¹ Ekub e dzug ayayiawo kamsi asig ankear djum ayivey mwinda iwo djwi na nsanga ti wum wo. ² Atean ne kati ewo ayiwo ibwunu, mby atean amuu ayiwo waagn. ³ Djwi, ntangu emivey asig atean ibwunu mwinda iwo, wakavey vir ve. ⁴ Kansi asig a waagn avey wo vir n'alongo ti mwinda iwo. ⁵ Ntangu emiyia wum wo etean na ngya, wankum watilem, s'avur wo. ⁶ Kansi ne ngnina otshu, wayug olie: "Yen, wum ndean atikum! Tshwag osangagni ti nde!" ⁷ Mby asig anagn s'abiy wo, wawong mwinda iwo. ⁸ Asig ibwunu watuba wa asig a waagn wuwun: "Otepeagni ikab i vir, djwi mwinda isu itidzum!" ⁹ Kansi asig a waagn wuwun: "Vir awo ipakug ve ti su tignu, tshwag oshumagni ignugnu ya vear asar." ¹⁰ Ntangu eletshiwo nshum, wum mpi atikum, mby amuu ayii kog s'akien wo ti wum wo n'ivea, wadzub epfug. ¹¹ Mby mby, asig amuu anagn wasakum, wuwun: "Nkum, nkum, otengami epfug." ¹² Kansi nde s'akearinde: "Mokabagni vi-a-vii, mpojiagni ve!" ¹³ Oyavuragni lwong ve, djwi opijiagni ve ata eshu ata ntangu. ¹⁴ Ayayiawo kamsi wur emog aletshikinde buu emuu, avie vear ande otshia, asapea otsun onde. ¹⁵ Apea emog talanta itean, apea emuu ipe, mby apea emuu emog. Wur na wur aviynde isuu n'oshin ekug biu ende, mby wur enagn s'akien nde. ¹⁶ Etean kaku, wur eyiviy talanta itean atsanshum vim ansar, avea talanta itean imuu ne dzug. ¹⁷ Oshin omog ti wur eyiviy talanta ipe, ekeampur ipe imuu. ¹⁸ Kansi wur otshia eyiviy ko talanta emog enagn, emitsande, atsum ipug ne buu, apfugn ekri e nkum ende neti. ¹⁹ Ne mby i nshu entsign, nkum e vear otshia enagn akea, s'ayuinde nge emikiewo n'ekri ewo. ²⁰ Wur otshia eyivey talanta itean ayia, apur talanta itean imuu ne dzug, ndenden: "Nkum, ampiiyie talanta itean. Yenaka mean ntivea talanta itean imuu." ²¹ Nkum ende okeara ndenden; "Eli wuo, Wur otshia e wuo! Otikie wuo ne vim ekieg; ayopeame vim entsign. Shwe n'osiang e nkum eyie." ²² Wur otshia eyivey talanta ipe ayia ndenden: "Nkum, ampiiyie talanta ipe, yen, mean ntivea ipe imuu ne dzug." ²³ Nkum ende ndenden: "Eli wuo, wur otshia e wuo! Otikie wuo ne vim ekieg, ayopeame vim vim entsign. Shwe n'osiang e nkum eyie." ²⁴ Mby, wur otshia eyivey talanta emog ayia ndenden: "Nkum, njia memen aliyie viy biu entsign. Atsayie nkeaga vim ata n'ondii okafuy yie ve, mpi atsayie ntsug vim n'isag ata n'ondii okatwuomo yie mbeam ve. ²⁵ Ayug me womo, atshime nziy talanta eyie ne ngie e buu. Yen, ekri eyie ewean." ²⁶ Mby nukm ende okeara ndenden: "Wur otshia epwo ti ekar! Ojia yiyen atsame nkeaga mbeam ata n'ondii okafuy me ve, ²⁷ anatsayie ngwum ekri eme n'evur ewum wo ekri, mby ntangu esikeame, anaveame ekri emuu ne dzug." ²⁸ Kumagni nde talanta enagn, peagni ya wur eli na wo djum. ²⁹ Djwi, asipeawo ko wur eli na wo. Kansi wur kaku na wo, asokumaow ata ivim ilinde na wo. ³⁰ Wur otshia epwo enagn, twomagni nde ne mpib eli nelien, mpiog ayayiawo ko aluu ti agnere n'akagu." ³¹ Ntangu eyayia Mon-wur ne nkembo ende ti banzio ind einkum, mby ayagneme nde ne nkway ende e nkembo. ³² Vear ankum ne buu ayayiawo akina ne nteang ende, mby ayanama nde agni etay agni etay, kamsi wur ewunga gnam etsande nama mbur ti ameme. Ayatsug nde ameme ne wum ende ewuo, mby wambur ne wear ewuo. ^{33 34} Mby Vuy ayatuba nde nda vear ayayia ne wum ende ewuo: "Yagagni, gnu vear ayiivey lusakumuna e Tea me, veyagni oleama-nzo ekub eyiwong wo djwi na gnu yim ko n'itsin i buu. ³⁵ Djwi, ayiime na nziya s'ampiignu vim a nda; ayiime na mpuy e vay s'ampiignu vay a gnua; ayiime ongingien amvey gnu; ³⁶ akwon me eleama, andwer gnueleama; ayiime na nkeang, ansarisi gnu; ayiime ne bolog, ayii gnu ndir me." ³⁷ Mby vear a wuo ayakeara wo wuwun: "Nkum, ntangu enkagn eyoyen su na nziya mby s'aopiisu vim a nda? Ata na mpuy e vay mby s'aopiisu vay a gnua? ³⁸ Ntangu enkagn eyoyen su ongingien mby s'ovey su? Go akwon yie eleama mby s'olwer su? ³⁹ Mpi ntangu enkagn eyoyen su na nkeang, ata ne bolog mby ayiisu etay eli yie? ⁴⁰ Mby Vuy ayakeara nde ndenden: "Mokabagni vi-a-vii, vii ankum ayiikikignu ya emog ne kati akwom ame ane, akikignu wog ya me." ⁴¹ mby ayatuba nde nda vear ali ne wear ende ewuo: "Limagni mbeama na me, gnu vear amishing wo; tshwagagni ne tshiya eli kaku nsuka eyiwong wo djwi na ontshung ti banzio inde, ⁴² djwi, ayiime na nziya, okampeagni vim a nda ve; ayiime na mpuy e vay, okampeagni vay a gnua ve; ⁴³ ayiime ongingien okamveyagni ve; akwon me eleama, okampeagni eleama ve; ayiime ne nkeang, ti ne bolog, okansarisagni ve." ⁴⁴ Mby wo, ayakeara wo wuwun: "Nukm, ntangu enkagn eyoyen su na nziya, ata na mpuy e vay, ata ongingien, ata okwon eleama, ata na nkeang, ata ne bolog mby sikosarisa? ⁴⁵ Mby nde, ayakeara nde ndenden: "Mokabagni vi-a-vii, vim ekaleang gnu nkie ya emog ne kati aman alieng ane, okaleangagni nkie mpi ya me." ⁴⁶ Vear ane ayatsawone ndola e mvwe na mvwe, mby vear a wuo ne luzingu e mvwe na mvwe."