¹ Emikeam vuna, ankum a wanganga-Nzambi wankum ti antsuru a waYuda washwe mpfug djwi na ndjag Yezu. ² Wotshung nkori, wovara mpi wopea ne mbwo i nkum Pilato. ³ Mby, Yudasi wur eyosar, ntangu emiyen nde ewu emibag wo Yezu, akea ntshima etura atsa nkeara akutu osar enagn ya ankum a wanganga-Nzambi ti antsuru a waYuda, ⁴ ndenden: "Ntikie disumu, ntisar aluung a wur epijia ata djwi." Kansi wa nde wuwun: "Epitelir ve. Olwon oyie." ⁵ Mby s'afangi nde akutu osar enagn neti e tempelo, s'apwinde, atsa nder okori. ⁶ Ankum a wanganga-nzambi s'avey wo ekri enagn, wuwun: "Ne nsiku epa eli wuove na ngwum ekri ene n'iteang i su, djwi ene eli ekri aluung." ⁷ Wankum ondii omog, s'avey wo nginu, washum wo evur n'ekri ewo djwi na mpfugnaka angingien. ⁸ Wog enagn, s'asawoviaka evur enagn tii n'eshu e lwo ene: "Evur e aluung." ⁹ Mby vii ayiikab ngunsa Yeremia s'akug wo, ndenden: "Avey wo akutu osar, isuu iyileang aman Israel ¹⁰ s'apiiwo djwi nshum evur, oshin oyiitubi Nkum nda me." ¹¹ ntangu opeane, s'avariwo Yezu ne nteang e nkum, oyue: "Oli vuy e waYuda?" Yezu okeara ndenden: "Otituba." ¹² Kansi ne vii ankum ayofugnike ankum a wanganga-Nzambi ti antsuru, akafikearaka ve. ¹³ Mby Pilato atuba nda ndenden: "Nge opiyug vii ankum ofugn wo ene?" ¹⁴ Kansi nde, akafikearaka ata djwi imog ve, nkum enagn ayen ngituka entsign. ¹⁵ Yenaka, ne konso okina, nkum asiangikinde wur emog e bolog, wur esison vear ankum na mpwe. ¹⁶ Ne ntangu enagn, ayiwo na wur emog e bolog, vear ankum ojiiwo, dzin inde Barnabasi. ¹⁷ Mby, ntangu eliwowankum ondii omog, Pilato ayue: "Nagn eleang gnu mopur? Barnabasi go Yezu eviewo Kristu?" ¹⁸ Djwi nde, ajikinde ndenden watifugn Yezu ko n'etura ikworo. ¹⁹ Ntangu eyiignemikinde ne nkway ondii osamawo vii, wear nde otuma djwi ndenden: "Osug, oyakie djwi imogve ya wur enagn, apijia ata djwi ve, djwi ntiyen mpay ne ndoy lwo ko djwi na nde." ²⁰ Mby nkum e wanganga-Nzambi ti antsuru wakaba vear angn djwi waleang na mpur Barnabasi mpi djwi wadjag Yezu. ²¹ Nkum ayue: "Enkagn eleang gnu mopuragni?" Watuba wuwun: "Barnabasi." ²² Pilato ayue: "Mby nki esing na Yezu eviewo Kristu?" Wakeara wankum wuwun: "Kwog nde ne kulunsi." ²³ Mby atuba: "Djwi na nge? Ipwo nge emikiende?" Wakeanzama na biu wuwun: "Kwog nde ne kulunsi." ²⁴ Mby Pilato ayenndenden kaku oshin omuu esikiende ve, oyug ebana, s'avey nde vay, asuy mbwo indene nteang e oluy o vear anagn ndendn: "Kaku me na djwi ve n'aluung a wur epijia ata djwi ine. Liragni vii awo gnemie." ²⁵ Vear ankum wuwun: "Aluung ande asalog n'ote esu ti aman asu." ²⁶ Mby s'apurnde Barnabasi, asatum vear na nang Yezu akoy, s'opiinde ne mbwo iwo djwi wodjag ne kulunsi. ²⁷ Mby ayer-nkuu a nkum enagn wavara Yezu neti opeang, watsug ayer-nkuu inkum ondii omog. ²⁸ Wopuba ileama inde, wosolwer olobo e kwi. ²⁹ Watwung impu atiene, wolwern'ote, wopea ikom ne wum ewuo. Wafukama ne nteang ende, waywe two wuwun: "Vuy e waYuda, mbea!" ³⁰ Mby wotwaga asuy, wavey oshung wonang n'ote. ³¹ Ntangu emoshir wo ngyue two, wopuba eleama enagn, wokeara ileama inde ne djuung, mby s'ovarikiwo djwi watsi onkwog ne kulunsi. ³² Ntangu emipwe wo, ayen wur emog e Syreni, dzin inde Simoni, wokaba na ntsa ti wo djwi