¹ Wakati Yesu ayomwi longela malongelo goti, abakiye wanapunzi bake, ² "Mutangite baada ya masoba gabele kwalowa baa na lisoba lya pasaka, na mwana wa Adamu apiyilwa linga bakongele."

³ Baada ya bakuu ba makuhani na apindo ba bandu bakwembanike pamope mu'ukumbi wa kuhani nkolo, ywakemelwage Kayafa. ⁴ Kwa pamope bapangite mpango wa kumoywa Yesu kwa siri na kumulaga. ⁵ Mana batibaya, kana ipangike lisoba lya sikukuu, yakana yoka puyo kwa baadhi ya bandu."

⁶ Wakati Yesu paabile Bethania mu'nyumba ya Simoni ywabile nkoma, ⁷ pagoloki pameza, nnwawa yumo aisi kachake abile apotwi kikoba chakibile na mauta ga garama ngolo, aijitii mu mutwe wake. ⁸ Lakini wanapunzi bake bapakibweni kitendo choo, batichukya muno no baya, mwanja namani upangite nyoo. ⁹ Aga tulowe weza pemeya kwa kiasi kikolo na kwapeya maskini."

¹⁰ Lakini Yesu ayomwile tanga lee, ngababakiya, "Mwanza na matusuluya nnwawa yoo? Kwa kuwa apangite kilebe kinanoga kasango. ¹¹ Maskini mubile nabo kila lisoba, lakini mutama kwaa na nenga kila lisoba. ¹² Kwa mwanza panijili maula payega yango, apangite nyo kwa mwanza ya kunisika kwango. ¹³ Kweli nenda kwamakiya, popote payahubiliwa injili pakilambo chote, kitendo cha kipangite ayo nnwawa, chalowa pangilwa kwa mwaya kombokya."

¹⁴ Nga yumo nkati ya balo komi na ibele, ywakemelwa Yuda Iskariote, ayei kwa apindo ba makuhani, ¹⁵ no baya, "Mwalowa mbeya namani mana ninangile?" Ngaba mpimiya Yuda ipande thelathini ya mbanje. ¹⁶ Buka muda wo apalange nafasi ya kwalangya.

¹⁷ Hata lisoba lya kwanza lya mikate yange lola, anapunzi banyendeli Yesu na kumakiya, "Kwaako kupala tukutayarishie ulye chakulya cha Pasaka?"

¹⁸ Ngabakiya, "Muyende mjini kwa mundu fulani na mumakiye, mwalimu abaya, "Muda wango uyomwike. Nicha yomolya pasaka pamope na anapunzi bango munyumba yako." ¹⁹ Wanapunzi gabapanga kati Yesu mwalangile, batayarishe chakulya cha Pasaka.

²⁰ Pasaka iikite kitamunyo, atami lya chakulya pamope na anapunzi bake balo komi na ibele. ²¹ Pabile kabalya chakulya, atibaya, "Kweli nenda kwabakiya panga pakatikati yinu yumo apala kunisaliti.

²² Batihuzunika muno, na kila yumo ande kunaluya, "Nenga buli kwa, Ngwana?"

²³ Kayangwa, aywo ywasanja pamope na nenga mubakuri ngalowa kunisaliti. ²⁴ Mwana wa Adamu endabuka, kati mwaiandikilwe. Ila ole wake mundu ywasaliti mwana wa Adamu! Yanogite bora mundu ywo akakotoka belekwa."

²⁵ Yuda ywapala kusaliti atibaya, "Je, nenga mwalimu?" Yesu kammakiya, "Ngawenga wolongela."

²⁶ Pababile kaba lya chakulya, Yesu autweti nkate, atikubariki, na metwana. Apei wanapunzi bake no baya, "Mutole, mulye. Aye yega yango." ²⁷ Ngatola kikombe no shukuru, ngapeya no baya, Munye mwabote mukikombe chee. ²⁸ Kwa mwanja aye maiyango yo lagano kwango, yaipenganika kwa sababu banansima kwa kwasamiya sambi. ²⁹ Lakini nenda kuamakiya, nanywali kae matunda ya zabibu go, ata lisoba lelo lyana lowanywa pamope namwee ku'utawala wa Tate bango."

