¹ Wafarize ti wa saduse wayia etay e Yezu djwi na ndob nde odzum, waling aki kidimu emog eyim dzug wayen. ² Kansi Yezu akeara: "Epiekuo yug olung otitie, gnugnun: Nampign olung ayayia wo wuo, djwi olung eli ngatie." ³ Ne suka yug olung otipir, gnugnun: "Lwo ene mvuye asitenag nde, djwi olung otipir. Ojiangi ntendula oshin oyen gnu olung, kansi opikugagni ntendula bidimu i nshu ine ve. ⁴ Okuu aman apuo ti kinduma waling ko kidimu, kansi kaku ata kidimu emog eyapeame ve, ko eyii Jonasi." Mby Yezu s'alim nde kog s'akien nde. ⁵ Walongoki ntangu emibag wo nky e nzey, watisajing na mvey mampa. ⁶ Yezu nda wo ndenden: "Osugagni na ete e mampa e wafarize ti wasaduse." ⁷ Walongoki wabansa wog na wog mpi wa tuba: "Nge eli djwi sikavey mampa?" ⁸ Yezu ajia vii awo, atuba ndenden: "Vear a lukwikilu ekieg ene, djwi na nge ebansa gnu gnug na gnug djwi na mampa ikavey gnu? ⁹ Kaku gnu na waagn ve mpi opikanagni mampa itean eyili awugu atean a vear, imwama ikue imisatsuga? ¹⁰ Ata mampa ishimbia iyili awugu anign a vear, imwama ikwe iyisagnu tongo? ¹¹ Djwi na nge epikug gnu njia gnugnun epa ntuba djwi na mampa ve? Osugagni, luragni ete e mampa e wafarize ti wasaduse." ¹² Mby s'ajiwo wuwun atubikinde nda wo na ngyia na waagn na along a wafarize ti e wasaduse. ¹³ Ntangu emikum Yezu ne buu e Sezare e nkum Filipu, ayue walongoki inde ndenden: "Vear atsawo ntuba wo me Mon-wur alime nagn?" ¹⁴ Wakeara wuwun: "Amuu watuba wuwun oli Yoane-Mbotiki, amuu wuwun oli Elia, amuu wuwun oli Jeremia, go oli ngunsa emog e ntama." ¹⁵ Atuba nda wo ndenden: "Mby gnu, atsagnu ntuba gnugnun me ndi nagn?" ¹⁶ Simoni-Petelo okeara ndenden: "Oli Kristu Mon e Nzeam e luzingu." ¹⁷ Yezu akeara ndenden: "Oli na lusakumuna, Simoni mon e Yonasi, djwi epa djuung ti aluung vim emokaba yie vii anagn ve, kansi eli Tea me eli ne dzug. ¹⁸ Mokaba memen oli Itari. Ne dzug itari inagn, ayatwung me evuru eme e Nzeam. Ipfug i wiya e bafwa ipokie vim ve. ¹⁹ Ayopeame nsab ekub e dzug. Vim enkum eyatshung yie ne buu ayatshung wo mpi ne dzug, vim enkum mpi eyangama yie ne buu ayangama wo ne dzug." ²⁰ Mby Yezu s'atubinde nda walongoki inde na nkwon nkaba ata wur ve ndenden ali Kristu. ²¹ Yim kog enagn, Yezu s'abanikinde nkaba walongoki inde ndende afwete ntsa Yeruzalem, mpiog, antsuru a dibundu, ankum a wanganga-Nzambi ti walong i nsiku ayopeawo mpay, ayodjag wo, ayakeande mbiy n'ewa ne nshu isar. ²² Mby Petelo ovie n'ikri, ongnianga ndenden: "Nkum, vii ane elim etey na yie, epikug ndog ya yie ve." ²³ Mby Yezu akeantshim, nda Petelo ndenden: "Kea mby, satana! Oli ibaag djwi na me, djwi kaku yie na ngy e vii a Nzeam ve, ko e vii a vear." ²⁴ Mby Yezu atuba nda walongoki inde ndenden: "Wur eling ndana me, asiangi vii ande ndemie, avari kulunsi ende mby ansandana. ²⁵ Djwi, wur eling mvuga luzingu ende, ayafanga nde wog, mpi wur esifanga luzingu ende djwi na me, asikeande mvea wog. ²⁶ Djwi, mfunu nge ya wur, yug ativea buu ene enkum kansi afangi luzingu ende? Wur asikug nde nsongo luzingu ti vim nge? ²⁷ Djwi Mon-wur ayayiande na nkembo e Tea nde, ti banzio inde. Mby ayapeande wur na wur ifutu inde n'etshia ende. ²⁸ Mokabagni vi-a-vii, amuu ne kati egnu nendien, wapayawa ve yug watoyen Mon-wur aleye n'ekub ende."