¹ Yezu ntangu emiyen nde oluy o vear anagn, s'avean nde ne dzug ombim; emigneme nde, walongoki inde wavanga mbeama na nde. ² Mby, angama odzum, s'alongikinde ndenden: ³ "Osiang ya vear ali emva ne mpeve, djwi ekub e dzug eli ya wo. ⁴ Osiang ya vear aliye, djwi ayasiama wo! ⁵ Osiang ya vear ali pwoo, djwi ayasawo vea oleama- nzo e buu! ⁶ Osiang ya vear ali na nziya ti mpuy e nkie vii a wuo, djwi ayayur wo! ⁷ Osiang ya vear ayug atwung ngy, djwi Nzeam ayayug nde ngy. ⁸ Osiang ya vear amisuy itura iwo, djwi ayayen wo Nzeam! ⁹ Osiang ya vear aleang ngemba n'ondii oli wo, djwi ayaviewo aman a Nzeam! ¹⁰ Osiang ya vear alepiwo mpay djwi na vii a wuo alekiwo, djwi ekub e dzug eli ya wo! ¹¹ Osiang ayayiawo ya gnu, yug vear walotweagni, walopiagni mpay, to walobeamagni vii oyang ti vii apwo djwi na me. ¹² Yiagni n'osiang, djwi ifutu ignu ayayia wo ininen ne dzug; djwi wangunsa iyii nteang egnu, vear apiiwo mpay ko oshin onagn. ¹³ Olagni okwa ne buu; kansi yug nsa okwa etishir, asikearawo nsa ewo na nge? Kaku diaka na mfunu ewo ve, asifanga wo ko nelien mby vear wameari na nkuu. ¹⁴ Olagni mwinda ne buu, wiya emitwung wo ne dzug ombim epitsi nzuba ve. ¹⁵ Mpi wapitsi mpiey mwinda djwi watsug ne ngie e esag, kansi asiler wo ne dzug djwi epii oveanga ya vear ankum ali n'evuru. ¹⁶ Wog enagn, mwinda egnu mpi epiey ne nteang e vear, djwi wayen etshia egnu e wuo, mpi wapi Tea gnu eli ne dzug lokumu. ¹⁷ Oyabansagni ve gnugnun ntiyia ndjag wansiku to along a wangunsa; ntoyii ndjag wog ve kansi ntiyia djwi na vii awo akug. ¹⁸ Vi-a-vii, mokabagni, yug olung na buu ene eliko, kaku ata imon i vim emog e kieg eyalima wo ve, tii ko eyakug vii ankeankum. ¹⁹ Wur eyalima nsiku ekieg, eyalong vear amuu na nkie oshin onagn, ayovie wo imon ilieng n'ekub e dzug; kansi wur eyawum nsiku iwo mpi along ya vear amuu na ngwum wog, ayovie wo wur eninen n'ekub e dzug. ²⁰ Mokabagni, yug okalengagni walong i nsiku ti wafarize na nkie vii a wuo, opashweagni n'ekub e dzug. ²¹ Ayug gnu atubiwo ya antsur wuwun: "Oyadjag wur"; "wur esidjag otwung, ekug wuo vear abag ewu wopi ndola." ²² Kansi me, mokabagni memen wur eyayug nkier nda otwung onde ekug wuo wopi ndola ya vear abag ewu; mpi wur eyatuba nda otwung onde: "Yie, oli wur e mpama!" ekug wuo avey ndola ne nteang e ankum a waYuda; mpi wur eyatuba nda otwung onde: "Oli obwunu!" ayavey nde ndola e tshiya e bilungi. ²³ Yug oletsu mpea makabu iyie ne kunda, emikum yie neti, otikana yeyen otwung oyie ali na djwi nda yie, ²⁴ tosaky makabu iyie ne nteang e kunda, tshwag otokie ngaagn ya otwung oyie, mby oye mpea makabu. ²⁵ Yug wur atofugn, kagn