¹ Ne ntangu enagn, walongoki wayia etay e Yezu, wuwun: "Nagn eli wur eninen n'ekub e dzug?" ² Yezu avie omon ilieng, otsug ne ngnina ewo wankum, ³ atuba ndenden: "Vi-a-vii mokabagni, Yug okasognoagni ve, okumagni kamsi aman alieng, opashweagni n'ekub e dzug ve. ⁴ Wog enagn, wur enkum esikra kamsi imon ilieng ine, ndug enagn eli wur eninen n'ekub e dzug. ⁵ Wur esivey imon ilieng imog ne dzin ime, antimvey me. ⁶ Kansi wur esitum imon ilieng oshin one emidjir ya me djwi akii masumu, ekug wuo ya nde, wotshung itari ininen ne nking, wotwomi ne ndzig e nzey. ⁷ Ngy ya vear a buu djwi na ntangu i mpay ileye! Djwi ekug wuo vii anagn alog, kansi mpay ya wur eyayia ibagu djwi na vii anagn. ⁸ Yug ewuo eyie ata ekuu eyie elotum na ndog, keaga wog mpi fanga wog etey na yie. Wuo oshwi n'ekub e dzug n'ewuo emog go ekuu emog, kansi epa wotwomi n'ibulu i tshiya na mbwo ipe ti nkuu ipe ve. ⁹ Yug dziy iyie ilotum yie na ndog, keaga wog mpi fanga wog etey na yie. Wuo oshwi n'ekub e dzug na dziy imog, kansi epa wotwomi ne tshiya na viy ankeape ve. ¹⁰ Osugagni, oyatumagni ata imon ilieng imog ve. Djwi mokabagni, banzio iwo ne dzug ntangu enkum atsawondir elung e Tea me ne dzug. ¹¹ Djwi, Mon-wur ayinde mvuga vear amijing mbug. ¹² Obansagni nge? Yug wur emog ali n'ameme ande nkama, mby emog atsi ntu, apasasianga ameme owua n'iwua enagn n'ombimi djwi na ntsanding emog enagn ve? ¹³ Mby ntangu esiyen nde imeme iwo, mokabagni vi-a-vii, asiyiande n'osiang entsign esilenga ata ameme owua n'iwua emisatsuga enagn. ¹⁴ Oshin omog, epa eli luzolo e Tea gnu eli ne dzug ve djwi n'imon ilieng imog ine atsi ntu. ¹⁵ Yug otwung oyie atokie yie ipwo, tshwag, kabande ipwo imikiende. Yug amoyug yie, otivuga otwung oyie. ¹⁶ Kansi yug akoyug yie ve, vey otwung omog go atwung ape amuu, djwi n'odzum o ntiegn ipe go isar, masonga eyii. ¹⁷ Yug akoyugagni ve, vara vii awo ne dibundu. Yug mpi akaleang ngyug dibundu ve, veyagni nde kamsi ompaagn ata wur evey ekri e mpaku. ¹⁸ Mokabagni vi-a-vii, vim enkum eyatshung gnu ne buu, ayatshung wo mpi ne dzug, vim enkum eyangama gnu ne buu ayangama wo mpi ne dzug. ¹⁹ Ndakeantuba memen, yug vear ape ne kati egnu ne buu watiyia ondii omog djwi na nding vim enkum enagn, Tea me eli ne dzug ayapeande vim enagn. ²⁰ Djwi, yug ape go asar watiyia ondii omog ne dzin ime, ndi ne kati ewo. ²¹ Mby Petelo s'ayinde mbeama na Yezu, ndenden: "Nkum, yug otwung ome atinkie ipwo, asololula me mbala kwe? Tii mbala ishiambia?" ²² Yezu okeara ndenden: "Ntokabagni ve memen mbala ishiambia, kansi tii oshiambia mbala ishiambia. ²³ Wog enagn, ekub e dzug eli oshin omog na vuy emog eyileang nshira vii abaya nda vear ande otshia. ²⁴ Ntangu etanga nde abaya ande, wojie wur emog eyii n'ibaya inde ekri awugu djum. ²⁵ Kaku vim esifuta nde ibaya iwo ve, nkum ende ndenden: "Ekug wosar nde, wear nde, aman ande, ti vim ande ankum alinde na wo; oshin onagn ibaya inde asishir wo. ²⁶ Wur otshia alog ne buu, akr abong ne nteang ende, ndenden: "Nkum, tokampea nshu, ayafutame ibaya iyie inkum." ²⁷ Mby, nkum e wur otshia enagn oyug ngy, olima ibaya inde inkum, osianga akien. ²⁸ Wur otshia enagn apwe atsangyen ewur ende emuu e otshia eyii mpi n'ibaya inde ekri nkama. Okir emar ne nking, ndenden: "Futa ibaya ime." ²⁹ Kansi ewur ende othia alog ne nteang ende, olama ndenden: "Tokakwung, ayofutame ibaya iyie." ³⁰ Kansi wur otshia e nteang enagn atun; atsantwomo ewur ende ne bolog ndenden tii ko eshuu eyafuta nde ibaya iwo. ³¹ Ntangu emiyen iwur inde otshia imuu inagn vii amikie nde, wayug ngy entsign; s'atshiwo nkaba nkum ewo otshia vii ankum amileg. ³² Mby nkum e wur otshia enagn s'oviinde, atuba nda nde ndenden: "Yie, oli wur wur otshia epwo, oyug me ngy n'ibaya ime djwi aling yie mololuli. ³³ Opikug ngyug otwung oyie ngy ve oshin eyoyug me yie?" ³⁴ Nkum ende s'ayug nde nkier, s'otum nde ne bolog tii ko eshuu eyafuta nde ekri enkum. ³⁵ Enagn eli oshin eyokiagni Tea me ne dzug yug wur na wur akaleang ndima ipwo otwung onde n'etura emog."