¹ Irivho fika dziloni ratsiku ya sabato, dzuwa ririvho kala rinatswa kuifikira tsiku ya kwanza juma, Mariamu Magdaleni na Yuyahu Mariamu munjine akudza kuilola mbira. ² Lola, kwa kala na tetemeko bomu ra tsi', kwa kukala malaika wa bwana watserera kula Mulunguni na achivhilingisa kanda riro dziwe, chisha achirisagarira. ³ Uso wa kwakwe were ungadza here ni mwangaza, na nguo za kwakwe were ni nyeruvhe ngadzahere barafu nyeruvhe. ⁴ Arahu arinzi achikala aoga na achikala here ni atu adzio-fa.

⁵ Malaika achi- afunurira arahu ana-ache na achi-amba, "musiogovhe, kwa kukala nina manya vyakukala muna muyeya Jeso ariye sulubiwa. ⁶ Kavho vhavha, ela yudzifufuka, here arivyo nena. Inzoni mulole vhatu arivho kala Bwana walazwa.

⁷ Enendani hiraka muka-ambire anafunzi a kwakwe, 'yudzifufuka kula kwa ario-fa. Lola, yuna hutangulia Galilaya. Kuko munda muona.' Lola, mimi nidzimwambira mwimwi," ⁸ Arahu Ana-ache auka vharuhu mbirani achikala ni aoga na kuno ana raha bomu, na achi-usa malo kwenda aambira anafunzi akwakwe. ⁹ Lolani, Jeso achi-onana nao na achi-amba, "Salamu!" Arahu ana-ache achidza, achimugwira magulu na achimwabudu. ¹⁰ Chisha Jeso achi-amba, "musiogovhe. Enendani muka ambire enehu atanguliye Galilaya. Kuko anda-niona mimi."

¹¹ Muda urahu arivho kala arahu Atu ache anenenda, lola, kahiza ao arinzi aenenda mudzini na ku-ambira abomu a makuhani gosini garigo kala gadzio-omborera. ¹² Ao makuhani arivho kala adzikutana na vilongozi na kujadiliana utu kwa vhamwengana ao. Aomboza chima chibomu cha pesa kwa arahu asikari ¹³ na achi-amba, "ambireni anjine, vya kukala anafunzi a Jeso akudza na usiku akauiya mwiri wa Jeso siswi were hurere." ¹⁴ Ichikala utu uu undamufikira mubomu wa jimbo, siswi hunda mushawishi na kuasira mwimwi mashaka gosini." ¹⁵ Kwa vivyo arahu asikari achizihala zirahu pesa na achihenda here arivyokala adzierekezwa. Habari ii ichimanyikana muno kwa Ayahudi na ichikala vivyo muhadi rero.

¹⁶ Ela arahu mitume kumi na mumwenga achi-enenda Galilaya, kahiza urahu murima ario-kala yudziaerekeza. ¹⁷ Nao arivho muona, achimwabudu, ela kahiza oa anjine aona shaka. ¹⁸ Jeso achidza kwao na achi-amba, "Nidzihewa mamulaka gosini duniani na mulunguni. ¹⁹ Kwa vivyo enendani na muka-hende mataifa gosini kukala anafunzi, Abatizeni kahiza dzina ra Baba, na Mwana, na ra Roho mutakatifu. ²⁰ Afundisheni kugatii mautu gosini nirigo mulagiza, na hata mimi nivhamwenga namwi daima, muhadi mwisho wa dahari.