nkie ngaagn eveang- eveang ya nde ne mbug eletshignu, yug kaku wur enagn asopeande n'ewuo e wur ebag vii, wur ebag vii asopeande ya mpoluy, mpi asotwomo nde ne bolog. ²⁶ Mokaba vi- a- vii: opapwe ve yug okashir mbie ekri enkum. ²⁷ Ayug gnu atubiwo: "Oyakie itaay ve." ²⁸ Kansi me, mokabagni memen wur esilir wear e wur n'oshin o mvur ti nde, atikie itaay nda onkear onagn neti etura ende. ²⁹ Yug dziy iyie iwum elotum na nkie masumu, keaga dziy inagn, fanga etey na yie; kansi epa djuung opfugn etsi ntu ne bilungi ve. ³⁰ Yug wum eyie ewuo elotum na nkie masumu, bag, fanga etey na yie; djwi wuo etign eyie e djuung etsi ntu kansi epa djuung opfugn etsi ntu ne bilungi. ³¹ Atubiwo mpi wuwun: "Yug wur aling nsianga wear nde, ofugni onkean e ndjag ivea." ³² Kansi me, mokabagni, wur enkum esisianga wear nde yug akakie itaay ve, enagn alatum wear nde ne mbug e itaay; ompeam onkum esisatsug onkear onagn mpi atikie itaay ti nde. ³³ Ayug gnu diaka atubiwo ya antsur asu: "Oyakie lusilu oyang ve, kansi kie vim emisila yie ne nteang e Nzeam." ³⁴ Kansi me, mokabagni: Oyasilagni ne dzin olung ve, djwi olung eli nkway ekub e Nzeam, ³⁵ ata ne dzin i buu kaku, djwi buu eli ondii emitsug nde nkuu; ata ne dzin i Yeruzalem djwi eli wiya e Vwi enen. ³⁶ Oyakie lusilu ata n'ote oyie ve, djwi opikug ve na ntshima iwuu ote emog ekum siy to por. ³⁷ Ntangu etubagnu, otuba ognu eyii e masonga, yug eli oshin onagn, tuba "Eli oshin onagn", yug mpi epa eli oshin onagn, tuba "Epa eli oshin onagn." Imuu isisa yie yika enagn eyim ya satana. ³⁸ Ayug gnu atubiwo: "Dziy na dziy, dzin na dzin." ³⁹ Kansi me, mokabagni: oyakearagni ipwo n'ipwo ve. Yug wur atonang mbata n'itam i wum, peande ti itam i wear. ⁴⁰ Yug wur aling omfugn, djwi avey onkur oyie, peande ti kazag eyie. ⁴¹ Yug wur atotum na biu n'omvara odzuru kilometele emog, yie kie kilometele ipe ya nde. ⁴² Wur esolinga vim, peande; oyatun nshomo vim ya wur eling na nshom nda yie ve. ⁴³ Ayug gnu atubiwo: "Leang otwung oyie, tun mbeni eyie." ⁴⁴ Kansi me, mokabagni: Leangagni wambeni ignu mpi sakumunagni vear aloshingagni, kiagni vii a wuo ya vear alotunagni, samagni djwi na vear alopiagnigni mpay, ⁴⁵ mby okumagni aman a Tea gnu eli ne dzug; djwi, atsande mpur vuna djwi na vear apwo ti vear a wuo, atsande nteang mvuye mpi djwi na vear apwo ti vear a wuo. ⁴⁶ Yug atsagnu ndeang ko vear atsondeangagni, ifutu nge eyavea gnu? Ata vear a mpaku atsawo nkie oshin onagn. ⁴⁷ Mpi yug mbea atsagnu mpea ko atwung agnu, djwi i wuo nge emikiegnu? Ata empaagn mpi wapitsi nkie oshin onagn? ⁴⁸ Yiagni vear akwon bifu kamsi Tea gnu ne dzug akwon bifu.