¹ Yezu s'aviinde wantumwa inde djum n'ipe, apea ekub e nkma mpeve ipwo; na mvuga vear a nkeang eshin n'eshin ti ankea ikom eshin n'eshin. ² Yen vn a wantumwa djum n'ipe iwo: nteang Simoni eviewo Petelo ti Andre otwung onde, Jaki e mon e Zebede ti otwung onde Yoane, ³ Filipu ti Bartelemi, Thomas ti Mati wur evey ekri e mpaku, Jaki e mon e Alfe ti Tade, ⁴ Simoni eviewo nkea inaagn ti Yudasi eyisar Yezu. ⁵ Enagn wantumwa djum n'ipe iyitum Yezu, nteang akaba vii ane: " Oyatsagni etay eli empaagn ve mpi oyashweagni ve ne viya i vear a Samaria. ⁶ Kansi tshwagagni etay eli ameme Israel emijing mbug. ⁷ Ntangu eletshignu, longagni, tubagni ngean: "Ekub e dzug etikum pipi." ⁸ Vugagni vear ali na nkeang, biyagni vear n'ewa mpi kmagni ensthung. Otiveagni e ngor, peagni mpi e ngor. ⁹ Oyavaragni ata wolo ve, ata ekri ve, ata etiempar ve n'abenge agnu. N'ekien egnu, oyaveyagni ata ibwomo ve, ata ileam ipe-ipe ve, ata antwum ne nkuu ve, ata ikom n'ewuo ve. ¹⁰ Djwi wur ekie otshia awong n'ifutu inde. ¹¹ Ne wiya enkum esishwegnu, tojueagni yug eli na wur esoveyagni n'evuru ende tii ko ntangu esikeagnu nkien. ¹² Yug oleshweagni n'evuru ewo, peagni ankea evuru mbea. ¹³ Yug vear anagn wamileang, ngemba egnu eyii ya wo, yug wakaleang ve, ngemba egnu ekey ya gnu. ¹⁴ Yug vear watitun n'ongyamagni mpi watitun na ngyug along agnu, ntangu epwegnu n'evuru ti ne wiya enen enagn sakumagni okub o nkuu ignu. ¹⁵ Mokabagni vi-a-vii: eshuu eyabag Nzeam ewu, buu e Sodom ti e Gomor wapayavea ewu eninen kamsi wiya enagn ve. ¹⁶ Yenagni, mean ndotumagni kamsi ameme n'ondii oli wankuy, yiagni onker kamsi ndjua, yiagni pwo kamsi nkodima. ¹⁷ Osugagni na vear djwi ayofugnakagni wo ne tuminar mpi ayoberakagni wo akoy ne wasinagoga iwo. ¹⁸ Ayovaragni wo ne nteang e mbumater ti ne nteang e wa vwi djwi na me, djwi oyiagni wa ntieng djwi na wo, djwi n'empaagn mpi. ¹⁹ Yug watotshungagni, oyayenagni mpay ve djwi n'oshin osituba gnu, ata vim nge esituba gnu, ogniang, vii asitubagnu asopeagni wo ko ne ntangu enagn; ²⁰ djwi epa gnu vear asituba ve eli Mpeve e Tea gnu wur esituba ne kati egnu. ²¹ Otwung ayakea nde mfugn otwung onde djwi wodjag, tea mpi ayakiende oshin onagn ya mon nde. Aman ayayiawo ntwum ya atea awo ti amea awo mpi ayadjagakawo. ²² Vear ankum ayotunagni wo djwi na dzin ime. Kansi wur eyakie inaagn tii ne nsuka ayavug nde. ²³ Yug watopeagni mpay ne wiya emog, luragni wiya emuu iky. Djwi mokabagni e vi-a-vi: "Opatoshir nkienagni ne viya Israel inkum ve ne nteang e Mon-wur na ngyia. ²⁴ Kaku longoki eshuna long ende ve, ata wur otshia eshuna nkum ende ve. ²⁵ Ewong ya longoki wovey kamsi long mpi wur otshia kamsi nkum ende. yug wativie nkea evuru "Belzebul", mby vear ali n'evuru ende wapalega na na mvie wo vear apwo? ²⁶ Kansi oyaluragni vear anagn ve, djwi kaku vim emizuba ekwon wo ngyen ve, ata vim oziy ekwon wo njia ve. ²⁷ Vii alokabagni me ne mpib, kabagni vii awo mbiiy enkum, ilokabagni me oshushuo n'itii, longagni ne dzug otwon evuru. ²⁸ Oyaluragni vear adjag djuung kansi wapikug ndjag moyo ve. Wuo oluragni wur esikug ndjag ne mbala emog moyo ti djuung ne bilungi. ²⁹ Wapitsinsar atuere ape ikutu imog ve? Kansi kaku ituere imog itsandog ne buu yug Tea gnu akaleang ve. ³⁰ Oshin omog awuu agnu n'ote enkum eli ngitanga. ³¹ Oyaluragni ve, olengagni atuere entsign n'ekub. ³² Mby, wur eyandjira me ne vy a vear, me ko ayojira me nde ne nteang e Tea me ne dzug. ³³ Kansi wur eyansan me ne vy a vear, me ko ayosan me ne nteang e Tea me ne dzug. ³⁴ Oyabansagni gnugnun ayime mpea ngemba ne buu. Nkayia mpea ngemba kansi ayime n'ompien e vur epe. ³⁵ Djwi me, ayime nama mon ompeam ti tea nde, mon onkear ti mea nde, mon onkear ti okiu nde onkear, ³⁶ wa mbeni i wur ayayiawo ko vear a opeang onde. ³⁷ Yug wur aleang tea nde ata mea nde eshuna oshin ondeang nde me, apa ali wuo djwi na me ve. ³⁸ Wur ekavara kulunsi ende djwi andjii apa ali wuo djwi na me ve. ³⁹ Wur eyawum moyo ende ayatsawo ntu kansi wur eyafanga moyo ende djwi na me ayakeande mvea. ⁴⁰ Wur eyoveyagni, atimvey ti me; wur emimvey me ativey mpi wur eyintum me. ⁴¹ Wur esivey ngunsa e Nzeam djwi ali ngunsa, asivey nde ifutu ipeawo ya ngunsa. Wur esivey wur e wuo djwi ali wur e wuo, asivey nde ifutu ipeawo ya wur e wuo. ⁴² Wur esipea ikob i vay a mpio ya emog ne kati aman alieng ane djwi ali longoki eme, mokabagni vi-a-vii, apafanga ifutu inde ata itaang ve.