¹ Ntangu emishira Yezu na mpea ilag inagn ya walongoki inde djum n'ipe, s'alim nde kog, atsandong along ne viya iwo inen. ² Yoane-Mbotiki ne bolog, emiyug nde watuba n'etshia elekii Kristu, atum oshwong ya walongoki inde na njue Yezu wuwun: ³ "Yie oli wur efwete ngyia, go eli na wur emuu efwetesu nkwung?" ⁴ Yezu akeara ndenden: "Tshwag, kabagni Yoane vii ayen gnu mpi ayug gnu ene. ⁵ Vear amibuye viy wakeangyen, vear ali n'ikom walekien, vear ali na nkeang i ndwum djuung iwo itikea wuo, vear ali atii nkna watikea ngyug, edjuu walebiy n'ewa, mpi emva waleyug otuba o Nzeam. ⁶ Osiang ya wur epamvey me kamsi ibagu isilogo vear." ⁷ Ntangu emikien walongoki i Yoane, Yezu s'atubinde nda oluy o vear anagn djwi na Yoane ndenden: "Nge eyitshignu ndir ne buu e ndzum, ekaya egnug n'opepe? ⁸ Kansi nge eyitshignu ndir, wur emilwer ileama i wuo? Vear amilweraka ileama iwuo wali ne mvuru i wavuy. ⁹ Kansi nge eyitshignu ndir, ngunsa? Ee, mokabagni alenga ngunsa. ¹⁰ Djwi nde ali wur eyiifugn wo n'enkeana: "Lir, ntitum okiegn eme nteang eyie djwi awong mbug." ¹¹ Mokabagni vi-a-vii, ne kati e vear amiwur wo n'ankear, kaku wur emog elenga Yoane-Mbotiki ve. Kansi wur ekieg n'ekub e dzug alolenga nde. ¹² Yim ko nshuu i Yoane-Mbotiki tii opeane, ekub e dzug walegnuni na biu - na biu ko vear ali n'inaagn vear ayavey wog. ¹³ Djwi wangunsa inkum ti wansiku i Moize abikuliwo tii nsuka ya Yoane. ¹⁴ Yug olingagni ojiagni wuo, ndug Elia efwete ngyia. ¹⁵ Wur eli n'atii angyug, ayug. ¹⁶ Vear a nshuu ine asayer me na nagn? Wali kamsi aman alekagn n'ilaga, watigneme mby wavie emog-emog wuwun; ¹⁷ "Oburagnisu ngom, opikagnagni ve. Sitoshuyagni lim asaga, okaliyagni ve." ¹⁸ Djwi Yoane atiyia, apile mampa ve, apignwi veana ve, watuba wa nde wuwun: "Ali n'ontshung." ¹⁹ Mon-wur atiyia, ala mpi agnwa, wa nde wuwun: "Liragni, otshia onde ko nda ti na gnwa veana, ewur e vear a mpaku ti vear ali n'epier epwo." Kansi walayen ntiegn ne etshia ende. ²⁰ Mby Yezu s'agniangikinde waviya inen iyikikinde bidimmu entsign, djwi wakatshima itura iwo ve. ²¹ "Mpay ya yie Korazin! Mpay ya yie Bethsaida! Djwi bidimu inen-inen iyikime ne kati egnu, yug ntokie wog ne Tyr ti ne Sidonia, anayiawo vear anagn wamitshima itura iwo ntama, analwer wo abwomo, anakwewo ti etugu e tshiya. ²² Mokabagni, eshu eyabag wo ewu, Tyr ti Sidonia wapavey ndola eninen ve kamsi gnu. ²³ Yie Kapernaum, obansa yiyen ayojir wo tii n'olung? Kaku ve, ayokeyawo ngie tii ko ne wiya e wabafwa. Djwi bidimu inen-inen iyiikime ne kati eyie, yug ntokie wog ne kati e Sodomo, anayiawo wiya enagn eliko tii lwo ene. ²⁴ Mokabagni, eshuu eyabag wo ewu, wiya e Sodomo apayavey ndola eninen ve kamsi yie." ²⁵ Ntangu enagn, Yezu s'atubinde: "Mokeara nsag-na viye, Tea, yie nkum olung na buu, djwi aziy yie vim ane, ankea ntiegn ti ankea waagn wakajia, mby otisayegne ya vear akwon waagn, kamsi aman alieng ane. ²⁶ Eli oshin onagn Tea, djwi enagn eli wuo ne viy ayie. ²⁷ Vim ankum, Tea me amimpea, kaku ata wur emog ve ejia Mon, ko Tea ndemie, mpi kaku ata emog ejia Tea ve, ko Mon ndemie mpi, ti wur emileang Mon ndenden aloyegne. ²⁸ Yagagni ya me, gnu gnankum ekie otshia mpi elevari odzuru, mby me, asopeagni me ntangu osayoragni. ²⁹ Veyagni odzuru ome, veyagni vii ame, djwi me ndi pwo ti n'etura ngikra mby asiveagnu ntangu esiyor moyo egnu. ³⁰ Djwi odzuru ome kaku mpay ve, eli mpi kwayaa.