¹ Yezu ti walongoki inde watikum mbeama na Yeruzalem, wakum ne wiya eviewo Bethfage mbeama n'ombimi e Olive. ² Yezu atum walongoki ipe, nda wo ndenden: "Tshwagagni ne wiya eli nteang enagn, asiyen gnu wampunda ipe, mea ti mon watatshung n'eshing. Pubagni wo eshing, onjiagni wo nendien. ³ Yug wur amoyueagni djwi na wo, tubagni gnugnun: "Nkum ali na mfunu ewo, mby wur enagn asosiangagni nde okienagni ti wo." ⁴ Osin one, vii ayitubi ngunsa s'akug wo: "Kaba mon onkear e Sioni: 'Yen, Nkum eyie ndean aleye pwoo etay eli yie, ativean ne dzug i mpunda e wear, ne dzug i mon e mpunda e wum.'" ^{5 6} Mby walongoki watsa, wakie ko oshin oyitubi Yezu nda wo. ⁷ S'ayiwo na mpunda e wear ti mon e mpunda e wum, watsug ileama iwo ne dzug iwo, mby Yezu s'agneminde ne dzug iwo. ⁸ Vear entsign s'ayiikiwo ileama iwo ne mbug, amuu s'abagikiwo veang ava, wayia ne mbug. ⁹ Oluy o vear ayii nteang ti mby e Yezus'adzamikiwo: "Hozana ya Mon e David! Osiang ya wur eleye ne dzin i Nkum! Hozana ya wur eli dzug-dzug!" ¹⁰ Ntangu emishwe Yezu ne Yeruzalem, wiya opfugn egnug, wuwun: "Wo ene ko nagn?" ¹¹ Oluy o vear angn wuwun: "Ene eli Yezu, ngunsa eyim Nazarete ne Galilea." ¹² Mby Yezu atsanshwe ne tempelo. Akma vear ankum ayisarike ti ayishumike neti e tempelo, abvugna wamesa i vear ayisognike ekri ti endii eyisarike vear wankodima. ¹³ Atuba nda wo ndenden: "Wamifugn: 'Evuru eme ayaviewo evuru e bisamu', kansi gnu, otitshimagni wog evuru ankea vimu." ¹⁴ Mby, vear amibuye viy ti ankea ikom wayia etay eli nde ne tempelo, mby s'avuginde. ¹⁵ Kansi ankum a wanganga-Nzambi ti walong i nsiku, ntangu emiyen wo bidimu imikiende inagn, emiyug wo aman wadzama ne tempelo: "Hozanaya Mon e David", wayug nkier. ¹⁶ Wa nde wuwun: "Olayug vii atuba vear ane?" Yezu ndenden: "Ee, mby gnu okatangagni emifugn wo wuwun: 'Otivey lokumu n'edzum aman alieng ti ya aman agnua aviyo?' " ¹⁷ Mby Yezu s'alim nde, apwe ne wiya enen enagn, s'atshinde Betania, mpi avur nde mpiog. ¹⁸ Ne suka enagn, ntangu elkey nde wiya enen, ayug nziya. ¹⁹ Emiyen nde oshung o nsuu n'ikri i mbug, atsa ndir, asayen ko nkaya. S'atubinde nda oshung o nsuu ndenden: "Nsuu ipafita n'oshung one ve." Etean kaku, oshung owo eyum. ²⁰ Ntangu emiyen walongoki vii anagn, wayen ngituka, wuwun: "Osin nge oshung one etiyum ko mbala emog?" ²¹ Yezu akeara ndenden: "Mokabagni vi-a-vii, yug olagni na lukwikilu, mpi opitsugagni itura ipe-ipe ve, asikiegnu, epa ko vii amikeme ya oshung one ve, kansi asikug gnu ntuba ata ya ombimi one: Lim nendien, tshwag olog ne nzey, anakirawo. ²² Vim enkum esiwignagnu ne bisamu yug odjiragni, asiveagnu." ²³ Ntangu emishwe Yezu ne tempelo, antsuru a wanganga-Nzambi ti antsuru a wiya etay eli nde ne ntangu elongikinde, wuwun: "N'ekub e nagn elekiyie vii anagn, mpi wur ewo nagn eyopii ekub ewo?" ²⁴ Yezu akeara ndenden: "Me ko ndoyueagni gnu. Yug ominkearagni