¹ Ne nshuu inagn, Yoane Mbotiki apwinde, alelong ne buu e ndzum ne Yudea ndenden: ² "Tshimagni itura ignu, djwi ekub e Nzeam etikum pipi." ³ Yoane ali wur eyiitubi ngunsa Ezayi ndenden: "Ene eli otuba e wur edzama ne buu e nzum: Wongagni mbug e Nkum, shimagni mbug inde inkeankum." ⁴ Yoane alwerikinde ileam epuy e gnam eviewo shamo ti okaba n'ikini inde. Alikinde ko abampay ti mpag. ⁵ Mby vear a Yeruzalem, vear ankeankum a Yudea ti wa viya ili mbeama na nzey e Yordani atshikiwo etay ende. ⁶ Apiikinde mbotika ne nzey e Yordani, aletsugikiwo mfunguna djwi na masumu iwo. ⁷ Kansi ntangu emiyen nde wafarize entsign ti wasaduse waleye etay ende djwi wavey mbotika, atuba nda wo ndenden: "Gnu, atshwe ane, nagn emokabagni na ndur nkier i Nzeam ileye ene? ⁸ Kiagni ko vii a wuo ekab wuwun omitshimagni itura. ⁹ Oyatubagni n'odzum gnugnun: "Abrama ali tea su" djwi, mokabagni, Nzeam akug na mpur aman Abrama ata ne atari ane. ¹⁰ Ishwa iwean, waling mbag eshung n'edzuu. Oshung onkeankum opipur atub a wuo ve, asibag wo wafangi ne tshiya. ¹¹ Mopeagni mbotika e vay djwi na ntshima itura. Kansi wur eleseye ne mby eme andenga na biu, mpikug na ndwer antwum ande. Ayopeagni nde mbotika e Mpeve- Santu ti e tshiya. ¹² Ali na onungu n'ewuo, ayashieng nde, ason antu, atsug wog n'esag, mby mfuya ayabwo nde ne tshiya epikug wo ndzum." ¹³ Mby Yezu ayim Galilea, akum etay e Yoane djwi na mvey mbotika ne nzey e Yordani. ¹⁴ Kansi Yoane akaleangaka n'ompea mbotika ve, ndenden: "Me, ekug yie ompi me mbotika, kansi yie olefeye etay eme?" ¹⁵ Yezu okeara ndenden: "Sianga eyi ko oshin onagn djwi vii aleang Nzeam ekug." Mby Yoane akafitun ve. ¹⁶ Ne mby emivey nde mbotika, Yezu apwe ne vay, olung s'angam wo. S'ayen nde mpeve e Nzeam eleye nkra kamsi nkodima, eyia nkuba ne dzug inde. ¹⁷ Otuba omog oyim dzug etuba ngean: "Yenagni Mon me e nsiya. Mitsug osiang enkeankum ya nde."