¹ Mby Yezu s'atear nde n'ivur antu eshuu e sabat. Walongoki inde ayug wo nziya mby s'akeagiwo ebiy antu s'alikiwo. ² Ntangu emayen wafarize, watuba wa Yezu wuwun: "Yen, walongoki iyie, wakie vii apitsiwo nkie eshuu e sabat." ³ Kansi Yezu akeara ndenden: "Okatangagni ve vii ayikii David ntangu eyiyug nde nziya, nde ti vear ayinde nda wo? ⁴ Oshin onkagn oyishwinde n'evuru e Nzeam, eyilinde mampa iyipiwo makabu ya Nzeam, ekakug nde ale wog ve, ata vear ayinde nda wo, djwi enagn ekug ko wanganga-Nzambi wale?" ⁵ Ata n'enkeana e wansiku i Moize, okatangagni ve, eshuu e sabat, wanganga-Nzambi wapilemfuki ve na nsiku i sabat neti e tempelo, ya wo, epa disumu ve? ⁶ Kansi me, mokabagni, ene eli vim emog elenga tempelo. ⁷ Yug ko otojiagni itsin i djwi iyifugn wo ene: "Ndaleang iwuo kansi epa empeab ve," opinapeagni ewu ya vear apijia ata djwi mog ine ve. ⁸ Djwi, Mon-wur ali nkum e sabat." ⁹ Mby Yezu alim kog, s'atshinde nshwe ne sinagoga ewo. ¹⁰ Lir, neti, ayiwo na wur emog, ewuo ende emiyum. Wafarize wayue Yezu wuwun: "Eli ne nsiku na mvuga wur e nkeang eshuu e sabat?" Enagn ayiwo oshin ondogo, watubi wuwun atikie disumu. ¹¹ Yezu atuba nda wo ndenden: "Nagn eli ne kati egnu, yug ali ko na imeme imog, imeme iwo atilog n'ibulu ititey eshuu e sabat, apakug nkeambin imeme inagn ve? ¹² Kansi wur alenga imeme! Ekug na nkie iwuo eshuu e sabat." ¹³ Mby Yezu atuba nda wur enagn: "Shima ewuo eyie!" Ashima mby ewuo ekea wuo, kamsi ewuo emuu egni. ¹⁴ Kansi wafarize wapwe, wakie mpfug djwi na nding oshin nge esikug wo ndjag Yezu. ¹⁵ Ntangu emiyug Yezu vii anagn, s'alim nde kog. Vear entsign wosodjie, avuga wankum. ¹⁶ Akaba na nkwon nkaba ya vear amuu, ¹⁷ oshin onagn, vii ayikab ngunsa Ezayi s'akug wo: ¹⁸ "Lir wur eme otshia eyison me, wur eleang me entsign, moyo eme eli n'osiang djwi na nde. Ayatsug me mpeve eme ya nde mpi ayabag nde ewu e empaagn. ¹⁹ Apayakie ata ote biu ve, apayatsug ata olie ve, kaku ata wur eyayug djwi inde n'iyawiya ve. ²⁰ Apayayara ata ekaya emitsa n'kri ve, apayadzum ata mwinda elekri tshiya mpi ve, tii ko eyanunga vii a wuo. ²¹ Mby empaagn ayayiawo n'ekaagn ne dzin inde." ²² Mby wajie wur emog eyii na mpeve epwo etay e Yezu. Ovuga, wur enagn akeantuba mpi akea ngyen. ²³ Oluy o vear ankum wayen ngituka, wuwun: "Ene epayia mon e David?" ²⁴ Kansi ntangu emiyug wafarize watuba djwi na kidimu enagn, wuwun: "Wur ene alekmi entshung ene na Beelzebul, nkum e wa entshung." ²⁵ Kansi ntangu emijia Yezu nginu iwo, atuba nda wo ndenden: "Ekub enkum yug etikum akab-akab, enagn eletsu ngwa. Ata wiya enkum ata opeang onkum yug wakea ndwa wog na wog, epafizira ve. ²⁶ Yug satana akma satana, ndemie atikum akab-akab. Oshin onkagn ekub ende asikug wo ntsa nteang? ²⁷ Yug me, ndekmi entshung na biu e Beelzebul, mby vear alosodjiyagni gnu walekmi na nge? Ko