mvutu mby me mpi asokabagni me n'ekub enagn elekiime vii ane. ²⁵ Mbotika e Yoane eyim nonkagn? Dzug to ya vear? " Wog na wog wa tuba wuwun: Yug situba " eyim dzug ", asituba nde << Djwi na nge ekajir gnu vii a Yoane? >> ²⁶ Yug ko simikeara: Eyim ya vear " si yug womo djwi n'oluy o vear djwi vear ankum wavey Yoane kamsi ngunsa. " ²⁷ Mbiy wa keara Yezu wuwun: " Sipijia ve." A lakaba diaka: Me ko mpokabagni ve ne nsthua e nagn elekime vii ane. ²⁸ Kansi oyeanagni esing? Wur emog ayinde na aman ape ampeam: " Atsa etay e mon e nteang ndenden: Mon me tshuag oki otshia luo ene n'evur e me. ²⁹ Mon a keara ndenden " Mpa kie wog ve " kansi ne mbiy ewo atshima etura mpi atsa evur." ³⁰ Mpi wur atsa etay e mon ozole mpi atuba ko oshin omog. Mon enagn okeara ndenden: Asitsa me " Kansi akafitsa ve. ³¹ Wankeape nagn emekie eleang tea wo? Wuwun: " e nteang." Yezu akaba: " E vi-a-vi, mokabagni, vear avey mpaku ti ankear a nduma ayashue wo n'ekub e Nzeam ne nteang e gnu. ³² Djwi yoane ayinde etay e gnu n'onzengnagni mbug e wuo, kansi okajiragni ve, kansi vear avey mpaku ti ankear a nduma ajirwo. Mpi gnu, ntangu eyiyen gnu vi anagn eyia, gnu okakug'agni ve na ntshima djwi ojiragni. ³³ Yug'agni etsig emuu: " Wur emog ayinde, na buu e nde. Afuy vinu, s'akinde opeang, atsum ibulu, atung evuru e nkengidila mpi apea vear ekie otshia ne vigno. Mbiy s'akiende viya ikiy. ³⁴ Ntangu e nkeag'a mbeam atum eyi vang'a, atum vear otshia etay a vear akie n'ivur e vino wo tumi mbeam i nde. ³⁵ Kansi vear akie otshia n'evur wakir vear ande otshia, wadub emog, wadjag emuu mby emuu wobug atari. ³⁶ Nkea evur akeantum vear ande amuu entsign elenga isuu i vear ayii nteang, kansi vear akie otshia n'evur wakeankie ko oshin omog. ³⁷ ne mby ewo, nkea evur s'atum nde mon nde nkeangande, ndenden: "Asilemfuka wo ya mon me." ³⁸ Kansi, vear akie n'evur, ntangu emiyen wo mon nde, watuba wog na wog wuwun: "Yenagni wur eyasavey oleama-nzo: yag sodjagagnimpi sisavey oleama-nzo ene." ³⁹ Mby, wovey, wovara nelien e evur, s'odjag wo. ⁴⁰ Opeane, ntangu eyayia nkea evur, ayakiende nge djwi na vear akie n'evur enagn?" ⁴¹ Wakeara wuwun: "Asidjag nde vear apwo anagn, ngy kaku ve, mby asisande pea evur ya vear amuu, vear asokug n'ompea ikab inde ne ntangu eyakeaga wo mbeam." ⁴² Yezu s'akabinde ndenden: "Okatangagni n'enkeana emifugn wo: "Itari iyifangi vear atwung mvuru etisakum itari ikir ikuu evuru. Enagn eyim ya Nkum mpi eli kidimu ne viy asu"? ⁴³ Wog enagn, mokabagni, ayolimagniwo ekub e Nzeam mby ayapeawo ya buu emuu eyawur mbeam iwo. ⁴⁴ Wur esilog n'itari iwoasimog nde itign-itign. Kansi wur eli, itari ilog ne dzug inde, ayabuye nde mfuya-mfuya." ⁴⁵ Nteangu emiyug ankum a wanganga-Nzambi ti wafarize itsig imituba nde enagn, wajia wuwun alatuba nda wo. ⁴⁶ Anotshung wo, kansi ayug wo womo e oluy o vear anagn djwi vear ajiikiwo wuwun ali ngunza.