¹ Eshuu enagn, Yezu alim n'evuru eyilongikinde, atsa gneme, n'ikri i nzey. ² Oluy o vear wayia, wodjing, mby s'atshinde nshwe ne war, agneme. Oluy o vear anagn wasatsuga ne nky. ³ Mby Yezu akaba vii entsign ko n'itsig, ndenden: "Wur emog apwe na ntsa mfuy evur. ⁴ Ntangu elefuy nde evur ewo, mbeam asagn amuu esalog n'ikri i mbug. Wamfuru wasala. ⁵ Ikab i mbeam imuu isalog ne buu e atari, ekayia na buu entsign neti ve. Etean kaku emen, ko djwi ekayia na buu entsign ve. ⁶ Kansi ntangu emipwe vuna, elunga djwi ekatsug edzuu ve, s'ayum wo. ⁷ Imuu isalog n'atiene. Atiene afuye, s'adjag wo asagn anagn. ⁸ Mbeam imuu isalog ne buu e wuo mby ewur, ebeam emog nkama, ebeam emuu osom, ebeam emuu osar. ⁹ Wur eli n'atii ayug." ¹⁰ Walongoki wayia etay eli Yezu, woywe wuwun: "Djwi na nge etuba yie ya vear anagn n'itsig?" ¹¹ Yezu akeara ndenden: "Djwi na gnu, wamopeagni waagn e njia oziy ekub e dzug, kansi wakapea ya wo ve. ¹² Djwi, ayapeawo ko wur eli na wo, djwi ayii na wo entsign. Kansi, wur eli kaku na wo ve, asokumawo ata ivim iyinde na wo." ¹³ Itsin iwo wog enagn eletubime ya wo ko n'itsig, djwi, ata wayen, wakwon ngyen, ata wayug, wakwon ngyug, wakwon njia ata vim emog. ¹⁴ Vii ayiitubi ngunsa Ezai etikug djwi na wo: "Ayayug gnu, kansi opajiagni ata vim emog ve, ayalirgnu, kansi opayenagni ata vim emog ve. ¹⁵ Djwi, itura i vear ane itikum ntsug, watikna atii awo djwi wakwon ngyug, watidzub viy awo djwi wakwon ngyen, ata atii awo djwi wakwon ngyug, djwi wakakea ntshima itura iwo, nkavuga." ¹⁶ Osiang ya viy ti atii agnu, djwi viy agnu alayen, atii agnu alayug. ¹⁷ Mokabagni, vi-a-vii, wangunsa entsign ti vear a wuo entsign alingikiwo wayen vii ayen gnu ane, kansi wakayen ve, mpi alingikiwo wayug vii ayug gnu ane, kansi wakayug ve. ¹⁸ Yugakagni itsin i djwi ituba etsig e wur efuy evur. ¹⁹ Yug wur atiyug otuba e ekub e dzug kansi apijia ata vim emog ve, ontshung ayi nkama vim ayifuy wo n'etura ende. Wur enagn ali kamsi mbeam iyilog n'ikri i mbug. ²⁰ Mbeam iyisalog n'atari, eli wur esiyug otuba o Nzeam, avey wog n'osiang entsign, ²¹ kansi kaku edzuu ya nde ve, apayia na wo ntangu entsign ve. Ntangu esiyia mpay go mbangika djwi n'otuba o Nzeam, akagni ndog. ²² Mbeam iyisalog n'atiene, eli wur esiyug otuba o Nzeam, kansi mpay ti vii a buu ene, ti nziya otsun ekri edjag otuba ewo, apafiwur ata vim ve. ²³ Mbeam iyisalog ne buu e wuo, eli wur esiyug otuba o Nzeam, akir n'etura ende; ndug enagn esipur atub, asiwur wo, ebeam emog nkama, emuu osom, emuu osar, alewong ntangu enkum." ²⁴ Yezu akeampea etsig emuu ndenden: "Ekub e dzug eli oshin omog ti wur emifuy mbeam i wuo n'evur ende. ²⁵ Ntangu emivur vear, mbeni ende atiyia mfuy mbeam ipwo n'ondii emifuy nde antu, atikien. ²⁶ Ntangu emimen vim anagn, etiwur, adjiu apwo mpi atimen. ²⁷ Vear ande otshia wayia, wokaba wuwun: "Nkum, s'afuy yie ko mbeam i wuo n'evur eyie? Mby oshin onkagn emifiyen su ti adjiu apwo neti?" ²⁸ Atuba nda wo ndenden: "Enagn eli otshia emikie mbeni." Mby vear otshia wuwun: "Oleang sitsi nsuma wog?" ²⁹ Nkum akeara ndenden: "Kaku, djwi ntangu esisumagnu adjiu apwo, okasumagni mpi ti vim a wuo anagn. ³⁰ Siangagni inkum ifuyi ondii omog tii ko ntangu eyakeagasu. Ntangu eyakeagasu, ayakabame