¹ Ntangu emishir ntuba Yezu vii anagn, atuba nda walongoki inde ndenden: ² "Ojiagni Pake etisatsuga ko nshu ipe, ayasar wo Mon-wur djwi wodjag ne kulunsi." ³ Mby antsuru a wanganga-Nzambi ti antsuru a waYuda washwe mpfug n'opeang e Kaifa, nkum e wanganga-Nzambi. ⁴ S'alingikiwo oshin o ntshung Yezu n'oziy djwi wodjag. ⁵ Djwi atubikiwo wuwun: "Ekwon ngya eshu okina, djwi walelur vear wakakie oyug." ⁶ Yezu ayikinde ne Betania n'evuru e Simoni nkea ndwum, ⁷ ntangu elikinde, onkear omog ayia ondii oli nde n'ilongo ananagn a nsuu eli isuu i dzug; mby omwang n'ote. ⁸ Kansi ntangu emiyen walongoki oshin onagn, wayug nkier wuwun: "Djwi na nge epiy nde ngean? ⁹ Ananagn a nsuu ane anakug su nsar n'isuu i dzugmby sipii ekri ewo ya ankea emva." ¹⁰ Kansi Yezu ntangu emijiande, atuba nda wo ndenden: "Djwi na nge epeagnu onkear one mpay? Atikie vim emog e wuo djwi na me. ¹¹ Ntangu enkum ayayiakagnu ti ankea emva, kansi me, mpayiaka ti gnu ntangu enkum ve. ¹² Ntangu emimwang nde ananagn a nsuu ane ne djuung ime, atikie djwi n'oshin oyampfugn wo me. ¹³ Mokabagni vi-a-vii, etay enkum eyalongaka wo oshwong o wuo one ne buu opfugn, ayakabakawo vii amikie onkear one djwi n'onkanaka nde." ¹⁴ Emog ne kati ewo djum n'ipe, dzin inde Yudasi Iscarioti, atsa etay eli wanganga-Nzambi ¹⁵ ndenden: "Nge esimpeagnu yug m'osaragni nde?" Wayer akutu osar djwi na nde. ¹⁶ Yim kog enagn, s'alelingiki nde itsin i djwi nge esosar nde. ¹⁷ Eshu e nteang elawo mampa ikwon ete, walongoki watuba wa Yezu wuwun: "Oleang siwong djwi na yie okina o Pake nonkagn?" ¹⁸ Akeara ndenden: "Tshwagagni ne wiya enen ya wur emog, kabagni nde gnugnun: "Nkum atuba ndenden: 'ntangu eme etivanga. nding ngya nda olio o Pake ti walongoki ime n'evuru eyie.' " ¹⁹ Walongoki wakie mpi ko oshin oyitubi Yezu, mby s'awong wo olio o Pake. ²⁰ Epiekuo, ayinde ne mesa ti wa longoki djume n'ipe. ²¹ Ntangu eyilikiwo, atuba: " Mokabagni e vi-a-vi emog ne kati e gnu asinsar nde." ²² wankum wayia ngy-ngy wur na wur abana na djue: Nkum nge eli mug? ²³ Akeara: wur emitsug ewuo nda me n'ilong'o eli ndug enagn esinsar. ²⁴ mon e wur ayatsa nde otshin emifugn wo djwi nde. Kansi mpay ya wur eyosar! Wur enagn wuo ko anakuon woongur. ²⁵ Yuda, eyiling n'onsar, atuba: "Nkum nge eli me"? Okeara: " Yemien otituba". ²⁶ Ntangu eyilikiwo, Yezu avey mampa, ala sakumuna, mpi abag itign-itign. Apea na wa longoki ndenden: "veyagni mpi lagni. Ene eli djung i me." ²⁷ Avey nkeni i vinu mpi akeara nsag-la-vie ya Nzeam. Alapea ndenden; " Ngnuagni, gnankum; ²⁸ Djwi ene eli alung a me, angagn eyipay djui