¹ Yezu akeampea etsig emuu ndenden: ² "Ekub e dzug eli oshin omog ti vuy emog eyiwongike na nkie okina ivea djwi na mon nde ompeam. ³ Atum vear ande otshia na mvie vear ayituminde enkeana djwi wye n'ivea, kansi wakaleang ngya ve. ⁴ Vuy akeantum vear ande otshia amuu ndenden: "Kabagni vear ayitumime enkeana, ntileam vim anda, wangombe ime, ti eky eme e gnam i vir-vir imidjagakame, vim ankum ntiwong, waye djwi n'ivea." ⁵ Kansi vear anagn wakaleang mvey vii awo ve. S'akien wo, emog atsa evur ende, emuu atsa vii ande n'iky. ⁶ Amuu ayisatsuga wakir vear otshia e vuy, wapea mpay, s'adjag wo. ⁷ Vuy ayug nkierentsign; s'atum nde ayer-nkuu watsandjag vear apwo anagn, wabwo na viya ewo tshiya. ⁸ Mby s'atubinde nda vear ande otshia ndenden: "Ntangu okina etikug, vear ayiviime wapikug ngya ve. ⁹ Yug ngean, tshwagagni ne dzuu i mbug, vieagni vear ankum asiyen gnu waye n'okina ivea." ¹⁰ Vear otshia watsa ne mbug inkum, s'avey wo vear ankum ayiiyen wo, na vear apwo na vear awuo. Ondii onagn eyuo to na vear amiviewo. ¹¹ Mby, ntangu emishwe vuy djwi na ndir vear amiviewo, ayen wur emog ne kati ewo, akalwer eleama okina ve. ¹² Vuy s'oyuinde ndenden: "Ewur eme, oshin onkagn emishwe yie nendien okalwer eleama okina?" Wur ewo, djwi inkeara kaku. ¹³ Mby vuy s'atubinde nda vear otshia ndenden: "Tshungagni wur ene mbwo ti nkuu, twomagni nde ne mpib, mpiog ondii oyayia ko aluu ti agnere n'akagu." ¹⁴ Djwi, vear entsign wamavie kansi vear amison wo wali itaang." ¹⁵ Mby wafarize watsankie mpfug na ntsug Yezu ilung n'otuba onde ndemie. ¹⁶ Wotuma walongoki iwo, ti vear a Erodi. Watuba wa Yezu wuwun: "Nkum, sijia susun atsayie ntuba vii a masonga mpi olelong vii ali ne mbug e Nzeam ne masonga. opivey vii a wur na womo ve, opitsinkie ata onshiey ve. ¹⁷ Otekabi ntete, oshin oyen yie, ekug sifuti mpaku ya Sezar go sikwon mfuta?" ¹⁸ Kansi Yezu, ntangu emijia nde wagn ewo epwo, ndenden: "Ankea eyang ene! Djwi na nge ending gnu ndogo me? ¹⁹ Tongyegnagni ikutu imog ifuta wo mpaku na wo." Woyegne ikutu imog. ²⁰ Yezu nda wo ndenden: "Ignignig ine ti dzin ine ili inagn?" ²¹ Wuwun: " I Sezar." Mby Yezu akaba ndenden: "Peagni ya Sezar vim ali ya Sear, i Nzeam mpi peagni ya Nzeam." ²² Ntangu emiyug wo oshin onagn, wayen ngituka. wososianga, s'akien wo. ²³ Eshu enagn, wasaduse imuu itsantuba wuwun vear wayakea mbiy n'ewa ve, wayia etay eli nde. Woyue wuwun: ²⁴ "Nkum, Moize atubinde: 'Yug atiwa kavea mon ve, otwung onde ompeam asavey wear enagn asawur aman ti nde.'" ²⁵ Ayiwo na atwung ashiambia. jii woenteang atsug wear, awa kaku ata mon ve. Asasugn wear ya okwom nde. ²⁶ Ozole enagn akie ko oshin omog; mby otatu, tii ko okwom wo e wur ishiambia. ²⁷ Ne mby ewo, onkear onagn mpi awa. ²⁸ Opeane, otekabi ntete, ne ntangu eyakea mbiy vear n'ewa, onkear onagn ayayiande wear e nagn ne kati ewo wankea ashiambia; djwi wankum atsug wo onkear owo?" ²⁹ Kansi Yezu akeara ndenden: "Olagni n'ikri, djwi opijiagni ata vii amifugn wo n'enkeana ve, ata biu o Nzeam mpi ve. ³⁰ Djwi, eshu eyakeambiy vear n'ewa, epafiyia n'ivea ve, kaku wur eyafitum wur n'ivea ve. Vear ayakum wo kamsi banzio ne dzug. ³¹ Kansi, djwi na vii a nkea mbiy n'ewa, okatangagni ve vii ayitubi Nzeam nda gnu: ³² "Ndi Nzeam e Abrama, Nzeam e Izak, ti Nzeam e Yakob?" Nzeam apa ali Nzeam e wabafwa ve, kansi e vear ali ne luzingu." ³³ Oluy o vear anagn, ntangu emiyug wo along anagn, wayen ko ngituka. ³⁴ Ntangu emiyug wafarize wuwun Yezu atitshung odzum o wasaduse, washwe mpfug. ³⁵ Emog ne kati ewo, long e nsiku, oyue djwi imog djwi n'ontesa: ³⁶ "Nkum, ne wansiku inkum, nsiku enkagn eli eninen?" ³⁷ Yezu okeara ndenden: "Leang Nzeam Nkum eyie n'etura eyie enkum, ne moyo eyie enkum, ti ne waagn eyie enkum." Ene eli nsiku eninen ti e nteang. ^{38 39} Nsiku ozole ene eli kamsi oshin omog: "Leang otwung oyie kamsi yie yemie." ⁴⁰ Nsiku inkum i Moize ti along ankum a wangunsa itishwe ko ne nsiku ipe ine. ⁴¹ Wafarize ntangu emitsug wo ikina, Yezu ajue. ⁴² Ndenden: "Nge ebansagnu djwi na Kristu? Ali Mon e nagn?" Wokeara wuwun: "Ali Mon e David." ⁴³ Yezu atuba ndenden: "Mby oshin onkagn emifituba David na Mpeve, alovie nde Nkum, ntangu eyitubinde: ⁴⁴ "Nkum atituba nda nkum eme: 'Gneme ne wum eme ewuotii ko ntangu eyatsug me wambeni iyie ne ngie i nkuu iyie.'?" ⁴⁵ Yug David alavie Kristu "Nkum," oshin onkagn esifiyiande mon e David?" ⁴⁶ Kaku wur eyikug na nkear ata djwi ve. Mby, yim eshu enagn, kaku wur eyifiyueaka ata djwi ve.