¹ "Ufalume wa Mulunguni ungadza here ni anamwari kumi ari-hala taa za kwao na achenda muvhokera bwana harusi. ² Atsano kahiza ao akala apumbavu na atsano anjine were ni alachu. ³ Anamwari apumbavu arivho hala taa za kwao, kaharihe mafuha gogosi. ⁴ Ela anamwari alachu ahala viya virivyo kala na mafuha vhamwenga na taa za kwao. ⁵ Hikara bwana harusi arivho chelewa kufika osini agwirwa ni usinzizi na achilala.

⁶ Ela usiku wa manane kuchikala na lonzo,' lola, Bwana harusi! Ombolani konze mukamuvhokere.' ⁷ Chisha anamwari osini achilamuka na achi-asha taa za kwao.

⁸ Arahu apumbavu achiamba arahu alachu, 'Huvheni sehemu ya mafuha kwa kukala taa zehu zinafa.' ⁹ "Ela arahu alachu achi -ajibu na achi- amba, 'kaganda hutosha siswi na mwimwi, ela enendani kwa aguzao mukadzigurire chasi chenu.' ¹⁰ Vhavho arivhokala akwenda gula mafuha, Bwana harusi wafika, na arahu osini ario kala atayari aenenda naye kahiza yo-nyambura ya harusi, na muryango uchifungwa.

¹¹ "Chiseho chidzo arahu anamwari anjine achidza na achi-amba, 'Bwana, bwana, husundurire.' ¹² "Ela achi-ajibu achiamba, ujeri ninamwambira mwimwi, mimi simumanya mwimwi.'

¹³ Kwa vivyo lolani, kwa kukala kamuimanya tsiku wala saa.

¹⁴ Kwa kukala ni here mutu ariye kala yuna safari ya kwenenda ts'i injine. Achi-aiha ahumwa a kwakwe na achi-avha utajiri wa kwakwe. ¹⁵ Mumwenga wao achimuvha talanta tsano, munjine achimuvha mbiri na iye munjine achimuvha talanta mwenga. Chila mumwenga wavhokera chasi kulengana na uwezo wa kwakwe, na yuyahu mutu achi-enenda safari ya kwakwe. ¹⁶ Vhavho tu yuyahu ariye vhokera talanta tsano wakwenda mara mwenga na achizihendera kazi na achipata talanta zinjine tsano. ¹⁷ Vivyo vivyo yuyahu ariye vhokera talanta mbiri achizivyaza zinjine mbiri. ¹⁸ Ela muhumwa yuyahu ariye vhokera talanta mwenga, wakwenda achitsimba chigopwe mutsangani, na achi-ifitsa pesa ya bwana wa kwakwe.

¹⁹ Na baada ya chiseho chire Bwana wa ahumwa ao wauya na achihenda mahisabu nao. ²⁰ Yuyahu muhumwa ariye vhokera talanta tsano wakudza na achireha talanta zinjine tsano, achia-amba, 'Bwana, wanipatira talanta tsano. Lola, napata faida ya talanta zinjine tsano; ²¹ "Bwana wa kwakwe achi-mwamba, 'ni vidzo, muhumwa mudzo na mwaminifu! Udzikala mwaminifu kwa vitu vichache. Nindakupa madaraka dzulu ya vitu ya vitu vinji. Injira kahiza furaha ya Bwana wa kwako.'

²² Muhumwa ariye vhokera talanta mbiri wakudza na achi-amba, 'Bwana, wanipatira talanta mbiri. Lola, nidzipata faida ya talanta mbiri zinjine.'

²³ "Bwana wa kwakwe achi-mwaba, ni vidzo, muhumwa mudzo na mwaminifu! Udzikala mwaminifub kwa vitu vichache. Nindakupatira madaraka dzulu ya vitu vinji. Injira kahiza furaha ya Bwana wa kwako.'

²⁴ Chidzamala muhumwa ariye vhokera talanta mwenga wakudza na achi-amba, 'Bwana, ninamanya vyakukala uwe umutu musiru. Una vuna vhatu vharivho kunyarire, na una vhavhula vhatu vharivho sitsuvhiretsuvhire mbeyu. ²⁵ Mimi naogovha, nichi-enda ifitsa talanta ya kwako mutsangani. Lola, hinyino vhano irahu iriyokala ni ya kwako.'

