¹ Cunkawnah Bawipa cu ng'hleiko khan ah kai ne tuinu hei kat neta a awm nak mango ah hteit ci. ² Cunkawnah chang gui naw, a ip nak ung gawi ne ng’yän cicu a pei ah law püi ci gui. Jesuh naw ngami ah yumnak a hmuh law ung, a kutkhaw ng’khem ci awn, “Ka hta aw, kä ng’ä vä. Na katnak gui, kaning ng'ngaih pe pyi ci” ciah pyein nak ci.

³ A cunung Cacim saya amshah naw, “Shinah k’chang naw Khanpughi katnak ci” ciah tumat la tumat pyein ci gui. ⁴ Jesuh naw ami ng'ngaktüh gui hmat neta, “Ikyasei nami m’lungkyong ung akshe nami ng'ngaktüh ang? ⁵ 'Na katnak gui kaning ng'ngaih pe pyi ci' ci lah, 'Ng’düi ne hteit ä' ciah pyein ung a i cu ng'hloi pi ne ma? ⁶ Cunte, Chang ah Htapa cu khomdek ah khan ah hmakatnak gui phyawn hning ciah a mawng nami hmat vai a' cine a pyein nak gui kawnah a kut-khaw ng’khem ci awn, 'Ng’düi ä. Na ng'khuih-phah k'tom ne na im ah hteit ba ä' cine pyein nak ci. ⁷ A cun vai awn, a kut-khaw ng’khem cicu ng’düi ne a im ah hteit ba ci. ⁸ Shinah a mawng gui hmuk ciah chang gui naw kyihkyawk u ne, chang gui awn shinah mäih huham pek ciah Khanpughi ah bawimangnak cu, m'hlümtai ci gui. ⁹ Cunkawnah, Jesuh cu acun ungka a hteh law ung a khon louk nak ah hmun ung ngok ciah Matthe ah ng'ming nak cicu hmu ne, “Ka hnu ah na läk ä” ciah pyein na sei, ani naw ng'düi law ne Bawipa ah a hnu läk ci.

¹⁰ Cunkawnah, Bawipa cu imkyong ah eiphya pei ah a ngawh sang ung, ng'lohton louk ci gui cu hmakat chang gui mah mah ah, Jesuh awn atäng ah, eiphya vun ne, ngok ci gui. ¹¹ Cun cu Pharisee gui naw hmuh u ne, a ng’düihpüi gui awn, "Nami saya cu ikyasei ng'lohton louk gui la hmakat chang gui awn atäng ah ami eiawk ghom ma?" Ciah ng'shik ci gui.

¹² Bawipa naw cunah ng'thu cu ng'ya ne, "Gai ci gui naw sei saya cu kä hlü ci gui. Kä gai ci gui bäng naw vah hlü ci gui. ¹³ 'Kei na douthak law u ne nami na khawihnah ah mä, chang hei nami khimgein vaiah ka ng'ya hlük ci' ciah Cacim naw a pyein hlü ah mawngma cu, hteit ne va ng'thei tu vä. Ikyaseiciung ng’düng ci gui khü vaiah kä ka lawk ci. Hmakat chang gui khü vaiah ka lawk ci” ciah pyein ci.

¹⁴ Cunkawnah Johan ah ng’düihpüi gui naw law u ne, “Keimi la Pharisee gui cu a shäng shäng seih, ei kami hlawi tu pang ah phi, nang Bawipa ah na ng’düihpüi gui cu, ikyasei ei kä ami hlawi tu ma?" Ciah ng’shik ci gui.

¹⁵ Jesuh naw, “Hta m’um ciah chang cu a teihpüi gui awn atäng ah ami awm sang ung, thüikyap khai ma? Cunte Hta m’um ciah chang cu ngami awn ami ng’cha law hnüp gawk lawk khai. Cunkawnah ngami cu ei hlawi lawk khai gui nei. ¹⁶ A u naw phi sui k’thai cu sui phyim awn kä k'bem man ci. Cunah k'bem ung akthai naw akphyim cu ei sei akpawk ng’shawng thei ci. ¹⁷ Acunah mäih ah sapyit tui k’thai cu um-phyim ung kä than man. Cunah than ung um cu pawk ne sapyitui ng'hloi law ne, um phi di khai. Um k’thai ung sapyitui k’thai vah than man ah kyak ci. Cunah than ung ani k'hnih kä di khai.

