¹ Ntangu emikra Yezu yim dzug ombim, oluy o vear wosodjie. ² Yen, wur emog e nkeang e ndwum ayia, ababa ne nteang ende, ndenden: "Nkum, yug oleang, onkeari djuung ime ikey wuo." ³ Yezu ashima ewuo ende, okir, ndenden: "Ndaleang, djuung iyie ikey wuo." Ko ne ntangu enagn, djuung inde ikea wuo. ⁴ Yezu atuba nda nde ndenden: "Oyakaba ata wur emog ve. Tshwag ne nteang e nganga-Nzambi, pea empeab eyitubi Moize, djwi eyii ntiegn ya vear." ⁵ Ntangu eleshwike Yezu ne wiya e Kapernaum, nkum emog ayer-nkuu ayinde etay ende. ⁶ Oleama ndenden: "Nkum, wur eme otshia ativur n'evuru ali na nkeang entsign, ewuo na ekuu ngibeam." ⁷ Yezu okaba: "Asitsame etay eyie mpi asovuga me." ⁸ Kansi nkum ayer-nkuu okeara: "Nkum, mpikug ve djwi oshwi n'evuru eme, kansi tuba ko djwi imog mpama mpi wur eme otshia asivug nde. ⁹ Djwi me mpi, ndi na wankum ne nteang eme, mpi ndi n'ayer-nkuu ne mby eme. Yug ntituba ya wur emog "tshwag," aletsu, ti ya wur emuu "yag", aleye." ¹⁰ Yezu ntangu emiyug nde vii amituba iyer-nkuu, ayen ngituka entsign, mpi atuba nda vear alosodjike ndenden: "Mokabagni vii-a-vii, ntoyen wur eli na lukwikilu oshin one ve n'Israel. ¹¹ Mokabagni, vear entsign ayayim wo etay epwe vuna ti etay elog vuna, mpi ayayiawo gneme ne mesa ti Abrama, Izaak ti Yakob n'ekub e dzug. ¹² Kansi ankea ekub ayaafanga wo ne mpib nelien, ayayiawo ko aluu ti agnere n'akaag. ¹³ Yezu atuba nda nkum ayer-nkuu: "Tshwag, eyii ko oshin omikwikila yie." Mpi wur ende otshia avug ko ne ntangu enagn. ¹⁴ Ntangu emikum Yezu n'evuru e Petelo, ayen okiu o Petelo ativur na jing. ¹⁵ Yezu okir n'ewuo mpi jing eshir. Mby s'ayiminde mpi apea vim a nda. ¹⁶ Ntangu emijie vuna, s'avariwo vear entsign ali na mpeve ipwo, akma wa mpeve inagn ko n'otuba onde, avuga vear a nkeang ankum. ¹⁷ Ene vii ayitubi ngunsa Ezai: "Ativey wa nkeang isu ti ikom isu." ¹⁸ Yezu ntangu emiyen nde oluy o vear watodjing, s'atubinde wabag nky e nzey e Galilea. ¹⁹ Mby long emog e nsiku ayia mbeama na nde, atuba: "Long, asodjieme etay enkum eyatsayie. ²⁰ Yezu s'okearinde ndenden: "Okieng ali na mpuy, ata wa mfuru ne dzug wali na djib, kansi Mon-wur kakunde ata n'ondii o ntsug ote ve." ²¹ Longoki emog ne kati e walongoki inde atuba ndenden: "Nkum, ompi mbug ntotsa mpfugn tea me." ²² Kansi Yezu okeara ndenden: "Ondani me, sianga edjuu wapfugn edjuu ewo." ²³ Ntangu emivean nde ne war, wa longoki wosodjie. ²⁴ Yenaka opepe oninen ne nzey, vay ashwe ne war; kansi Yezu ayinde ngivur. ²⁵ Walongoki watsa mbeama na nde watuba: "Otevugi, Nkum; siling ngwa!" ²⁶ Yezu atuba nda wo: "Womo e nge elignu na wo, vear a lukwikilu ekieg ene?" Mby ayima angnianga opepe ti nzey; mpi s'ayiwo pwo. ²⁷ Vear wayen ngituka, mpi watuba wuwun: "Wo ene nagn, eli ata opepe, ata nzey walemfuka ya nde?" ²⁸ Ntangu emikum Yezu ne nky, ne buu e wa Gadareniena, ampeam ape ayii na wampeve ipwo wayia etay ende. Ayim wo n'aluma, ayiwo biu kaku mpila, vear walalur, kaku wur eyifilegaka ne mbug enagn ve. ²⁹ Yenaka, s'atsugikiwo elie, wuwun: "Su ti yie djwi iwo nge, Mon e Nzeam? Emiyia yie nendien djwi na ntepea mpay, nshuu iwo iwean itokug?" ³⁰ Itwung i wamvuy ininen alikiwo mbeama na wo kog. ³¹ Entshung enagn s'aleamikiwo Yezu wuwun: "Yug oling ntekma, wuo otetum sishwi n'itwung i wamvuy igni." ³² Yezu atuba nda wo ndenden: "Tswagagni!" Entshung enagn s'apwiwo, watsanshwe n'itwung i wamvuy; yenaka, wamvuy inagn s'alebrimikiwo yim dzug ombim, s'alogikiwo ne vay, s'awiwo. ³³ Vear alelirike wamvuy inagn walur, watsa ne wiya enen, s'akabikiwo vii ankum, ti vii ayileg ya vear ayike na wampeve ipwo inagn. ³⁴ Mby, vear ankum ali ne wiya enen s'ayiiwo etay eli Yezu. Ntangu emoyen wo, woleama na ndim ne buu ewo.