¹ Ne nshuu inagn, Erodi, nkum e buu e Galilea, ayug nde watuba djwi na Yezu. ² Atuba nda vear ande otshia ndenden: "Eso, eli ko Yoane-Mbotiki atikea mbiy n'ewa, mby s'alekiinde bidimu oshin onagn." ³ Djwi, Erodi atshung nde Yoane, otshung nkori, mby s'otwominde ne bolog djwi na Erodiade, wear e okwom nde Filipu. ⁴ Djwi Yoane okabikinde ndenden: "Epikug ve, ne nsiku, ovey Erodiade akum wear yie." ⁵ Erodi alingikinde oshin osidjag nde Yoane, ayugikinde womo e waYuda djwi oveyikiwo wuo n'oshin oyiinde ngunsa. ⁶ Kansi, ntangu emikug elaga eyiwur wo Erodi, n'ikagn inagn, mon onkear e Erodiade akagnikinde wuo ne nteang e vear ayivii Erodi, mby Erodi ayiinde n'osiang entsign. ⁷ Djwi nompea nde osiang mpi, s'asilinde na mpea mon onkear onagn vim enkum esiling nde. ⁸ Ntangu emiyug nde otuba o mea nde, s'atshinde ntuba nda Erodi ndenden: "Ompii ko ote e Yoane-Mbotiki n'ilongo nendien." ⁹ Vuy, waagn ende enkum eshir na vim emiwigna nde. Kansi n'oshin oyisili nde, mpi ne viy a vear ankum ali ne kog enagn ti nde, s'atum nde vear wakii ko oshin onagn. ¹⁰ S'atum nde vear na mbag ote e Yoane ne bolog. ¹¹ Mby s'avariwo ote enagn n'ilongo, wapea ya mon onkear enagn, nde mpi s'atshinde mpea mea nde. ¹² Mby, walongoki inde wayia mvey djuung inde watsa mpfugn. Ne mby ewo, s'atshiwo mpea Yezu esiang enagn. ¹³ Ntangu emijia Yezu vii anagn, s'alim nde kog, ne war, atsa n'ondii onde ndemie. Ntangu emijia vear ondii oli nde, wayim wiya na wiya, wasayia ne nkuu. ¹⁴ Mby Yezu, emiyiande ne nteang ewo, ayen oluy o vear anagn, ayug ngy entsign, s'avugikinde vear a nkeang. ¹⁵ Ntangu emijie vuna, walongoki watuba wa nde wuwun: "Nendien sili ne buu e ndzum, vuna mpi etikien. Keara vear ane watsi nding vim a nda ne viya ili pipi." ¹⁶ Kansi Yezu atuba nda wo ndenden: "Peagni wo vim a nda gnu gnemie." ¹⁷ Watuba wuwun: "Nendien sili ko na mampaitean ti nse ipe." ¹⁸ Yezu atuba ndenden: "Onjiagni wog nendien." ¹⁹ Yezu s'akabinde oluy o vear anagn na gneme ne dzug adjiu. Avey mampa itean ti nse ipe inagn, ajir viy dzug, asakumuna mampa iwo, abag itign-itign. Mby s'apiinde walongoki inde, wo s'akabuli wo ya oluy o vear anagn. ²⁰ Wala wankum, wayur. Imwama djum n'ipe isashuna ngiyuo to. ²¹ Vear ayili ayiwo etitign e awugu atean, yug okatanga ankear ti aman. ²² Ne mby ewo, Yezu atuba nda walongoki inde na nkwuna ne war, watsi nky emuu egni, djwi nde, atosakeara vear anagn viya ewo. ²³ ntangu emishir nde nkeara vear ankum, s'avean nde ne dzug ombimi djwi na nsama. Ntangu emilog mpib, atisatsuga ko ndemie. ²⁴ Kansi war ayiwo tikum ne ngnina e vay, egnug n'opepe, djwi opepe ayiwo etikir ne nzey. ²⁵ Osthuu onagn, n'evima, Yezu s'aletshikinde etay eli walongoki inde, alekien ne dzug i nzey. ²⁶ Ntangu emoyen walongoki alekien ne dzug i vay, wayug womo, wuwun: "Ene eli emono," mby s'atsugikiwo elie na womo. ²⁷ Kansi Yezu akaba ndenden: "Yiagni na kikesa, oyayugagni womo ve." ²⁸ Petelo atuba nda nde ndenden: "Nkum, yug eli yie, tuba mpi me, ngi etay eli yie, nkien ne dzug i vay." ²⁹ Yezu ndenden: "Yag!" Mby Petelo s'akr nde ne war, alekien ne vay, aletsu etay eli Yezu. ³⁰ Petelo ntangu emiyen nde opepe, ayug womo. Abana ndina ne ngie e vay, mby s'atsug nde olie: "Nkum, omvugi!" ³¹ Mby Yezu s'akagni nde nshima ewuo, okir, ndenden: "Wur eli na lukwikilu ekieg ene! Amifiyiayie n'itura ipe-ipe djwi na nge?" ³² Ntangu emivean Yezu ti Petelo ne war, opepe mpi eshir. ³³ Mby walongoki iyisatsuga ne war s'afukiminiwo Yezu, wuwun: "Vi-a-vii, oli Mon e Nzeam!" ³⁴ Ntangu emisab wo ne nky, washiem ne Genezarete. ³⁵ Vear anagn ntangu emijiawo Yezu, s'atum wo oshwong etay n'etay, ne viya ili pipi, wayia na vear wur enkum eli na nkeang. ³⁶ Woleama djwi wakir ata nsor eleama ende, mby vear ankum ayikirike s'avugikiwo.