na vear entsign, djwi na ndolola e masumu. ²⁹ Kansi mokabagni, mpafingnua vinu ene ve, ti ko eshu eyakeame ngua e mpa na gnu n'ekub e viya e tea me. ³⁰ Ntangu emishir wo ntshue lim, s'atshiwo n'ombime e wa olive. ³¹ Mbiy Yezu nda wo ndenden: Gnu ankum asindur gnu epiekuo o eluo; Djwi wamifugn: Ayadjag me wur elir ameme mpi ameme akum wo tshag'a-tshag'a. ³² Kansi ntangu eyakeame mby n'ewa, atsame onkung'agni ne Galilea. ³³ Kansi petelo okaba: Ata vear ankum watolur, me mpo lur ve. ³⁴ Yezu nda nde ndenden: " E vi- a-vi ndokaba, ko otshu o luo ene, nkok atovug'a ve, asinsan yie mbala isar." ³⁵ Petelo okeara: " Ata ko mfuete na ngua na yie, mposan ve." Mpi wa longoki ankum watuba k'oshino omog. ³⁶ Mbiy Yezu s'atshinde nda wo n'ondii oviewo Getsemani, mpi atuba na wa longoki: " ngyemagni nendiem ntangu eletshu me nsama." ³⁷ Avey na nde Petelo ti aman ape ampeam a zebede, mpi abana na nzug ngy ti mawa. ³⁸ Mbiy, alakaba: " Moyo e me eli na ngy mingi, ata ko n'ewa. Satsug'agni nendien mpi oya vuragni ve samagni ya me. ³⁹ Atsa mua etey, alog ne buu mpi asama ndenden: << Tea me, yug mpila eliko, lima nkeni ene etsu etey na me. Kansi ekuon ngia kamsi eleang me ve, kansi otshin oleang yie." ⁴⁰ Akea etay e walongoki mpi ayen wali ngi vur. Mbiy atuba na Petelo: " Nge wo? opikug'agni na nkuon mvur luong na me ata opfugn evima? ⁴¹ Keamgni vy mpi samagni djwi okalog'agni ne mpukumuna. Mpeve atsande nsug vi ne mbug, kansi djung ali n'olem. ⁴² Akea nam na wo mbal 'ozole asama ndenden: " Tea, kaku mpila elima yie nkeni ene etsu etey djwi nkuon na ngua, eyi ko oshin oleang yie. ⁴³ Akea diaka mpi ayen waliko ngavur; djwi kaku mpila ekeama vy ve. ⁴⁴ Mbiy akea ndim mbala emuu atsa etey. Asama mbala o tatu ko otuba emog. ⁴⁵ Mbiy, Yezu akea etay e wa longoki mpi alakaba: " OWuragni mpi oya pemagni? Liragni, ntangu ekug epea wo mon e wur ne mbuo e vear a masumu. ⁴⁶ Yimagni, sikienagni. Yenagni wur fuete na mpea me ne mbuo wear a masumu ndean ativang'a". ⁴⁷ Ko ntangu eyitubikinde, emog e djum n'ipe eviewo Yudas, akum. Oluy o vear ayim etay wa nkum e wa nganga nzambi ti w'ansuru e wa yuda wayia ti nde. N' empien ti wawa mbor. ⁴⁸ Wur efuete nsar yezu akabinde ndenden: Wur enkum esipea me mua, ndug enagn kiragni nde. ⁴⁹ Ko mbala emog, ayia etay e Yezu mpi atuba: << Mbea Longi!