³⁰ Payomwile yemba mwambo, batiboka yenda kukitombe cha mizeituni. ³¹ Boka po Yesu atikwabakiya, "Kilo cheno mwabote walowa kwikobala kwa mwanja nenge, kwasababu itiandikilwa, Nalowa kukombwa mchungaji na ngondolo bakikundi basambalatika. ³² Lakini baada yo yoka kwango, nalowa longolya yenda Galilaya."

³³ Lakini Petro atikummakiya, "Hata mana itei bote bakukani kwa mwanja ya makowe gagalowa kupata, Nenga nikukana kwaa.

³⁴ Yesu kannyangwa, "Kweli nenda kuabakiya, kilo cheno ngoko nanome anabeka kwaa, alowa kunikana mara itatu."

³⁵ Petro ngamakiya, hata mana itei waa na wenga, nikukana kwaa. "Na wanapunzi bake benge bote babaite nyonyonyo.

³⁶ Baadae Yesu ayei nabo pandu papakemelwa. Gethsemane atikwabakiya anapunzi bake, "Mutame paa wakati paniyenda loba apo." ³⁷ Apotwi Petro na bana abele ba Zebedayo ngatumbwa huzunika na sikitika. ³⁸ Boka po atikwabakiya, "Roho yango yenda minya muno, hata kiasi cho waa. Mwiigale papamukeshe loba nanee." ³⁹ Ayei nnonge pachene, kalola pae wa kukama, no loba, Tate bango, mana kewezekana, kikombe sekinipele, kana ipange kati mwanipala nenga, ila kati mwamupata mwee." ⁴⁰ Ngayendeya anapunzi kakolya bangonjike lugono, ngamakiya Petro, mwanja namani ukotwike keleka pamope na nee kwa lisaa limo? ⁴¹ Mukeleke mulobe linga kana uyingii mumajaribu. Roho ibile radhi bai, lakini yega ibii zaipu." ⁴² Atiboka kae mara yene ibele yoloba, "Tate bango, mana itei likowe lee ngwesa kwaa kulikwepa na lazima nikinyweli kikombe chee, mwamupendi mwenga itimii," ⁴³ Kaabuya kae aisi kwakolya bagonjike lugono, mana minyo gabe gabi matopau. ⁴⁴ Ngabakiya kae kaboka ngayengda loba mara yenge itatu kabaya makowe gagalo. ⁴⁵ Baadae Yesu ayendeli anapunzi bake nakwabakiya, "Bado mugonjike na pomolya? Mulinge saa iegelile, mwana wa Adamu endasa litiwa mmokoya bene sambi. ⁴⁶ Muyumuke tuboke. Mulinge yolo ywapala kunisaliti aegelite."

⁴⁷ Wakati abibalo kalongela, Yuda yumo kati ya balo komi na ibele, atiisa. Kipenga sa bandu chatiisa nabo, kaliboka kwa apindo ba makuhani na apindo ba bandu. Baisi na mapanga na ndolonga. ⁴⁸ Na mundu ywakusudie Yesu ampei ishara, atibaya, yoloywa nannoniya ngaywo. Mwamoywe." ⁴⁹ Mra ngaisa kwa Yesu no baya, "Salamu, mwalimu!" Nakunnoniya.

