¹ Mby Mpeve avara Yezu ne buu e ndzum djwi ontshung aling oshin omeka. ² Ne mby emikie nde okio nshuu onign ti etshuu onign, s'ayug nde nziya. ³ Ontshung avanga mbeama na nde, atuba nda nde ndenden: "Yug oli Mon e Nzeam, tuba ya atari ane akum mampa." ⁴ Kansi Yezu okeara ndenden: "Wamifugn wuwun: 'Wur apayavugaka ko na mampa ve, kansi n'otuba onkum opwe n'odzum o Nzeam.'" ⁵ Mby ontshung ovara ne wiya e santu, otsug n'ondii e dzug- dzug e tempelo ⁶ atuba ndenden: "Yug oli Mon e Nzeam, log ne buu; djwi wamifugn wuwun: 'Asitum nde banzio inde djwi na yie, asovara wo ne mbwo iwo djwi okabiye ekuu n'itari.'" ⁷ Kansi Yezu okeara ndenden: "Wamifugn mpi ne onkean wuwun: "Opikug mpea mpukumuna ya Nkum Nzeam eyie ve." ⁸ Ontshung s'okeynde omvara n'ondii omog eli dzug- dzug, oyegne ikub inkum ili ne buu ti osiang owo. ⁹ Atuba nda nde ndenden: "Asopeame vim ane ankum, yug omibaba ne nteang eme, omimfukimina." ¹⁰ Mby Yezu okaba ndenden: "Lim nendien, Satana! Djwi wamifugn n'onkean wuwun: "Ayafukimina yie ko Nkum Nzeam eyie mpi ayakie yie ko otshia onde ndemie." ¹¹ Mby ontshung s'osiangi nde, yenaka banzio wayia mby s'akikiwo otshia djwi na nde. ¹² Ntangu emiyug Yezu ndenden watitshung Yoane, s'atshinde ne Galilea. ¹³ Alim ne Nazarete atsa mpier ne Kapernaum eli mbeama na nzey e Galilea, etitign e buu e Zabuloni ti Neftali. ¹⁴ Enagn akum wo djwi vii ayitubi ngunsa Ezai ekug: ¹⁵ Buu e Zabuloni ti e Nephtali, eli mbeama na nzey enen, ne nky e nzey e Yordani ti Galilea, viya e wa empaagn. ¹⁶ Vear ayiike ne mpib watiyen oveanga eninen; ti vear ayipierike ne buu e mpib, mbeama n' ewa, watiyen yele." ¹⁷ Yim kog, Yezu abana ndong ndenden: "Tshimagni itura ignu, djwi ekub e Nzeam etikum pipi." ¹⁸ Ntangu elekienikinde n'ikri i nzey e Galilea, ayen atwung ape, Simoni eviewo Petelo ti okwom nde Andre. Atwomikiwo oshing ne nzey, djwi ayiwo vear alob nse. ¹⁹ Yezu atuba nda wo ndenden: "Yagagni, onsadjiagni me, asosongagni me, asikum gnu vear alob vear." ²⁰ Ko ne ntangu enagn, wasasugn eshing ewo mby s'osawodjie. ²¹ Yezu, ntangu eletshikinde ne mbug, akeangyen atwung ape amuu, Jaki nda okwom nde Yoane, aman a Zebede. Ayiwo ne war ti tea wo Zebede; wawong eshing ewo. Yezu s'avinde. ²² Ko ne ntangu enagn, wasasugn tea wo ne war mby s'osawodjie. ²³ Yezu alekienikinde ne buu e Galilea enkum, alelong ne wasinagoga iwo, alelongikinde vii a ekub e Nzeam mpi alevugi vear a nkeang eshin n'eshin ti vear ikom. ²⁴ Esiang ende s'apagn wo ne buu e Siria enkum mby vear s'alojikiwo vear ankum ayike na nkeang eshin n'eshin, ti vear ali na wampeve ipwo, ti nkeang ompay, ti vear amibeam wo mbwo na nkuu; mby Yezu s'alavugikinde. ²⁵ Oluy o vear s'alosakawodjie, vear ayim Galilea, yim Dekapole, yim Yeruzalem, yim Yudea ti ayim ne nky e nzey e Yordani.