afwete mvara kulunsi. ³³ Wakum n'ondii omog dzin iwo Golgotha, elatuba wuwun: "Ondiie ebaay ote." ³⁴ Wopea na gnua veana watitshib na vay oluu; kansi ntangu emisy nde, atun na gnua. ³⁵ Ntangu emokwog wone kulunsi, wabug dzeke djwi ileama inde wakii akab-akab; ³⁶ wagneme, wosolir ko nde. ³⁷ Djwi na nkab itsin i djwi imodjag wo, s'afugn wo ne dzug inde ote: "Ene Yezu, vuy e waYuda." ³⁸ Wakwog ti ankea vimu ape ne kulunsi mbeama na nde, emog ne wum ewuo, emuu ne wear ewuo. ³⁹ Vear aleleg walotwi walegnug ete ewo ⁴⁰ wuwun: "Yie wur eyiitubike yiyen asibvuo yie tempelo, okey ntwung wog ne nshu isar, vugaka yemie! Yug oli Mon e Nzeam, kr ne kulunsi!" ⁴¹ Ankum a wanganga-Nzambi, walong i nsiku ti antsuru a waYuda woyue two, wuwun: ⁴² "Avugikinde ko vear amuukansi ndemie apikug mvug ve. Ali vuy e Israel, atokraka yim ne kulunsi mby s'odjir. ⁴³ Adjir ya Nzeam, atubikinde: 'Ndi Mon e Nzeam.' Nzeam aye olimike opeane." ⁴⁴ Ata ankea vimu amikwog wone kulunsi ti nde, otwikiwo. ⁴⁵ Opeane, yim ko ntangu djum n'ipe tii ko ntangu isar opiyekwo, mpib elog ne buu enkum. ⁴⁶ Ne ntangu isar opiyekwo, Yezu adzama olie na biu, atuba: "Eli, Eli Lama sabachthani?" Etuba: "Nzeam eme, Nzeam eme, djwi na nge eminsianga yie me?" ⁴⁷ Ntangu emiyug vear amuu ayiike kog, wuwun: "Alavie Elia." ⁴⁸ Etean kaku, emog ne kati ewo akim, atsamvey etay eleama, atsug vay ongnign, aler n'oshung, apea Yezu djwi na gnua. ⁴⁹ Amuu s'atubikiwo: "Sianga nde, sitolir yug Elia asiyiande omvuga." ⁵⁰ Yezu akea ntsug olie na biu, mby s'asug nde egnim. ⁵¹ Yenaka, eleama eyidzubike ne mbwung e tempelo eyayyim dzug tii ngie. Buu egnug, atari ayay. ⁵² Wankr n'aluma ingam, mby djuung i wasantu iyipfugn wo ikeambiy n'ewa. ⁵³ Wapwe ne wankr iwo ne mby eyifutumuki Yezu, washwe ne kati e wiya enen e santu, vear entsign ayen wo. ⁵⁴ Nkum ayer-nkuu ti vear ayisalirika Yezu, ntangu emiyen wo buu etignug ti vii ankum amileg, wayug womo entsign, wuwun: "Vi-a-vii, wur ene ayiinde Mon e Nzeam," ⁵⁵ Ankear entsign ayiisadjiyaka Yezu djwi n'onsarisa yim ko Galilea, asakawolir ko etey. ⁵⁶ Ne kati ewo, ayiwo Maria e Magdala, Maria mea e Jaki ti Yozefo, ti mea aman a Zebede. ⁵⁷ Ntangu emijie vuna, nkea otsun omog e Arimate ayia, dzin inde Yozefo. ⁵⁸ Avanga mbeama na Pilato mby s'awigninde djuung i Yezu. Pilato s'apiinde mbug djwi avey. ⁵⁹ Yozefo s'avey nde djung inde, adzub eleama e wuo ⁶⁰ atsampfugn n'aluma ande ndemie, empa, atsum nde wog n'atari. Mby asadzub itari ininen ne mbwung ewo, s'akien nde. ⁶¹ Maria e Magdala ti Maria emuuegni ayiwo kog, watigneme, walir etay eli aluma. ⁶² Mpimpign enagn, eshu eyii ne mby eshu ewong wo okina, ankum a wanganga-Nzambi ti wafarizewayia ondii omog ti Pilato. ⁶³ Watuba wuwun: "Nkum, sitikana susun nkea oyang ene, ntangu eyii atowe ve, atubinde: "Ne mby e nshu isar, ayakeame mbiy n'ewa." ⁶⁴ Pea mbug vear walirike aluma tii ko eshu otatu. Yug kaku, walongoki inde asikug wo ntsa ndima djwi wakabi vear wuwun: "Atikeambiy ne kati e bafwa," oyang e mbala enagn asilenga wo enteang." ⁶⁵ Pilato atuba nda wo ndenden: "Veyagni ayer-nkuu. Tshwagagni olelirakagni n'oshin onkum." ⁶⁶ S'atshiwo ndiraka nkr ewo, watsug kidimu n'iwe iyidzub wo ne nkr.