¹ Oyabag ewu e wur emog ve djwi wakobaga yie mpi ewu. ² Djwi, ayabag wo ewu eyie ko n'ewu ebag yie djwi na vear amuu; ayoyer wo yie ko na vim eyer yie vear amuu. ³ Djwi na nge oyen ko efuya eli ne dziy otwung oyie, kansi etign oshung eli ne dziy iyie opiyen wog ve? ⁴ Oshin onkagn esikug yie ntuba ya otwung oyie yeyen: "Sianga molimi efuya ne dziy iyie", yie wur eli n'etign oshung ne dziy? ⁵ Nkea oyang ene! Tolima ntete etign oshung eli ne dziy iyie mby osayen oshin ondima efuya eli ne dziy otwung oyie. ⁶ Oyapeagni vim a santu ya wa mva ve, mpi oyatwomagni ayaga ne nteang e wamvuy ve; djwi wakameara na nkuu, wakakea ntshim etay egnu djwi wakoyaragni itay-itay. ⁷ Wignagni asopeagni wo, lingagni asivea gnu, kokolagni asongamagni wo epfug. ⁸ Djwi, wur esiwigna asopeawo; wur esiling asivea nde; wur esikokola asongama wo epfug. ⁹ Ne kati egnu eli na wur eli, yug mon nde atiwigna etign e mampa, opii itari? ¹⁰ Ata yug atiwigna nse, nde opii ndjwa? ¹¹ Esikwon gnu vear a itura ipwo ojia mpeagni vim a wuo ya aman agnu, mby oshin onkagn Tea gnu eli ne dzug asikwon nde mpea vim a wuo ya vear asowigna nde? ¹² Inkum ileang gnu vear wakii ya gnu, kiagni mpi djwi na wo, djwi enagn eli vii ayitubi nsiku i Moize ti along a wangunsa. ¹³ Shweagni n'epfug e nkaka, djwi epfug enen ti mbug enen evara vear n'ewa; vear entsign walelag mpiog. ¹⁴ Kansi mbug ekieg ti epfug ekieg evara vear n'evug, ko vear itaang washwe mpiog. ¹⁵ Osugagni na wangunsa ipwo, waleye etay egnu watilwer epuy imeme, kansi n'itura iwo, wali wankwiy. ¹⁶ Ayajiakagnu ko n'etshia ewo. Nge, atsawo nkeaga atub a vinu n' atiene? Ata atub a figi n' adjiu atiene? ¹⁷ Oshin omog, oshung onkum o wuo atsande ngwur ko atub a wuo, oshung opwo atsande ngwur ko atub apwo. ¹⁸ Oshung o wuo apitsi nta atub apwo ve, oshung opwo mpi apitsi nta atub a wuo ve. ¹⁹ Oshung onkum opitsi nta atub a wuo ve, ekug wabag, watwomi ne tshiya. ²⁰ Ayajiakagnu wangunsa ipwo ko n'etshia ewo. ²¹ Epa vear ankum amvie "Nkum, Nkum", ayashwewo n'ekub e dzug ve, kansi eli ko wur ekie vii aleang Tea me eli ne dzug. ²² Eshuu ewo, vear entsign ayatuba wo wa me: "Nkum, Nkum, nkabikulaka ne dzin iyie? Sikakmaka entshung ne dzin iyie? Sikakiaka bidimu entsign ne dzin iyie? ²³ Mby ayakabame vi-a-vii: "Mpojiagni ata itaang ve! Limagni mbeama na me, gnu vear alekii ipwo!" ²⁴ Mby, wur enkum eyug vii atubame ane mpi amikie oshin onagn, ayayiande wur e waagn emitwung evuru ende ne dzug itari ininen. ²⁵ Mvuye atiteang, mpiye etiyia mpi opepe etignug evuru ewo; kansi evuru ekalog ve, djwi atwung nde ne dzug itari ininen. ²⁶ Kansi wur enkum eyug vii atubame, ko nde apikii wog ve, ayayiande obwunu emitwung evuru ende ne dzug i zelo. ²⁷ Mvuye atiteang, mpiye etiyia, opepe etignug evuru ewo, enkum etilog otshwag." ²⁸ Ntangu emishir ntuba Yezu vii anagn, vear ankeankum wayen ngituka n'oshin along anagn, ²⁹ djwi alongikinde kamsi wur eli n'ekub, kansi epa kamsi walong i nsiku ve.