¹⁸ Bawipa naw a shinah mawng gui a pyein sang ung, a ng’vai tumat law ne Bawipa ma ah m'khukhudawng ne, “Ka hta hnumi cu a tukbäih shik ci. Cunte, nang Bawipa naw hteit ne, akkhan ah na kut na taih ung ghing ba khai” ciah ng’hungpa nak ci. ¹⁹ Jesuh cu ng’düi law ne a hnuläk gui awn atäng ah ani ah hnu ah läk ci gui.

²⁰ A cun ung khokum gha-lei-goi lüng, shi ah ng'chawng ne gawpai ciah hnumi tumat naw, ²¹ “Bawipa ah a sui düt ka ton ung, ka gai ba khai” ciah a m’lung ung ng'ngaktüh ne, Bawipa ah hnu ah k'et neta, a sui m’dawng cu va ton ci.

²² Jesuh naw ng’hlat ne ani cu hmuh neta, “Ka hta aw, kä na ng’ä vai. Na yumnak naw ning gai sak pyi ci” ciah pyein ci. A cun van awn, cunah hnumi cu gai ba ci. ²³ Cunkawnah Jesuh cu cunah ng’vaihta ah im ah gawk ne, tumkhawng ci la papcai ciah chang gui cu hmu gui neta, ²⁴ “Ng’nawn vä. Hnumihta cu kä shik ci. Ip ci nei” ciah pyein ci. A cun ung Bawipa cu gaihgim tuk ci gui. ²⁵ Bawipa naw chang gui cu k'pung ah a hteh sak gui kawnah, akkyong ah va lut ne, hnumihta a kut cu k'pang sei, hnumihta cu tho ne, ng'düi lawk ci. ²⁶ Shinah a mawng ma cu, cunah kho hmun van ung yat yawp ci.

²⁷ Jesuh cu cun ungka naw a law ba sang ung, ani mik m’dah ciah chang hnih naw a hnu ah läk nine, “David ah htapa, keini na m’gein goi ä” ciah m’lau ci goi.

²⁸ Imkyong ah a valuh vu ung, a mik m’dah goi naw a pei ah k'et lawk ci goi. Bawipa naw, “Shinah mawng cu kei naw ka m’khütnäng ah mawng cu nani yum naw?" Ciah ng'shi goi sei, "Kani yum ci nei Bawipa" ciah m'shang ba ci goi.

²⁹ A cun ung Jesuh naw ngani ah mik-ui cu tawk neta, “Nani yum ah mäih ah kya sä” ciah pyein sei; ³⁰ Ani mik cu m’dei ba ci. Jesuh naw, “A u naw phi kä hmat-ein vaiah, m'htei na niä" ciah m'cäi goi ci. ³¹ Cunte, ngani cu hteit ni ne, Bawipa ah mawngma gui cu cunah khohmun van ung yatsak ci goi.

³² Ngani ani ng’hlat ba vai awn, khokshe naw a kai nak ah chang tumat cu a pei ah law püi ci gui. ³³ Khokshe a gawt kawnah cunah chang cu ng'thu ba thei ci. Chang gui naw cäi u ne, “Israel pakhui ung shinah mäih kä hmuh man” ciah pyein ci gui.

³⁴ Cunte, Pharisee gui naw, “Khokshe ng’vai cu ng'ngaih-u neta, khokshe gui a gawit nei” ciah pyein ci gui.

³⁵ Cunkawnah, Jesuh cu Mango pigaw van ung hteit ne, ng’bumnak im gui ung ng’thu pyein ne, Khanpughi ah uknak kho a mawng ng’thu k'ni m’thein gui neta, kheilei a päng päng la natnak päng päng gui nü ungka, gai ba sak gui ci. ³⁶ Bawipa naw chang ng’bum hmuh ne, ngami cu htoshäm kä awm ciah hto vai süah, kä tälek u sei, ami m'lung bawngbai u sei, ngami gui cu khimgein gui ci. ³⁷ A cun ung Jesuh naw, "Khäm vai htamguh akda awm pangsei phi, khäm khai ah chang ken aih ci. ³⁸ Cunkyasei, khäm vaiah a khutbi gui a tüih law vaiah htamguh kaa nak ciah Bawi ah taigü vä” ciah a ng’düihpüi gui awn pyein na gui ci.