¹ Osug oyaleangagni na nkie iwuo ne vy a vear djwi woyenagni, yug kaku opaveagni ifutu etay e Tea gnu eli ne dzug. ² Yug opea makabu ya omva, oyabur oshiem ve, oshin otsankie ankea eyang ne wasinagoga ti n'iyambug, djwi vear wapi lokumu. Mokabagni, vi-a-vii, wativey ifutu iwo. ³ Kansi yug opea makabu ya omva, ewuo eyie e wear epikug njia ve vim ekie ewuo e wum, ⁴ djwi makabu ipea yie ya omva eyii ko n'oziy. Mby Tea yie wur eyen oziy onkum asokeara nde. ⁵ Ntangu esamagnu, oyayiagni kamsi ankea eyang ve, djwi, aleang wo nsama ko oyiyimi ne wasinagoga ti n'akuu a mbug, djwi vear wayen. Mokabagni, vi-a-vii, enagn wativey ifutu iwo. ⁶ Kansi yie, yug osama, shwe neti evuru, dzub epfug, sama Tea yie eli n'ondii oziy; mby Tea yie eyen vii ankum oziy asopea nde. ⁷ Mpi ntangu esamagnu, oyatubagni ituba-tuba ve, oshin otsankie empaagn, atsawo mbansa yug olatuba entsign mby Nzeam ayug bisamu iwo. ⁸ Oyakiagni kamsi wo ve, djwi Tea gnu ajia vim elignu na wo mfunu ne nteang e nding ya nde. ⁹ Liragni oshin ofwete gnu nsama: "Tea su oli ne dzug! Dzin iyie iyii santu; ¹⁰ ekub eyie eye; ileang yie wakii ne buu kamsi ikiewo ne dzug. ¹¹ Otepii lwo vim asu anda a nshuu na nshuu. ¹² Lolula ipwo isu kamsi elolula su ipwo atwung asu. ¹³ Oyatetum ne mpukumuna ve, kansi otelimi n'ewuo e wur epwo. Djwi ya yie, mvwe na mvwe, oli n'ekub, na biu, na nkembo. Amen! ¹⁴ Yug olololagni vear ipwo iwo imokiagniwo, Tea gnu eli ne dzug asololulagni nde mpi; ¹⁵ kansi yug okalolulagni vear ipwo iwo imokiagniwo ve, Tea gnu eli ne dzug mpi apololulagni ve ipwo ignu. ¹⁶ Yug oknagni okio, oyayiagni ngy-ngy n'ilung ve kamsi etsankie ankea eyang, djwi vear wayen wuwun watikn okio. Mokabagni, vi-a-vii, enagn wativey ifutu iwo. ¹⁷ Kansi yug okie okio, siaba awuu ayie, suy elung eyie, ¹⁸ djwi vear wakwon njia wuwun olakn okio, kansi yegne ya Tea yie eli n'ondii oziy, mby Tea yie wur eyen vii ali n'oziy asopkeara nde. ¹⁹ Oyawumagni otsun ognu ne buu ene ve, djwi asitawo ntey, ndjiere asilawo, ankea vimu asishwewo, asikamawo. ²⁰ Wumagni otsun ognu ne dzug, djwi mpiog, ipayata ntey ve, ndjiere ipayala ve, ankea vimu wapayashwe wapayakama ve. ²¹ Djwi, ondii oli otsun oyie, etura eyie mpi eli ko neti. ²² Dziy eli mwinda e djuung. Yug dziy ili wuo, djuung iyie inkum asiyiawo yele. ²³ Kansi, yug dziy ili ipwo, djuung inkum ili ne mpib! Yug mwinda eli ya yie eli mpib, mpib ewo si asiyiawo e biu! ²⁴ Kaku wur esikug ngya n'ankum ape ve: asitun nde emog, aleang emuu, to asilemfuka nde nda emog, emuu egni asoyen nde mpama. Opikug ngyagni vear otshia e Nzeam ti ekri ne ntangu emog ve. ²⁵ Wog enagn, mokabagni: oyayenagni mpay djwi na luzingu egnu, djwi na nge esilagnu, nge esignuagnu, ata djwi na djuung ignu, nge esilwergnu. Luzingu epa elenga vim a nda ve, mpi djuung ignu epa elenga ileama ve? ²⁶ Liragni wamfuru ne dzug! wapifuy ivur ve, wapiwum vim n'iteang ve, kansi eli Tea gnu ne dzug alapii vim anda. Opilengagni wamfuru ve? ²⁷ Nagn ne kati gnu ne mabansa inde esiyika ivim otey e luzingu ende? ²⁸ Mby djwi na nge eleyen gnu mpay djwi na ileama? Toliragni bintuntu n'evur oshin ofuye wo; ipikii ata otshia ve, ipitwung ileama ve. ²⁹ Kansi mokabagni, ata Salomono na nkembo eyiinde na wo akalwer ileama kamsi bintuntu inagn ve. ³⁰ Yug Nzeam alwer ekaya eli n'evur oshin onagn lwo, nampign watwomi ne tshiya, mby asikwon nde n'ondweragni gnu, vear a lukwikilu ekieg ene? ³¹ Oyafiyenagni mpay ve na ntuba gnugnun: "Nge esilasu? to nge esignuasu? to, asilwersu nge?" ³² Vim anagn, eli empaagn vear atsanding; Tea gnu eli ne dzug ajia vim elignu na wo mfunu. ³³ Tolingagni nteang-nteang ekub ende ti vii a wuo aleang nde; mby vim amuu ankum anagn asosande opeagni. ³⁴ Oyayenagni mpay ve djwi na nampign, djwi mpay i nampign ayayiawo ko nampign. eshuu n'eshuu eli na vii a nde.