¹ Muda uo Anafunzi akudza kwa Jeso na achimuza, "ni yuvhiye ariye ni mubomu kahiza ufalume wa Mulunguni?"

² Jeso achiha muhoho mutite, achimwika kahikahi yao, ³ na achiamba, "ujeri nina mwambira mwimwi, muchitsa tubu na kukala ngadza -here ahoho atite kamundaweza kuinjira kahiza ufalume wa Mulungu. ⁴ Kwa vivyo, yoyosi adzitserezaye ngadza here muhoho mutite mutu iye ni mubomu kahiza ufalume wa mulunguni. ⁵ Na yoyosi amuvhokeraye muhoho mtite kwa dzina rangu yunanivhokera mimi.

⁶ Ela yoyosi amuhendyaye mumwenga wa atite aa anikuluvhirao kuhenda dambi, indakala vidzo kwa mutu iye afungwe lwalwa tsingoni ahoswe kahiza chinwa cha bahari. ⁷ Shauri yao o Atu kwa kukala ni muda wa kujezwa! Kwa kukala kainabudi nyakati zizo kudza, Ela shauriye iye mutu andiye hendya gadze! ⁸ Ichikala mukono o hebu chigulucho chinda kuhenda uhende dambi chitose na uchitsuvhe kure nawe. Ni baha kwinjira kahiza uzima bila mukono hebu chirema, kuriko kutsuvhiwa kahiza moho wa kare na kare uchikala uchere na mikono yosini hebu magulu gosini. ⁹ Ichikala dzitso ra kwako rinda kuhendya uhende dambi, ring'ole na uritsuvhe kure. Ni vidzo uinjire kahiza uzima na dzitso mwenga, kuriko kutsuvhiwa kahiza moho wa kare na kare uchikala una matso gosini.

¹⁰ Lolani musimuvhurye mumwenga kahiza atite aa, kwa kukala nina mwambira vyakukala mulunguni kuna malaika a kwao tsiku zosini aulolao uso wa baba ariye Mulunguni. ¹¹ Kwakukala Mwana wa Adamu wakudza kuokola chirahu chiricho kala chidziangamika. ¹² Muna-aza chitu chani? Ichikala mutu yuna ng'onzi gana mwenga, na mwenga iangamike je kanda ziricha zirahu mirongo chenda na chenda kuko mirimani na kwenda irahu mwenga idziyo angamika? ¹³ Ujeri nina mwambira, achiizumbula, ujeri nina mwambira yundakala na nyemi kwa ajili ya iyo kuriko ao mirongo chenda na chenda ario angamika. ¹⁴ Vivyo vivyo, si mahenzo ga Beyenu wa mulunguni kukala mumwenga wa atite aa angamike?

¹⁵ "Ichikala nduguyo yudzikukosera, enenda ukamuonyese kosa ra kwakwe, uwe na iye kare. Ichikala yundakusikiza, undakala udzimupata nduguyo. ¹⁶ Ela ichikala kakakusikiza, muhale nduguyo mumwenga hebu airi vhamwenga na uwe kwa kukala kwa makanwa ga mashahidi airi hebu ahahu chila neno rinahakikishwa. ¹⁷ Na ichikala yudzivhurya kumusikisa, riambiambireni kanisa utu uo, ichikala yudzirivhurya kanisa kurisikisa, na akale kwenu ngadzahere ni mutu wa mataifa na mutoza kodi. ¹⁸ Nina mwambira ujeri, chochosi chirahu mundicho chifunga duniani na mulunguni chidzifungwa, na chochosi mundicho chifugula duniani na mulunguni chidzifugulwa. ¹⁹ Kisha nunamwambira kahiri, ichikala atu airi kahikahi yenu achikubaliana dzulu ya utu wowosi auvoyao duniani Baba ariye mulunguni yundauhenda. ²⁰ Kwa kukala airi hebu ahahu achikutana vhamwenga kwa dzina rangu mimi ni kahikahi yao."

²¹ Chisha Petero achidza kahiri na achimwamba Jeso, “Bwana, mwenehu achini kosera ni musamehe mara nyingavhii? Hata mara fungahe?”

²² Jeso chimwamba, “Sindamwamba ni mara fungahe, ela hata mirongo mifungahe mara fungahe. ²³ Kwa utu uo ufalume wa mulunguni ni karakara na mfalme Fulani ariye-henza kwerekeza hesabu kula kwa ahumwa a kwakwe. ²⁴ Arivho anza kwerekeza hesabu, muhumwa mumwenga achirehema kwakwe ariyekala yanamwisa pesa elifu kumi. ²⁵ Kwa kukala kakarire na njira ya kurivha, bwana wa kwakwe walagiza aguzwe, muchewe vhamwenga na anae na chila chitu arichokala yunacho, na marivho gahendeke. ²⁶ Kwa riro muhumwa achigwa, achipiga mavindi mbereze, Bwana, nivumurira nami, nindakurivha chila chitu.' ²⁷ Kwa riro bwana wa yayahu muhumwa, kwa kukala wasakumwa muno ni mbazi, wamurichira na achimusamehe deni riro. ²⁸ Ela muhumwa yayahu wauka na achimupata mumwenga kahiza ahumwa ayawe, ariyekala yanamwisa denari gama mwenga. Wamuvuha achimuhofya tsingo na achimwamba, Nirivha Chirahu nikwisacho.

²⁹ Ela yayahu muhumwa muyawe wagwa na achimulala muno, achmwamba ni vumurira nami nindakurivha.' Vamwenga nami na nindakuriva. ³⁰ Ela muhumwa yayahu wa kwanza wakahala badala ya kwakwe, wakwenda na achimutsuvha jela, muhadi andivhomurivha charahu amwisacho. ³¹ Na ahumwa ayawe arivoona chirahu chiricho-omborera agwira ni mbazi muno. Akudza na achimwambira bwana wa kwao chila chitu chirichoomborera.

³² Ndivho yayahu bwana wa muhumwa yayahu achimwiha, na achimwamba, ‘Uwe muhumwa, mui, uwe nakusamehe deni rangu rosini kwa kukala wanivoya muno. ³³ Je, kuwezere kukala na mbazi kwa muhumwa muyao, ngadzahere mimi nirivyokuonera mbazi uwe?' ³⁴ Bwana wa kwakwe watsikirwa na achimulavya kwa arahu atesao muhadi andivho rivha chasi chosini arichokala yanaiswa. ³⁵ Vivyo ndivyo Baba wa mulunguni andivyo ahendera, chila mumwenga wenu ichikala kandamusamehe nduguye kulaira moyoni."