¹ Emishir ntuba Yezu vii anagn, s'alim nde ne Galilea, atsa buu e Yudea ne nky e nzey e Yordani. ² Oluy o vear wosolana, mby s'avugikinde. ³ Wafarize watsa ntuba wa nde djwi n'ontesa, wuwun: "Ne nsiku, eli wuo yug ompem atidjag ivea ti wear nde na djwi inkum inagn?" ⁴ Yezu akeara ndenden: "Okatangagni n'enkeana wuwun Nzeam ntangu eyakinde n'itsin i buu, akinde ompeam ti onkear? ⁵ S'atubinde ndenden: "Ompeam ayalim nde n'opeang e tea nde na mea nde, ayii ondii omog nda wear nde, wape wakum djuung imog.?" ⁶ Wapafiyia ape ve, kansi wali djuung imog. Wog enagn, wur apikug nama ve vim emitsug Nzeam ondii omog. ⁷ Watuba wa nde wuwun: "Mby djwi na nge Moize atubinde ndenden yug oling ndjag ivea, fugn onkeana e ndjag ivea mby osiangi wear yie?" ⁸ Akeara ndenden: "Djwi itura ignu biu mby Moize s'opiagninde mbug e nsianga avear agnu, kansi n'itsin i buu ekayia oshin onagn ve." ⁹ Kansi me, mokabagni: ompeam onkum esisianga wear nde, ko yug atikie itaay, yug atisatsug onkear omuu, atikie itaay. Mby ompeam esisatsug onkear emisianga wo enagn mpi atikie itaay." ¹⁰ Walongoki s'atbiwo wa Yezu: "Yug nsiku ivea eli ko oshin onagn djwi n'ompeam nda wear nde, wuo sikwon ntsug avear." ¹¹ Kansi Yezu akeara ndenden: "Vear ankum wapakug njir ilong ine ve. ¹² Djwi amuu wapikug ntsug wear ve yim ko n'ipfugn i mea wo, amuu vear wamalimaka biu ewo, amuu wemie walimaka biu ewo djwi n'ekub e dzug. Kansi wur ekug na mvey ilong ine, avey." ¹³ Mby wojie aman alieng djwiayab mbwo n'ote, asami djwi na wo. Kansi walongoki wangnianga aman anagn, walakeari mby. ¹⁴ Mby Yezu s'atubinde ndenden: "Peagni mbug ya aman alieng waye etay eli me, oyaapumagni ve, djwi ekub e dzug eli ya vear ali kamsi wo." ¹⁵ Ayab mbwo n'ete, mby s'alim nde kog. ¹⁶ Yenaka wur emog ayia etay eli Yezu, atuba ndenden: "Nkum, vim ewuo nge esikug me nkie djwi mvey luzingu e mvwe na mvwe?" ¹⁷ Yezu okeara ndenden: "Djwi na nge enjue yie na nkie vii a wuo? Eli ko n'emog eli wuo, kansi yug oling nshwe ne luzingu e mvwe na mvwe, wum ko onkwon." ¹⁸ Wur ewo atuba ndenden: "Onkwon owo nge?" Yezu ndenden: "Opidjag wur ve, opikii itaay ve, opikami wumu ve, opibeam wur djwi ve, ¹⁹ lemfuka ya tea yie ti mea yie, leang otwung oyie kamsi yie yemie." ²⁰ Onkwo onagn okeara ndenden: "Atsame nkie vim ankum anagn. Vim nge emuu ekwon ya me?" ²¹ Yezu okaba ndenden: "Yug oling oyii wuo-wuo, tshwag osar vim ayie ankum aliyie na wo, pea ya ankea emva, mby asiveayie otsun oyie ne dzug, mby yag, onsandjiike." ²² Kansi ntangu emiyug mon onkwo enagn vii amituba Yezu, akum ngy-ngy, s'akien nde, djwi ayinde n'otsun entsign. ²³ Yezu atuba nda walongoki inde ndenden: "Mokabagni vi-a-vii, eli mpay ya nkea otsun na nshwe n'ekub e dzug. ²⁴ Mokabagni mpi, epa eli mpay ve djwi na shamo na nshwe n'itunu i ntunga, kansi epa ya nkea otsun ve na nshwe n'ekub e Nzeam." ²⁵ Ntangu emiyug walongoki vii anagn, wayen ngituka, wuwun: "Mby nagn esikug mvea evug?" ²⁶ Yezu alir, mby atuba ndenden: "Yug ya vear epikug ve, kansi ya Nzeam asikug nde nkie vim ankum." ²⁷ Mby Petelo avey otuba, ndenden: "Yenaka, wean sitisasugn vim asu ankum, silosodji ko yie; nge eyaveasu?" ²⁸ Yezu okeara ndenden: "Mokabagni vi-a-vii, gnu vear alesendji me, ne mvwe ileye, ntangu eyagneme Mon-wur n'ekub ende e nkembo, gnu mpi, ayagneme gnu ne nkway djum n'ipe ekub, ayabagakagnu ewu e ekuu djum n'ipe aman a Israel." ²⁹ Wur enkum emisasianga mvuru inde, atwung ande ampeam, atwung ande ankear, mea nde, aman ande, ata ivur inde ne dzin ime, ayavea nde mbala nkama vim anagn ankum, ti oleama-nzo e luzingu e mvwe na mvwe. ³⁰ Kansi, vear entsign eli vear anteang-nteang ne ntangu ene, ayasawokum vear a mby-mby, mpi vear entsign eli mby-mby, ayasawokum vear a nteang-nteang.