¹ Djwi, ekub e dzug eli kamsi nkea evur emog eyipwi ne suka-suka, atsanding vear otshia na nkie n'evur ende. ² Ntangu emisula nde nda wo n'ifutu iwo ikutu imog n'eshuu emog, s'atum nde n'evur ende. ³ Emikeande mpwe ne ntangu iwua, ayen vear amuu watigneme n'ilaga, vim ekiewo kaku. ⁴ Atuba nda wo ndenden: "Gnu mpi, tshwagagni n'evur eme, vim enkum esileang gnu asopeagni me." Mby s'atshiwo nkie mpi otshia. ⁵ Akeampwe ne ntangu djum n'ipe ti ne ntangu isar epiyekwo, akeankie ko oshin onagn. ⁶ Eyikeynde mpwe ne ntangu itean epiyekwo, ayen amuu watigneme, nda wo ndenden: "Djwi na nge emigneme gnu nendien opfugn eshu, kaku ata vim ekiegnu?" ⁷ Wokeara wuwun: "Djwi kaku wur emitevey n'otshia ve. "Atuba nda wo ndenden: "Gnu mpi, tshwagagni n'evur eme." ⁸ Emijie vuna, nkea evur atuba nda kapita ndenden: "Vie vear otshia ankum, futa wo ekri ewo, yim ko vear a mby-mby tii ko vear anteang. ⁹ Ntangu emikum vear ayibani otshia ne ntangu itean epiyekwo, wur na wur avea ikutu imog. ¹⁰ Ntangu emikum vear otshia ayii nteang, abansiwo wuwun asiveawo isuu isilenga vear a mby-mby, kansi wankum wavea ko ikutu imog wur na wur. ¹¹ Ntangu emishir wo mvey ifutu iwo, wagnie djwi na nkum enagn, ¹² wuwun: "Vear otshia a mby-mby ane watikie ko ntangu emog, kansi otapea ifutu oshin omog ti su vear amiyen mpay yim ko suka, ne ngie e mbiiy." ¹³ Kansi nkea evur atuba nda wur ewo emog ndenden: "Ewur eme, kaku ipwo imokieme yie ve. Sikalien sape memen asofuta me ikutu imog?" ¹⁴ Veayagni vim egnu, tshwagagni; Ntileang mpii vear otshia a mby-mby ifutu oshin omog ti gnu. ¹⁵ Vim ame nkeangame, mpikug nkie na wo oshin oleang me ve? Nge oli na mvuna djwi me ndi wur ewuo? ¹⁶ Oshin onagn, vear a mby-mby ayakum wo vear a nteang, mby vear a nteang wasakum vear a mby-mby. Vear amiviewo wali entsign, kansi vear amison wo wali itaang." ¹⁷ Ileveanike Yezu Yeruzalem, avey walongoki inde djum n'ipe. Ne mbug, akaba ndenden: ¹⁸ "Yenagni, wean siletsu Yeruzalem, Mon-wur ayosar wo ne mbwo ankum a wanganga-Nzambi ti walong i nsiku. Ayobag wo ewu djwi wodjag ¹⁹ ayopea wo ne mbwo empaagndjwi woyuinde two, wonang akoy mby wokwog ne dzug i kulunsi. Kansi n'eshuu otatu, ayakeande mbiy n'ewa." ²⁰ Mby mea aman a Zebede s'ayinde ti aman ande mbeama na Yezu. Ababa ne nteang e Yezu djwi n'ongyue vim emog. ²¹ Yezu okeara ndenden: " Oling ne?" Mby nde s'atubinde ndenden: "Tuba djwi aman ame wagnemi mbeama na yie n'ekub eyie, emog ne wum eyie ewuo emuu ne wear eyie ewuo." ²² Kansi Yezu okeara ndenden: "Opijia ata vim nge eling yie ve. Asikug gnu na gnua ikob isignua me?" Wuwun: "Ee, asikug su." ²³ Atuba nda wo ndenden: "Vi-a-vii, asikug gnu na gnua ikob ime, Kansi djwi na gneme ne wum eme ewuo go ne wear eme ewuo, epa mug wur esipea ve, enagn Tea me amiwuma vear ande amiwong nde." ²⁴ Walongoki djum imuu inagn, ntangu emiyug wo vii anagn, s'ayug wo nkier djwi na atwung ape anagn. ²⁵ Mby Yezu s'aviinde, ndenden: "Ojiagni gnugnun ankum a empaagn wamigneg vear awo, eli ko vear awo anen-anen atsawo atsawo ngyegne ekub ewo ne dzug iwo. ²⁶ Kansi ne kati egnu, epikug ngya oshin onagn ve. Kansi, wur eling ayii wur eninen ne kati egnu, ekug ayii wur egnu otshia. ²⁷ Mpi wur eling ayiiontete ne kati egnu ekug ayii wur egnu otshia, ²⁸ oshin onagn, Mon-wur ayiinde, epa djwi ayii nkum ve, kansi ayii wur otshia, djwi apii luzingu ende kamsi empeab djwi na mvuga vear entsign." ²⁹ Ntangu emipwewo ne Yeriko, oluy o vear walosodjii. ³⁰ Vear ape amibuye viy watigneme n'ikri i mbug. Ntangu emiyug wo Yezu aleleg, wadzama, wuwun: "Nkum, Mon e David, oteyug ngy." ³¹ Kansi oluy o vear anagn wagnianga djwi wayii pwo, kansi walega ndzama na biu: "Nkum, Mon e David, oteyug ngy." ³² Mby Yezu s'ayiminde, avie vear anagn, ayue: "Oleangagni mokiagni nge?" ³³ Wokeara wuwun: "Nkum, viy asu angam." ³⁴ Mby Yezu, ayug ngy, s'akir nde ne viy. Ko ne ntangu enagn, viy awo angam, s'osawodjiye.