vear otshia memen: "Tolimagni ntete adjiu apwo, tshungagni wog n'obuye, djwi na ntwomo ne tshiya. Mby osatsugagni antu ankum ondii omog n'esag." ³¹ Yezu akeampea etsig emuu, ndenden: "Ekub e dzug eli kamsi ebeam e moutarde eyiisafuy wur emog n'evur ende. ³² Ebeam enagn eli ebeam emilega okieg ne wambeam inkum. Kansi ntangu etsande mfuye, atsande nkum oshung elenga eshung enkum n'evur n'otey. Wamfuru atsawo ngya ntwung djib ko n'atab awo." ³³ Yezu akeampea etsig ene, ndenden: "Ekub e dzug eli kamsi ete e mampa, onkear ativey, atisob e fufu djwi fufu ivean." ³⁴ Yezu along oluy o vear anagn ankum ko n'itsig. Kaku vim eyiitubinde eyiikwon itsig ve. ³⁵ Vii ayiitubi ngunsa s'akug wo, ndenden: "Ayatubame n'odzum ome ko n'itsig, ayakab me oziy onkum yim ko itsin i buu." ³⁶ Yezu s'akabinde oluy o vear anagn na nkien, mby nde s'ashwinde n'evuru. Mby walongoki inde s'ayiwo mbeama na nde, woywe: "Tendula ntete etsig e adjiu apwo n'evur." ³⁷ Akeara ndenden: "Wur emifuy mbeam i wuo eli Mon-wur. ³⁸ Evur eli buu ene. Mbeam i wuo eli aman ekub e dzug. Adjiu apwo eli ontshung. Ntangu e nkeaga mbeam eli nsuka e luzingu e buu. Vear otshia eli banzio. ^{39 40} Adjiu apwo ayafanga wo ne tshiya, ayayiawo oshin omog ne ntangu e nsuka. ⁴¹ Mon-wur ayatum nde banzio inde, ayakeagawo vim enkum e disumu n'ekub ende, ti vear ankum alekii ipwo, ⁴² mby ayatwomo wo ne n'ibulu i tshiya, mpiog, ayayiawo ko aluu ti agnere n'akaag. ⁴³ Mby, vear a wuo ayapiey wo kamsi vuna n'ekub e Tea wo. Wur eli n'atii, ayug!" ⁴⁴ Ekub e dzug eli mpi kamsi iteang imiziy wo n'evur. Wur emuu mpi atiyen, atisaziy. Atiyia n'osiang, s'atshinde nsar vim ande ankum ayinde na wo, djwi ashum evur enagn. ⁴⁵ Emuu, ekub e dzug eli kamsi wur esar vim, aleling ayaga a wuo. ⁴⁶ Ntangu emiyen nde iyaga eli n'isuu i dzug, atsa nsar vim ande ankum ayikinde na wo, mby atsa nshum iyaga inagn. ⁴⁷ Ekub e dzug asiyersu oshin omog ti mutrafu emibug wo ne nzey, nse eshin n'eshin ititaka neti. ⁴⁸ Ntangu emiyuo nse n'oshing, ankea mutrafu watibin n'ikri i nky, wason nse i wuo watsug n'isag, wafangike nse ipwo. ⁴⁹ Ne ntangu e nsuka mpi ayayiawo ko oshin onagn. Banzio ayayiawo mbag ewu e vear djwi na ntsug vear apwo etay ewo, vear a wuo mpi etay ewo. ⁵⁰ Ayatwomowo n'ibulu i tshiya, mpiog ayayiawo ko aluu ti agnere n'akaag. ⁵¹ Otijiagni vii ankum ane? Wokeara wuwun: "Ee, sitijia". ⁵² Mby 'satubinde nda wo ndenden: "Long e nsiku enkum emivey along a ekub e dzug, ali oshin omog ti wur eli n'evuru, kansi nde, alepur vim a ntama ti vim a mpa n'iteang inde." ⁵³ Ntangu emishir ntuba Yezu vii anagn ankeankum, s'alim nde n'ondii onagn. ⁵⁴ Mby Yezu s'akeynde ntsa ne buu ende, atsa nkea ndong vear ne sinagoga ewo. Vear ayoyugike wayen ngituka, wuwun: "Waagn eli ya wur ene ti bidimu ine iyim nonkagn? ⁵⁵ Wur ene apa ali mon e wur etsankie abaya nendien? Mea nde epa Maria ve? Jaki, Yozefo, Simoni ti Jude epa wali akwom ande ve? ⁵⁶ Ankignam ande wankum epa wali wa su nendien ve? Mby nde, vim ankeankum ane ayim nonkagn?" ⁵⁷ Ayenikiwo akmsi alatag wo n'otuba onde, mby Yezu atuba nda wo ndenden: "Ngunsa enkum atsawo ntuma ko ne wiya nde ti n'opeang owo." ⁵⁸ Akafikie mpi bidimu entsign ve ne wiya enagn, djwi n'itura iwo ipileang wo ndjir.