>> mpi alopea mua. ⁵⁰ Yezu okaba " Ewur kie vi emiyia yie nkie." Mbiy ayia, akir Yezu n'ewuo, mpi wo tshung. ⁵¹ Lir, emog e wa longoki eyii ti Yezu asiang ewuo, abin ompien onde, anang wur otshia e nkum e wa nganga-Nzambi, obag itii. ⁵² Mby Yezu okaba: "Keara opien oyie n'ondii ewo, djwi vera ankum ayakir empien ayawawo ko n'empien. ⁵³ Obansa mpikug mvie Tea me ve antumi ndwong djum n'ipe i banzio? ⁵⁴ Mby oshin onkagn esikug vii ayiifugn wo n'enkeana? Ekug vii ane alog." ⁵⁵ Ne ntangu enagn, Yezu atuba nda oluy o vear anagn ndenden: "Emiyiagnu n'eshung ti empien ne mbwo djwi na ntshung me kamsi nkea wumu? Agnemikime konso eshu ne tempelo, ndelong, okantshungagni ve. ⁵⁶ Kansi vii ane atilog djwi na vii ayiifugn wangunsa ekug." Mby walongoki inkum wososianga, s'akim wo. ⁵⁷ Vear ayiitshung Yezu s'ovariwo etay e nkum e wanganga-Nzambi Kaifa, walong i nsiku ti antsuru a waYuda ayiiwo mpiog. ⁵⁸ Petelo alesedjii tii ko n'iyawiya i nkum e wanganga-Nzambi. Ashwe mby s'agnemikinde ti vear akwung kog, djwi awung ngyen vii ankum asileg. ⁵⁹ Ankum a wanganga-Nzambi ti antsuru a waYuda alingikiwo ntiegn epwo na mbeam Yezu djwi wodjag. ⁶⁰ Wakavea ata djwi ipwo isobeam wo ve. Kansi vear ayileang wobeam vii ayiiwo kog. ⁶¹ S'atubiwo wuwun: "Wur ene atubinde ndenden: 'Ndakug na mbvuo tempelo e Nzeam mpi nkey ntwung wog ne nshu isar.' " ⁶² Nkum e wanganga-Nzambi atuba nda nde ndenden: "Opikeari otuba ve? Nge etuba vear ane djwi na yie?" ⁶³ Kansi Yezu ayia ko pwoo. Nkum e wanganga-Nzambi atuba ndenden: "Ntuba ma yie, ne dzin i Nzeam e luzingu, otekabi yug oli Kristu, Mon e Nzeam." ⁶⁴ Yezu okeara ndenden: "Yie yemie otituba wog. Kansi mokakaba, bana lwo ene, ayayen yie Mon-wur atigneme ne wum ewuo e nkembo e Nzeam mpi aleye ne mafuba yim dzug olung." ⁶⁵ Mby nkum e wanganga-Nzambi ayara eleama ende, ndenden: "Atitwe Nzeam! Ntiegn e nagn esifiling su? Yenakagni, otiyugagni gnemie oshin omitwe nde Nzeam. ⁶⁶ Oyenagni esing?" Wokeara wuwun: "Ekug wodjag." ⁶⁷ Wotwaga asuy, wonang epii ⁶⁸ wuwun: "Bikulaka nendien, yie Kristu. Nagn emonang?" ⁶⁹ Petelo ayiinde nelien, atigneme, mon otshia emog onkear ayia ntuba nda nde ndenden: "Ayiiyie mpi ti Yezu e wur e Galilea ene." ⁷⁰ Mby nde, asan ne nteang e vear ankum, ndenden: "Mpijia ata vim etuba yie ve." ⁷¹ Ntangu eletshikinde etay epfug e mpwe, mon otshia emuu onkear oyen, akaba vear ayiike kog ndenden: "Wur ene ayiikinde mpi ti Yezu e Nazarete ene." ⁷² Akea nsan mpi, asila ndenden: "Mpijia ata wur enagn ve." ⁷³ Ivim i ntangu eleg, vear ayii kog wayia ntuba wa Petelo wuwun: "Vi-a-vii, oli emog ne kati ewo; djwi otuba o yie n'odzum elakab." ⁷⁴ Mby, abana ntuba mpi asila ndenden: "Mpijia wur ene ve." Etean kaku, nkogo avug. ⁷⁵ Petelo akana otuba eyokabi Yezu: "Nkogo na ntovug, asinsan yie mbala isar." Mby apwe, s'adzamikinde aluu.