugwira Jeso amuvhirika kwa Kayafa kuhani mubomu vhatu vharivho A-andishi na Atuminya were adzikutana vhamwenga. ⁵⁸ Ela Petero kwa kure achimutuwa na nyuma muhadi muhalani kwa kuhani mubomu. Achivhenya ndani na achisagala vhamwenga na arinzi ili aone chindicho omborera.

⁵⁹ Ela abomu a makuhani na baraza rosini were anayeya ushahidi wa ulongo wa kumu-ulagira Jeso. ⁶⁰ Ela kapatire ushahidi wowosi, Atu anji ajeza kuomboza ushahi wa kwao wa ulongo ela kauwezere. Mwishowe kuchiomborera analume airi achidzi-ombozera ⁶¹ na achiamba, "Mutu yuyu wa nena achi-amba, 'ninaweza kurivomola hekalu ra Mulungu na kurijenga kavhiri kwa tsiku tahu."

⁶² Mubomu wa makuhani achi-ima na achi-muuza Jeso na achimwamba, "kuweza kujibu? Ano anashuhudia utu wani chinyume cha kwako?" ⁶³ Ela Jeso wanyamala zii, Mubomu wa makuhani achi-mwamba, "ninakulavhiza kahiza Mlungu aruye moyo, uhuambire ichikala uwe ndiwe krisito mwana wa Mulungu."

⁶⁴ Jeso achimujibu, "uwe mwenyewe ndivyo unenavyo vivyo. Ela ninakwambira, kula hikara na kwenderera undamuona mwna wa Adamu yusegere mukono wa kulume urio una nguvu, na kudza kahiza maingu ga mulunguni."

⁶⁵ Ndivho vhavho mubomu wa makuhani arivho tarura mavazi ga kwakwe na achi-amba, "yudzinena maneno ga kukufuru! Je hunahenza ushahidi wa utu wani kahiri? Lola, hikara mudziisikira yo kufuru. ⁶⁶ Je muna-aza utu wani? Achijibu na achi-amba, "yunafaha chifo." ⁶⁷ Chisha achimutsuvhira mahe usoni na kumupiga makonde, anjine achimupiga mbalahi ⁶⁸ na achi-amba, "we Krisito, utabirie. Ni yuvhiye adziye kuchapa?"

⁶⁹ Vhavho Petero were yusegere nze ya muhala, na muhumiki wa chiche wamwendera na achi-mwamba, "uwe nawe were uvhanwenga na Jeso wa Galilaya."

⁷⁰ Ela wakahala mbere ya ao osini, achi-amba, "sigamanya gago uganenago."

⁷¹ Arivho-ombola nze ya ryango, muhumiki munjine wa chiche wa muona na achi-ambira arahu ario kala avhavho, "Mutu yuyu were yuvhamwenga na Jeso wa Nazareti."

⁷² Achi-apa kahiri kwa kuapa kurya chiravho, "Mutu yuyu mimi simumanya" ⁷³ kwa chiseho chifuhi arahu ario kala were aimire vhevhi akudza na achimwamba Petero, "Nijeri uwe nawe umumwenga wavho, kwa kukala hata kunena kwa kwako kunaonyesa."

⁷⁴ Ndivho arivho anza kulaani na kuapa, "mimi simumanya Mutu yuyu," na vhavho jogolo richi-ihika.

⁷⁵ Petero achikumbukira maneno arigo-ambirwa ni Jeso, "Kabila jogolo karidzangwe kwihika unanikahala mara tahu." Ndivho arivho-ombola konze na achenda rira kwa utsungu.