¹ Emiwur wo Yezu ne Betleem ne buu e Yudea, ne nshuu iyii vwi Erodi, vear alirike vii a weer ayim wo etay epwe vuna wakum ne Yeruzalem, watuba wuwun: ² "Vwi e waYuda emiwur wo ali nonkagn? Sitiyen weer ende etay epwe vuna, mby s'amiyia su n'omfukimina." ³ Ntangu emiyug vwi Erodi vii anagn, na nde, na vear ankum a Yeruzalem, waagn eshir n'ontwong. ⁴ S'avinde ankum a wanganga- Nzambi, ti vear afugn wansiku, aywe ndenden: "Wafwete ngwur Kristu nonkagn?" ⁵ Wokeara wuwun: "Ne Betleem ne buu e Yudea, oshin oyifugn ngunsa ndenden: ⁶ "Yie Betleem, buu e Yudea, epa oli wiya emog ekieg ve ne kati e wa viya inen i Yudea, ogniang ne kati eyie, nkum emog ayapwe nde, ndug wur eyavara vear ame Israel." ⁷ Mby, Erodi s'aviinde vear alir vii a weer anagn n'oziy, aywe ntangu enkagn eyipwi weer enagn. ⁸ S'atum nde Betleem, ndenden: "Tshwagagni, liragni wuo- wuo ondii oli mon ewo. Yug omoyenagni, mby onkabagni djwi me mpi ntsi mfukimina mon ewo." ⁹ Ntangu emiyug wo vii amituba vwi, wakea nkir mbug wakien, mby weer eyiyen wo etay epwe vuna wean eletsu nteang ewo, etsa ngyima ne dzug ondii emiwur wo mon. ¹⁰ Ntangu emiyen wo weer enagn, ayiwo n'osiang entsign. ¹¹ Washwe n'evuru mby wayen mon ti mea nde Maria. Wababa mby s'ofukiminiwo. Wangama ateang awo mby s'opiiwo makabu, ayiwo: wolo, atsa ti vir a mira. ¹² Nzeam akaba ne ndoy na nkwon nkea ntsa etay eli Erodi; mby s'akey wo ntsa wiya wo ne mbug emuu iky. ¹³ Ntangu emikien wo, wanzio emog e Nzeam apwe Yozefo ne ndoy, ndenden: "Biy, vey mon ti mea nde, luragni ne buu e Ejipiti. Yiagni ko mpiog tii ko ntangu eyayiame onkaba na nkea djwi Erodi asisande ling mon djwi n'ondjag." ¹⁴ Otshuu onagn, Yozefo s'ayiminde, avey mon ti mea nde s'atshiwo Ejipiti. ¹⁵ Asatsuga mpiog tii ko ewa e Erodi. Ene vii ayitubi Nkum nda ngunsa ekug: "Ntivie Mon me na mpwe nelien e Ejipiti." ¹⁶ Ntangu emiyen Erodi ndenden vear atsandir vii a weer watodjim, ayug nkier entsign. S'atum nde vear djwi na ndjag aman alieng ankum ampeam ne Betleem ti ne viya ili mbeama na wo, ali na mvwe ipe tii ngie, ne nshuu iyokabi vear alir vii a weer. ¹⁷ Ene eli vii ayitubi ngunsa Jeremi etikug: ¹⁸ "Watiyug elie ne Rama, aluu ti nzearu: Rashel aliye aman ande, atun vear osiama wo, djwi aman ande ankeankum watishir." ¹⁹ Ntangu emiwa Erodi, wanzio e Nzeam akea mpwe Yozefo ne ndoy, n'Ejipiti, okaba ndenden: ²⁰ "Vey mon ti mea nde, yima, kea ntsa ne buu e Israel djwi vear ayilingike na ndjag mon wamiwaka." ²¹ Yozefo ayima, avey mon ti mea nde s'akey wo buu e Israel. ²² Kansi ntangu emiyug nde ndenden Arkelausi atisavey ekub ne buu e Yudea n'ondii o tea nde Erodi, ayug nde womo na ntsa mpiog. Mby ntangu emokaba Nzeam ne ndoy, s'atshinde buu e Galilea, ²³ ne wiya enen eviewo Nazarete. Vii ayitubi wangunsa akug wo, wuwun: "Ayoviewo wur e Nazarete."