wog anagn vear ayobagagni ewu. ²⁸ Kansi yug ndekmi ensthung na Mpeve e Nzeam, enagn ekub e Nzeam eli ya gnu. ²⁹ Oshin onkagn wur asikug nde nshwe n'evuru e nkea biu, akami vim ande ankum yug akatotshung wur enagn nkori ve, ne mby ewo asakama vim ande n'evuru? ³⁰ Wur epindeang me ve, alantun, mpi wur epileang ngya ondii omog ti su ve alim. ³¹ Mby s'okabagni me memen: disumu enkum ata itii inkum isitwe vear, asivea wo ndolula. Kansi wur esitwe Mpeve wapayololula ve. ³² Wur esituba otuba opwo djwi na Mon-wur, asivea nde ndolula kansi wur esituba ipwo djwi na Mpeve-Santu, apavea ndolula ve ata ne mvwe ene, ata ne mvwe eleye. ³³ Tubagni gnugnun oshung oli wuo, itub inde mpi ili wuo; oshung opwo, itub inde mpi ili ipwo, djwi atsawo njia oshung ko n'atub ande. ³⁴ Atshwe ane! Oshin onkagn esikug gnu ntuba vii a wuo, gnu vear apwo ngean? Djwi odzum atsande mpur ko vii amiyuo to n'etura. ³⁵ Wur e wuo atsande mvey vim a wuo ko n'iteang inde i wuo n'etura ende; wur epwo atsande mvey vim apwo ko n'iteang ipwo n'etura ende. ³⁶ Mokabagni, eshuu ebag wo ewu, vear ayasamawo ko n'otuba opwo emitubakawo. ³⁷ Djwi n'otuba oyie, ayanunga yie; mpi ko djwi n'otuba oyie, ayalog yie. ³⁸ Walong i nsiku imuu ti wafarize s'atubiwo: "Nkum, siling otokie kidimu emog sitoyen." ³⁹ Yezu akeara ndenden: "Aman apwo, wamipea Nzeam mby, waling ko wayen kidimu. Kaku kidimu emuu eyapeame ve, ko kidimu e ngunsa Yonasi. ⁴⁰ Djwi, oshin oyikii Yonasi mbiiy isar ti etshuu esar n'ifugn i nse eninen, oshin oyakie Mon-wur mbiiy isar ti etshuu esar ne ngie e buu. ⁴¹ Vear a Ninive ayayima wo eshuu e mbag ewu, ayapeande ekwa ya aman a eshuu e lwo ene, djwi wo, atshimi wo itura n'along a ngunsa Yonasi. Kansi wur eli nendien alenga Yonasi. ⁴² Vuy onkear e Saba ayayimande eshuu e mbag ewu, ayapeande ekwa ya aman a eshuu e lwo ene, djwi ayim nde etey, ayinde ngyug along a Salomono. Kansi wur eli nendien alenga Salomono. ⁴³ Yug mpeve epwo atipwe ya wur, atsi ne endii e ndzum, aleling ondii osiyor nde, kansi apayen ve. ⁴⁴ Mby atuba ndenden: "Ayakeame ntsa n'evuru, ondii oyim me." Ntangu esikeande, asiyen nde evuru watiyuom, watiwong wuo. ⁴⁵ akien, atsimvey mpeve ipwo ishiambia imuu olenga nde na biu, mby wakey mpier wankum kog. Mby, ipwo i wur enagn ikey ndenga ipwo iyikinde nteang na wo. Ayayiawo oshin omog ti ipunu aman ali eshuu e lwo ene." ⁴⁶ Ntangu eyitubike Yezu nda oluy o vear anagn, mea nde ti atwung ande wayia nelien, waling nsula ti nde. ⁴⁷ Wur emog okaba ndenden: "Yen, mea yie ti atwung ayie waloling, waling nsula ti yie." ⁴⁸ Kansi Yezu akeara ndenden: "Mea me nagn? Mpi atwung ame wanagn?" ⁴⁹ Mby, ashwong ewuo etay eli walongoki inde, ndenden: "Yen, mea me ti atwung ame wawean! ⁵⁰ Djwi, wur enkum ekie oshin oleang Tea me ne dzug, ndug enagn ali otwung ome, ali nkignam me, ti mea me."