¹ Yezu akeanshwe ne war, akeambag nzey, s'akeynde ntsa wiya nde enen. ² Yenaka, watojie wur emog e nkeang emibeam wo ewuo n'ekuu, ativur ne ntir. Yezu ntangu emiyen nde lukwikilu ewo, atuba nda wur emibeam wo ewuo n'ekuu ndenden: "Mon me, yia na kikesa; otivea ndolula i masumu iyie." ³ Mby walong i nsiku imuu watuba wog na wog wuwun: "Wur ene atitwe Nzeam." ⁴ Yezu, ntangu emijia nde nginu iwo, atuba ndenden: "Djwi na nge elignu na nginu ipwo n'itura ignu? ⁵ Vim nge eli mpay na ntuba: "Otivea ndolula i masumu iyie", to na ntuba: "Yima, kien"? ⁶ Kansi, djwi ojiagni gnugnun Mon-wur ali n'ekub ne buu na ndolula masumu,..." S'atubinde nda wur emibeam wo ewuo n'ekuu ndenden: "Yima, vey ntir eyie, tshwag evuru eyie." ⁷ Wur ewo ayima, s'akien nde evuru ende. ⁸ Oluy o vear anagn ntangu emiyen wo ngean, wayen ngituka mpi wakumisa Nzeam emipea ekub oshin one ya vear. ⁹ Yezu alim kog, ntangu eleleg nde, ayen wur emog dzin inde Mati, atigneme n'evuru e mbumater ondii ofutawo mpaku. Atuba nda nde ndenden: "Onsandji." Ayima s'osandodjie. ¹⁰ Ntangu emigneme Yezu n'evuru djwi na nda, yenaka vear entsign etsamvey ekri e mpaku ti vear a luzingu epwo wayia nda ti nde, na walongoki inde. ¹¹ Ntangu emiyen wafarize vii anagn, watuba ya walongoki inde wuwun: "Djwi na nge nkum egnu ala ti vear avey ekri e mpaku, ti vear ali na luzingu epwo?" ¹² Yezu ayug emituba wo, atuba ndenden: "Vear ali djuung biu wapitsinding monganga ve, eli ko vear ali na nkeang. ¹³ Tshwagagni mpi liragni nge etuba djwi ine: "Ndi na osiang na ngy e vear, kansi epa djwi na empeab ve. Djwi me, nkayia mvie vear a wuo ve, kansi vear a masumu." ¹⁴ Mby walongoki i Yoane wayia etay eli nde, wuwun: "Djwi na nge su ti wafarize silekn okio, kansi walongoki iyie wapikn okio ve?" ¹⁵ Yezu atuba nda wo ndenden: "Nge, n'ivea, iwur i wum asikug wo ngyia ngy-ngy yug wum ali nda wo? Kansi nshuu ileye, ayalimawo wum ne kati ewo, ne mby ewo, ayasawokn okio." ¹⁶ Kaku wur etsantsug ipa eleam e mpa n'eleam e ntama ve, djwi ipa enagn asilegawo ngyara eleam enagn, itwunu asilegawo ngyia onen. ¹⁷ Wapikug ntsug mpi veana a mpa n'epfuy e ntama ve, yug kaku, epfuy asibuyewo, veana asipaywo, kansi atsawo ntsug veana a mpa n'epfuy e mpa, mby inkeape asizirawo." ¹⁸ Ntangu eyiitubike Yezu vii anagn, yen nkum iyer-nkuu emog ayia, akr abong ne nteang e Yezu, atuba ndenden: "Mon me onkear ayim ngwa, kansi yie, yag ntete, yab nde ko ewuo, asikeande ne luzingu." ¹⁹ Yezu ayima, asadjie wur enagn nda walongoki inde. ²⁰ Yenaka, onkear omog, aluung alopwikiwo mvwe djum n'ipe, ayia ne mby e Yezu, akir nsor eleam ende; ²¹ djwi atubikinde ndenden: "Yug mikir ko eleam ende, asivug me." ²² Mby Yezu akeantshim etay ende, ndenden: "Mon me onkear, yia na kikesa, lukwikilu eyie etovuga." Mby onkear owo avug ko ne ntangu enagn. ²³ Ntangu emikum Yezu n'evuru e nkum enagn, ayen aman atsambur oshiem ti oluy o vear wakie oshuru; ²⁴ atuba nda wo ndenden: "Limagni, mon onkear ene atowe ve, ativur lwong." Mby s'oyuiwo two. ²⁵ Ntangu emipur wo vear nelien, ashwe n'evuru, ovey n'ewuo; mby mon onkear owo ayima. ²⁶ Oshwong s'apagn wo etitign enagn enkum. ²⁷ Ntangu emilim Yezu kog, vear ape amibuye vy wosodjie. Walebug evie wuwun: "Mon e David, oteyug ngy!" ²⁸ Ntangu emikum Yezu n'evuru, vear amibuye vy anagn wavanga mbeama na nde. Yezu ayue: "Nge odjiragni gnugnun me mpi asikug me nkie oshin otubagnu enagn?" Wakeara wuwun: "Sidjir, Nkum!" ²⁹ Mby Yezu akir vy awo, ndenden: "Eyii ko oshin omidjir gnu." ³⁰ Mby vy awo angam. Mby Yezu atuba nda wo ndenden: "Osugagni wur emog akajia vii ane." ³¹ Kansi vear ape anagn wakien, wapagna oshwong onagn etitign enagn enkum. ³² Ko ntangu emikien vear ape anagn, wajie wur emog epitubi etay e Yezu, ayinde mpi na mpeve epwo. ³³ Ntangu emikma nde mpeve epwo ewo, s'akey nde ntuba. Oluy o vear anagn wayen ngituka, wuwun: "Vii ane sitotigni ngyen n'Israel ve!" ³⁴ Kansi wafarize wuwun: "Ali na nkum e wa entshung, s'alekmi nde entshung na wo." ³⁵ Yezu alekienikinde ne wa viya inen ti viya ikieg inkum, alelong ne wasinagoga, alelong vii a ekub e dzug, mpi alevugi nkeang eshin n'eshin ti ikom eshin n'eshin. ³⁶ Ntangu emiyen nde oluy o vear, ayug ngy, djwi ayiwo watilem, watishir biu. Watikum kamsi ameme akwon wur alir. ³⁷ Atuba nda walongoki inde ndenden: "Evur eli onen, kansi vear akie neti wali okieg. ³⁸ Samagni djwi nkea evur atum vear otshia n'evur ende."