¹ Tsiku ya handahu baadaye Jeso wa-ahala Petero, Yakobo, na Johana nduguye, na achi- ahala muhadi chirere cha murima mure. ² Achigaluzwa mbere yao, achigaluzwa uso wa kwakwe uching'ala here dzuwa, na nguo-ze zichi meta meta ngadza here mwanga. ³ Lola, vhachiombola Musa na Eliya achigomba naye. ⁴ Petero achijibu na achimwamba Jeso, "Bwana, nividzo siswi kukala vhavha. Vichikufaha, ninda jenga vibanda vihahu vhavha- chimwenga cha kwako, na chimwenga cha Musa, na chimwenga cha Eliya."

⁵ Arivho-kala yuchere nena, Lola, chivurivuri cha ingu-reruvhe richi-abiningiza, Lola, kahiza riro ingu kuchiombola sauti, ichiamba, "Yuyu ni Mwangu muhenzwi, anifaaye. Musikiseni iye." ⁶ Anafunzi arivho sikira gago, achigwa tsi chinabunabu na achiogovha muno.

⁷ Chisha Jeso achidza na achi-aguta na achiamba, "imani wala musiogovhe." ⁸ Achiunula nyuso zao dzulu ela kaonere mutu isivhokala Jeso hacheye.

⁹ Arivho kala anatserera kula murimani, Jeso achiamurisha, achi-amba," musi-omboze maono ga mautu gaga muhadi mwana wa Adamu andivho fufuka kula kahiza ario-fa."

¹⁰ Anafunzi a kwakwe achimuuza, achimwamba, "ni kwadze aandishi anamba vya kukala Eliya yundakudza chimbere?"

¹¹ Jeso wa-ajibu na achiamba, "Eliya yundakudza jeri na yundaudzya mautu gosini. ¹² Ela mwimwi nina-mwambira, Eliya wakudza kare ela ka-amumanyire. Badalaye, amuhendera arivyo henza ao. Kahiza njira iyo, na vivyo ndivyo mwana wa Adamu andivyo teswa kahiza mikono yao." ¹³ Vhavho ndivho anafunzie arivho manya kukala were yunanena kuhusu Johana mubatizaji.

¹⁴ Arivho fika kahiza vharivho na lo lukwili, Mutu mumwenga achimwendera, achipiga mavindi mbere za kwakwe, na achimwamba, ¹⁵ Bwana, muonere mbazi mwanangu kwa kukala yuna chififi na yuna teseka muno. Kwa kukala mara nyinji yunagwa mohoni hebu madzini. ¹⁶ Namureha kwa anafunzi a kwako, ela kawezere kumuvhoza."

¹⁷ Jeso achi-jibu na achiamba, "mwino chivyazi chisicho amini na chiricho banangika, nindakala vhamwenga namwi muhadi rini? Ninda muvumurira muhadi rini? Mureheni vhano." ¹⁸ Jeso achimuchemera ye pepo na achimuombola, na iye chijana achivhola kulahangu saa iyo iyo.

¹⁹ Chisha anafunzi achimudzira Jeso chisiri na achi-muuza, "kwa utuwani kahuweza kuchemera pepo akaombola?"

²⁰ Jeso achi-amba, "kwa sababu ya imani yenu tite. Nina-mwambira ujeri, ichikala mundakala na imani hata tite ngadza here tembe ya mbeyu ya haradali, munda-weza kuamba murima uu, tsama kula vhavha wenende kurahu, nao undatsama, na kakunda kala chitu chochosi cha kushindikana kwenu." ²¹ Ela aina ii ya pepo kaiwezekana kombola, ela ni kwa mavoyo na kufunga."

²² Arivhokala achere Galilaya, Jeso achi-amba anafunzi akwakwe, "Mwana wa Adamu yundabumwa mikononi mwa atu, ²³ na ao andamu-ulaga na tsiku ya hahu yunda fufuka." Anafunzi a kwakwe achishononeka muno.

²⁴ Arivho fika Kaperinaumu, Atu akutoza kodi ya nusu shekeli amwendera Petero na achimwamba, "Je mwalimu wenu ni-kurivha kodi ya nusu shekeli?" ²⁵ Achiamba, "ndiyo." Petero arivho injira ndani ya nyumba, Jeso achinena naye kwanza na achimwamba, "una-aza ni, Petero? Afalume a Dunia anavhokera ushuru na kodi kula ano-ani? Je ni kula kwa A-atwalao hebu kula kwa ajeni?

²⁶ Na Petero arivho-amba, "kula kwa ajeni," Jeso achimwamba, kwa vivyo atawalwao adziombozwa kahiza urivhaji. ²⁷ Ela husidze hukaahenda atozao kodi akahenda dambi, enda baharini, tsuvha ndowana, na umuhale yuyaha samaki andiye kudza wa kwanza. Undivho fungula kanware, undaona shekeli mwenga. Ihale na uavhe atoza kodi kwa ajili ya kwangu na uwe."