¹ Yezu apwe ne tempelo, s'akien nde. Walomgoki inde wavanga mbeama na nde, woyegne oshin oyitwung wo tempelo. ² Kansi nde akeara ndenden: "Opiyenagni vim ankum anagn ve? mokabagni vi-a-vii, kaku itari imog iyafiyen gnu ne dzug itari imuu ve, enkum ayabvuo wo." ³ Ntangu emigneme nde ne dzug ombimi e olive, walongoki wayia n'ikri ondii oli nde, woyue: "Otekabi ntete, vii awo ayayiawo ntangu enkagn. Mby bidimu nge eyayia ntangu eyakea yie ti vii ayalog djwi na nkab nsuka e buu?" ⁴ Yezu akeara: "Osugagni, wur apodjimagni ve. ⁵ Djwi vear entsign ayayiawo ne dzin ime wuwun: 'Me ndi Kristu', ayadjim wo mpi vear entsign. ⁶ Ayayug gnu watuba vii a mbaagn ti oshuru o mbaagn; Kansi oyayugagni womo ve, djwi ekug vii anagn alog; kansi epatoyia nsuka ve. ⁷ Vear abuu emuu ayaluawo ti vear abuu emuu iky, mpi ekub emuu ayaluawo ti ekub emuu iky. Nziya ayashwewo, buu mpi ayagnug wo n'endii n'endii. ⁸ Kansi enkum enagn ayayiawo ko itsin osayu o lwon. ⁹ Ne mby ewo, ayopeagniwo mpay mpi ayodjagagni wo. Vear ankum ne buu ayotunagni wo djwi na dzin ime. ¹⁰ Vear entsign ayalog wo, ayanam wo, ayasar wo wog na wog. ¹¹ Wangunsa oyang entsign ayapwewo mpi ayadjim wo vear entsign. ¹² Djwi ipwo ayayiawo entsign, ngagn ayashir wo ya vear entsign. ¹³ Kansi wur eyatsug biu tii ko nsuka ayavug nde. ¹⁴ Mbyy oshwong o wuo ekub ene ayalong wo buu enkum opfugn, djwi eyii ntiegn ya vear ankum. Mby esayia nsuka e buu. ¹⁵ Wog enagn, ntangu eyayen gnu eviewo "Ondjag wiya" eytubi ngunsa Daniel ayayiande n'ondii e santu (wur etanga ayii na waagn), ¹⁶ vear ayayia ne Yudea wakim ne dzug embimi, ¹⁷ wur eli ne dzug otwon evuru apikug nkr ve, ashwi n'evuru djwi na mvey vim eling nde mvey, ¹⁸ mpi wur eli n'evur apikug mfikea n'evuru ende ve djwi na mvey kazag ende. ¹⁹ Mpay ya ankear ayayia na djim ti ankear ayapeaka aman aviyo ne nshu inagn! ²⁰ Samagni djwi oluyi oyalur gnu ekwon ngya ne ntangu e mpio, ata eshu e sabat. ²¹ Djwi mpay ayayiawo eninen itotigniwo ngyen yim ko eyikii Nzeam buu tii opeane, epafiyia ko n'oshin o mpay inagn ve. ²² Yug ko nshu iwo ikwon ngya okwe, kaku wur emog enavug ve; kansi ko djwi na vear amison wo, mby nshu iwo ayayiawo okwe. ²³ Mby yug wur atokabagnindenden: "Yenagni, Kristu ndean nendien, go Kristu ali nompign, oyadjiragni ve. ²⁴ Djwi wakristu oyang ti wangunsa oyang ayayiawo mpi ayakiewo bidimu inen-inen, djwi na ndjim, yug ekug, ata vear amison wo. ²⁵ Yenagni, mean ntokabagni nteang. ²⁶ yug watokabagni wuwun: "Liragni, Kristu ali ne buu e ndzum," oyatsagni ve; go ali neti evuru n'ompuy onde, oyadjiragni ve. ²⁷ Djwi, ko oshin otsampiey nzari yim etay epwe vuna, woyen ti etay elog vuna, enagn oshin oyayia Mon-wur. ²⁸ Endii enkum eyayia edjuu, endii enagn mpi eyayia wankuma-nkuma. ²⁹ Ko ne mby e mpay inagn, vuna ayakum nde mpib, ngwon apafipea oveanga ve, weer ayalogaka wo yim dzug olung, mby biu inkum itsangya ne dzug ayagnug wo. ³⁰ Mby kidimu e Mon-wur ayasawopwe ne dzug olung, etuba enkum eli ne buu ayaliyewo. Ayayen wo Mon-wur aleye yim dzug, ne mafuba, na biu enkum ti nkembo eninen. ³¹ Ayabur wo isigi biu, ayatum nde banzio inde watsug vear amison nde ondii omog, ayayim wo n'epepe enkea anign, yim nsuka olung tii ko nsuka olung emuu. ³² Jiagni wuo mbanu eyipii oshung o nsuu. Yug atab atikea mpur nkaya, ojiagni gnugnun mbiiy itikea mpwe. ³³ Oshin omog, yug otiyenagni vii ane ankum, ofwete njiagni atikum pipi, ali n'epfug evuru. ³⁴ Mokabagni vi-a-vii, ndwong aman ane epalenga ve yug vii ane ankum atolog. ³⁵ Buu n'olung ayaleg wo, kansi otuba ome epayaleg ata itang ve. ³⁶ Kansi djwi n'eshu ti ntangu ewo, kaku wur emog ejia wog ve, ata banzio ne dzug, ata Mon, kansi ko Tea ndemie. ³⁷ Kamsi ne nshu iyii Noe, oshin omog eyayia Mon-wur. ³⁸ djwi ne nshu inagn, ne nteang e mpiye, vear alikiwo, agnuikiwo, akikiwo avea, atumikiwo aman awo avea, tii ko eshu eyishwi Noe ne ashwa. ³⁹ Kaku djwi imog iyikaniwo ve, tii ko eyinkum mpiye eyavari. Eyayia mon-wur mpi ayayiawo oshin omog. ⁴⁰ Mby vear ape ayayiawo n'evur; ayavey wo emog, wasasugn emuu. ⁴¹ Ankear ape watog ne nguu, ayavey wo emog, wasasugn emuu. ⁴² Osugagni, djwi opijiagni ve eshu eyaya Nkum egnu. ⁴³ Kansi, jiagni wuo, yug nkea evuru atojia ko ntangu esiyia nkea wumu, apinavuraka ve mpi aposianga ve ashwi n'evuru. ⁴⁴ Wogenagn, gnu mpi, kwungagni, djwi Mon-wur ayayiande ne ntangu epibansi gnu ve. ⁴⁵ Wur otshia e waagn ti e wuo eli enkagn, yug nkum ende otosotsug nkum na ndir evuru ende, djwi apiike vim a nda ne ewo yug eikug? ⁴⁶ Osiang ya wur otshia esiyia ngyen nkum ende vii ane ntangu esiyande. ⁴⁷ Mokabagni vi-a-vii, nkum ende asotsug nde nkum esilir vim ande ankum. ⁴⁸ Kansi yug wur otshia epwo asituba nde ndenden: "nkum eme apatoyia opeane ve", ⁴⁹ mby abanike na ndjag vear otshia amuu agni, ala mpi agnua nda vear ayuy veana; ⁵⁰ nkum e wur otshia enagn asiyia nde eshu ekabansa nde ve, mpine ntangu epijia nde ve. ⁵¹ Nkum ende asopeande ndola e biu, asotsug nde ne ndwong ankea oyang, ayayiawo ko aluu ti agnere n'akagu.