¹ Ne mby e sabat, eshu ontete ne suka, Maria e Magdala ti Maria emuu watsandir nkr. ² Yenaka, buu egnug biu, djwi wanzio emog e Nkum akri ndeyim dzug olung, ayiandima itari inagn, agneme ne dzug iwo. ³ Djuung inde ipiey mpi ileama inde siy kamsi ewung. ⁴ Ayer-nkuu ayiilirike wayug womo, wakum kamsi vear amiwa. ⁵ Wanzio atuba nda ankear anagn ndenden: "Oyayugagni womo ve, djwi ndajia memen olalingagni Yezu eyiidjag wo ne kulunsi. ⁶ Apa ali diaka nendien ve, atikea mbiy n'ewa, kamsi eyiitubinde. Yagagni oliragni ondii oyiivurike Nkum. ⁷ Tshwagagni eveang, kabagni walongoki inde: "Atikea mbiy n'ewa; yenagni, ndean atitsa Galilea nteang egnu, asoyen gnu ko mpiog. Me mean ntokabagni." ⁸ Mby ankear s'akagniwo ndim n'aluma. Ayiiwo na womo ti osiang. Wakim ntsankaba ya walongoki inde. ⁹ Yenaka, Yezu ndean asanga nda wo, ndenden: "Ngemba eyii ya gnu." Ankear wayia nkir nkuu inde mpi wofukimina. ¹⁰ Mby Yezu atuba nda wo ndenden: "Oyayugagni womo ve. Tshwagagni okabagni atwung ame watsi Galilea; asingien wo ko mpiog." ¹¹ Ntangu eletsu ankear anagn, yenaka ayer-nkuu amuu washwe ne wiya, wakaba nkum e wanganga-Nzambi vii ankum amileg. ¹² Wanganga-Nzambi, ntangu emisanga wo ti antsuru a waYuda na ndir vii awo, s'apiiwo ekri entsign ya ayer-nkuu ¹³ wuwun: "Tubagni gnugnun walongoki i Yezu ayiwo nkama djuung inde otshu onkum ntangu eyivurikisu. ¹⁴ Yug ko vii ane emikum ya nkum ebuu, asotshung su odzum, asolimagni su ne ndola enkum esopeagni nde." ¹⁵ Mby ayer-nkuu s'avey wo ekri enagn, wakie kamsi eyakabiwo. Oyug onagn apwiwo etay e waYuda, elepwi tii lwo ene. ¹⁶ Kansi walongoki djum n'omog enagn s'atshiwo Galilea, ne dzug ombimi eyakabi Yezu. ¹⁷ Ntangu eyoyen wo, wofukimina, kansi amuu ayiiwo n'itura ipe-ipe. ¹⁸ Ntangu emivanga Yezu nda wo, atuba ndenden: "Ekub enkum wamimpea ne dzug ti ne buu. ¹⁹ Tshwagagni longagni vear ankum ne buu wakum walongoki, peagni wo mbotika ne dzin i Tea, i Mon ti Mpeve-Santu. ²⁰ Longagni wo na ndemfuka ne vii ankum ayotumagni me na nkie. Yenagni, me mean ndi ma gnu konso eshu tii ko nsuka e buu."