⁵⁰ Yesu ngammakiya, "Webwiga lyango, Ulipange lelo lya likuletike," Ngabaisa kumoywa Yesu na maboko gabe. ⁵¹ Lola, mundu yumo ywabile pamope na Yesu, ngasolomwa kyembe na kumkombwa mmanda wa ntumwa nkolo na kukata likutu lyake. ⁵² Nga Yesu kaamakiya, "kelebuya lipanga lyako mulupata lwake. Kwa mwanza bote babatumya lipanga balowa polota kwa lipanga. ⁵³ Muwasa panga ngwesa kwaa kwakema Tate bango, naywembe alowezekunilumya majeshi zaidi ya komi na ibele ba malaika? ⁵⁴ Lakini kwa kitiwi gagaandikilwe gaweza timya, aga ngagapalikwa gapiti?" ⁵⁵ Wakati woo Yesu kakikoya chelo kipenga sa bandu, "Mbona mwisi na mapanga na mandolonga kuniboywa kati na mwii? Kila lisoba natami muhekalu kanipundisa, mwaniboywi kwaa! ⁵⁶ Lakini aga gote gapangike lenga maandiko ya manabii gatimii." Nga anapunzi bake kabanneka na kabatila.

⁵⁷ Balo babamoywile Yesu bampeike kwaa Kayfa, kuhani nkolo, pandu pabakusanyike aandishi na apindo babile bakusanyilwe pamope. ⁵⁸ Lakini Petro atikukengama msongo kwakutalu mpaka mukumbi wa kuhani nkolo. Ajingii munyumba notama pamope na alinzi akibone chakilowa pangila. ⁵⁹ Bai apindo amakuhani na baraza lyote babile kabapala ushaidi wa ubocho kwa Yesu, lenga bate kumulaga. ⁶⁰ Ijapo bapitike mashahidi banansima, lakini bapatike kwa sababu. Ila baadae mashaidi abele bati kwipiya nnonge ⁶¹ no baya, "Mundu yo atibaya "Ngwesa kulibomwana hekalu lya Nnongo na kuchenga kwa masoba gatatu."

⁶² Kuhani nkolo kayema na kunaluya, "Huweza kwaa yangwa? Hababakushitakya namani wenga?" ⁶³ Lakini Yesu atami liki. Kuhani kulo ngamakiya, "Kati Nnongo mwabile, nenda kulasimisha utubakiye, panga wenga wa Kristo, wa mwana wa Nnongo."

⁶⁴ Yesu kayangwa, "Wenga wa mwene ubaite likowe lyo. Lakini enakubakiya, boka sayeno no yendelya wamona mwana wa Adamu atami kuluboko lwa mmalyo lwene ngupu, na kaida mu maunde ga kunani."

⁶⁵ Nga kuhani nkolo kalendwana ngobo yake no baya, Atikupuru! Je, tupala kae ushahidi wakele? Linge, tayari muyowine kakufuru. ⁶⁶ Je! Muwaza namani? Ngabayangwa no baya. "Ipalikwa awee." ⁶⁷ Ngaba mwuniya mata kuminya na kukombwa makofi kwa maboko gabe, ⁶⁸ no baya, ututabilie wenga wa Kristo. Naiywa kukombwile?"

⁶⁹ Wakati wo Petro atami panja kuhukumbi, amanda alwawa batikunnyendelya no baya, "Wenga wabi pamope na Yesu wa Galilaya.

⁷⁰ Lakini atikana nnonge yabote, ngabaya nee nitangite kwaa chaakibaya."

⁷¹ Payei pannango, mmanda ywenge nwawa atikumona na kwabakiya bababile apo, 'Mundu yoo nembe abile pamope na Yesu wa Nazareti.

⁷² Ngankana kae kwa kulapa, "Nenga nintangite kwaa mundu yolo."

⁷³ Muda mwipi baadae, balobabayemi karibu, batiyenda yolongela na Petro, kwa kweli wenga wipamope nakwe, kwa mana hata longela kwako kwenda yowanika.

⁷⁴ Nga tumbwa lapangwa no lapa, 'Nenga nitangite kwa mundu yoo," Mara ngoko kabeka.

⁷⁵ Petro kakombokya makowe gamakiye Yesu. Pai panga kabla ngoko anabeka kwaa walowa nikana mara itatu. Ngapita panja kono kalela.