¹ Ne mby e nshuu isom, Yezu avey Petelo, Jaki ti otwung onde Yoane, s'avarinde n'ikri, ne dzug ombimi etitey. ² Djuung inde isongo ne nteang ewo. Elung ende epiey kamsi vuna, ileam inde ikum siy kamsi mwinda. ³ Yenaka, Moize, ti Elia wapwe, s'asulikiwo ti nde. ⁴ Petelo atuba nda Yezu ndenden: "Nkum, Eli wuo djwi na su sisayia nendien. Yug oleang, ntwung atsug asar, emog djwi na yie, emuu djwi na Moize, mby emuu djwi na Elia." ⁵ Ntangu etubikinde, mafuba emog epiey kamsi mwinda, eyia ndzub wo. Otuba omog epwe ne mafuba inagn, etuba: "Ene eli Mon me eleang me entsign, atsame mvea osiang ome ya nde. Yugagni nde." ⁶ Ntangu emiyug walongoki vii anagn, s'ayug wo womo entsign, walogo ilung iwo ne buu. ⁷ Mby Yezu ayia, akir ne djuung ndenden: "Yimagni, oyayugagni womo ve." ⁸ Emikeawo ndir dzug, wasayen ko Yezu ndemie. ⁹ Ntangu elekrikiwo n'ombimi, Yezu atuba nda wo ndenden; "Emono emiyen gnu ene, oyakabagni ata wur emog ve, tii koyug Mon-wur atikeambiy n'ewa." ¹⁰ Walongoki inde s'ojwiwo wuwun: "Djwi na nge walong i nsiku atsawo ntuba wuwun ekug wuo Elia atigni ngya nteang?" ¹¹ Yezu akeara ndenden: "Eli vi-a-vii, Elia afwete ngya nteang djwi awong vim ankum. ¹² Kansi me, mokabagni: Elia amiyia ntama, kansi wakojia ve, wamokie oshin onkum oyileang wo. Oshin omog mpi, Mon-wur ayayen nde mpay ne mbwo iwo. ¹³ Mby walongoki s'ajiiwo wuwun atuba djwi na Yoane-Mbotiki. ¹⁴ Ntangu emikeawo ondii oli oluy o vear, wur emog ayia etay eli Yezu, akr abong ne buu ne nteang ende, ¹⁵ ndenden: "Nkum, yug ngy e mon me ompeam. Atsande ndog na nkeang ompay mpi atsande ngyen mpay entsign. Atsande ndog emuu ne tshiya, ata ne vay. ¹⁶ Ntojie etay e walongoki iyie kansi wakakug n'omvuga ve." ¹⁷ Yezu okeara ndenden: "Vear apileang ndjir ene, aman apwo! Ayayiakame ti gnu tii nsuka nonkagn? Ayajirakame vii agnu tii nsuka nonkagn? Onjiagni mon ewo nendien!" ¹⁸ Yezu angnianga mpeve epwo enagn, mby s'apwinde ne djuung inde. Mon ompeam ewo s'avug nde ko ne ntangu enagn. ¹⁹ Mby walongoki s'aleyikiwo emog-emog etay e Yezu, wuwun: "Djwi a nge su, sikakug na nkma meve epwo enagn?" ²⁰ Eli ko djwi lukwikilu egnu eli okieg. Djwi, mokabagni, vi-a-vii, yug otoyiagni na lukwikilu onen kamsi ebeam e ekung, anakug gnu ntuba ya ombimi one: "Lim nendien, tshwag mpign," asitsande, kaku vim esikwon yie ve." ²¹ Kansi oshin o mpeve epwo ene, atsande mpwe ko na bisamu ti nkn okio. ²² Ntangu eletear wo ne Galilea, Yezu atuba nda walongki inde: "Ayasar wo Mon-wur ne mbwo i vear; ²³ mby ayodjag wo, eshuu otatu, ayakeande mbiy n'ewa." Walongoki wakum ko ngy-ngy. ²⁴ Ntangu emikum wo ne Kapernaum, vear aleveyike ekri e mpaku djwi na tempelo wayia njue Petelo wuwun: "Djwi na nge nkum egnu apifutinde mpaku i tempelo?" ²⁵ Petelo akeara ndenden: "Atsande mfuta." Ntangu emishwe Petelo neti evuru, Yezu asiang odzum nteang, nda Petelo ndenden: "Simoni, oyen esing, wavuy ili ne buu ene, atsawo mvey ekri e mpaku ya nagn? Ya ankea wiya go ya angingien?" ²⁶ Petelo okeara ndenden: "Ya angingien." Yezu atuba nda nde ndenden: "Ankea wiya wapikug mfuta ve." ²⁷ Kasi djwi vear aley ekri e mpaku ene wakwon nkie masumu, tshwag ne nzey, twomo ndob, ntse e nteang esibin yie, ntangu esingama yie odzum onde, asiyen yie ekri neti. Vey, yag ofuti vear ane mpaku iyie ti ime."