²⁶ Ela Bwana wa kwakwe achimujibu na achimwamba, 'uwe muhumwa mui na mukaha, wamanya vyakukala ninavuna vhatu vharivho sinyarire na kuvhavhula vhatu vharivho sitsuvhiretsuvhire mbeyu. ²⁷ Kwa vivyo were unafaa kuilavya pesa ya kwangu kwan atu a bengi, na muda wangu wa kuya ningavhokera iyo yangu vhamwenga na faida. ²⁸ Kwa vivyo muvhokeni iyo talanta na mumuvhe yuyahu ariye na talanta kumi. ²⁹ Chila mutu ariye yunacho, yundaonjezerwa zaidi hata kwakuzidishirwa. Ela kwa yoyosi asiye kala na chitu, hata chicho aricho nacho yundavhokwa. ³⁰ Mutsuvheni konze dzizani iye muhumwa asiyefaha, kuriko kuko kundakala na chiriro na kusaga meno.'

³¹ "Vhavho Mwana wa Adamu andivho kudza kahiza utukufu wa kwakwe, na malaika osini vhamwenga na iye, ndivho andivho sagala kahiza chihi cha kwakwe cha utukufu. ³² Mataifa gosini gandakutana vhamwenga mbereze, na yunda-agavya atu ngadzahere virahu murisa agavyavyo ng'onzi na mbuzi. ³³ Yundazi-ika ng'onzi mukonowe wa kurya, ela mbuzi yundazi-ika mukonowe wa kumotso.

³⁴ Chisha Mufalume yunda-amba arahu ario mukono wa kwakwe wa kulume, 'Inzoni, mwimwi murio-mwa haswa ni Baba, urithini ufalume murio-ikirwa kulahangu kuikwa kwa musinzi wa urimwengu. ³⁵ Kwa kukala were ni nzala na muchinipatira chakurya; were ni chiru muchipatira utu wa kunwa; were ni mujeni na muchinikaribisha; ³⁶ Were ni vhuvhu na muchinivika nguo; were ni mukongo na muchinirarisa; were ni chifungoni na muchinidzira; ³⁷ Ndivho enye hachi andamujibu na kumwamba, 'Bwana ni rini hakona una nzala na huchikurisa? Hebu uchikala una chiru na huchikupatira madzi? ³⁸ Na nirini hakona umujeni na huchikukaribisha? Hebu uchikala uvhuvhu na huchikuvisha nguo? ³⁹ Na ni rini hakona umukongo hebu kahiza chifungo na huchikudzira?

⁴⁰ Ndivho mufalume yunda ajibu na ku-amba, 'Ujeri nina mwambira, muricho chihenda kwa aa enehu atite, mwanihendera mimi.'

⁴¹ Ndivho yunda-ambira ao ario mukonowe wa kumotso, 'vhaukeni vhano vhangu, muriolaaniwa, enendani kahiza moho wa kare na kare urioikirwa shetani na malaika a kwakwe, ⁴² Kwa kukala were nina nzala, ela kamunipire chakurya, were nina chiru ela kamunipire madzi; ⁴³ were ni mujeni, ela kamunikaribishire, were ni vhuvhu, ela kamunivishire nguo; were ni mukongo na were ni chifungoni kamunirarisire.'

⁴⁴ "Ndivho ao nao andamujibu na kumwamba, 'Bwana ni rini hakona una nzala, hebu una chiru, hebu umujeni, uvhuvhu, hebu umukongo, hebu uchifungoni, na kahu-kuhumikirire?

⁴⁵ Chisha yunda ajibu na kuamba, 'Ujeri ninamwambira, chirahu chiricho kamuchihendere kahiza mumwenga wa aa atite, kamuni henderere mimi.'

⁴⁶ Aa andakwenda kahiza adhabu ya kare na kare, Ela enye hachi kahiza uzima wa kare na kare."