¹ Cunkawnah, Bawipa naw a ng’düipüi ghaleigoi cu khü gui ne, khokshe gui gawt vaiah phi kya, natnak a hnga hnga gui dimsak vai phi kya, ami bilawh vaiah tüi gui ci. ² A ng’düihpüi gui gha-lei-goi ah ami ng'ming cu, ma pi bäih ne, Peter ciah khü ah Simon, a nau Andrew, Zebedee ah a hta goi James la a nau Johan; ³ Philip la Bartholomew, Thomas la ng'lohton dou ciah chang Matthew, Alphaeus ah hta James la Thaddaeus; ⁴ Canaanite chang Simon la, Bawipa yoi ciah Judas Iscariot guiah kyak ci gui.

⁵ Jesuh naw a ng’düihpüi gui tüi gui ne, shinah m'cäi gui ci: "Khuihei guiah kä nami hteh vai. Samaritan chang guiah ami mango la pigaw ah kä nami luh vai. ⁶ Israel chang gui cu chük maih ciah tho gui vai süah kya u sei, ngami ah awm nak bäng ah nami hteh vai. ⁷ Nami hteh sang ung khankho uknak ng'et lawk ci ciah ng’thu pyein vä. ⁸ Gopyam ci gaigong sak vä. Shik ci gui thawh ba sak vä. Kheilei naw a ei gui theing sak vä. Khokshe gui, gawt vä. A phu kä peit ah nami gah tang ah kyasei, a phu kä lak ah pe vä. ⁹ Nami shomguui ung ghui, ngui, la kyei gui cu kä ng'shäm-ein vä. ¹⁰ Tuilam ungka vaiah, ng’ya, k’htu, khodawk, ng’shohtung m'shawih ne kä nami ng’shäm vai. Ikyaseiciung, bi bik cicu tumbei vai khin ci. ¹¹ Mango, Pigaw ung nami hteh law ung, a u ah im ah hteh khin nei cicu, ng’shi u ne, cunah kho ungka kä nami luh law ba pha güt, cunah im ung nami awm tu vai. ¹² Im tumatmat ah nami luh law phung ung, phun shen sä ciah nami pyein vai. ¹³ Cunah im cu a khinkha ung nami pyein ah phunshen cu gawk khai. Kä a khinkha ung nami mät ah gawk law ba khai. ¹⁴ Ani naw kä ning douchang gui ne, nami ng’thu phi kä a ngaih ung, a im ungka naw phi kya, mango ungka naw phi kya, nami luh law ba ung nami khawpha ungka m’vutkhui cu, nami khawk shüt vai. ¹⁵ Kei naw akcang ka pyein khai. Ng’thu m’cha nak hnüp ung cunah mango cu Sodom la Gomorrah ah mä tä pi khai.

¹⁶ Sa-ui guiah hmu ah htome gui chah ah mäih ah, kaning tüi gui ci. Cunkyasei k’phyu mäih ah cüivai u ne, a m’äm kä awm ciah mümkha ah mäih ah nami awm vai. ¹⁷ Chang gui cu m'htei na vä. Ikyaseiciung m’shumchaknak im ah ning ap khai gui. Ami pumnak im gui ung ning that khai gui. ¹⁸ Cunah chang gui ung tün ne, khuihei gui ung hmukshing chang ah nami kyaknak vaiah, mango bawi, ghangpughang guiah, kei ah hmawk ah ning ap khai gui. ¹⁹ Ami ning ap law ung i ah nami pyein vai cu kä nami ng’ä vai. Nami pyein vai ng’thu cu a cun vai awn nami gah khai. ²⁰ Ikyaseiciung, nangmi naw nami mät ah ng'ngaih ah nami pyein ah kä kyak ci. Nami pa ah Mümcha Theing naw nangmi awn a pyein ah kyak ci. ²¹ Cunah a khing ung ng'phäinau gui tumat la tumat a shih vaiah ap tukhai gui. A pa naw phi a htapa ap khai. Htanau gui naw phi ami nupa cu ng’hnuntuk püi u ne, ngon khai gui. ²² Chang nü naw kei ah ng’ming ah phäh ah, ni k'shekdam nak khai gui. A khin ava khüt ah bekhüt htiling cicu hunphyawn nak ung gawk khai. ²³ Mango tumat ung a mi ni k'shekhanak ung mango tumat ah nami dawng vai. Akcang ka pyein cu, Israel mango pigaw awm ci nü ah kä nami hteh yawp pha ung, Chang ah Htapa cu kyum lawk khai.

²⁴ A hnuläk cu a saya ah mä kä bä tuba ci. Changshäm cu a Bawi ah ta kä bä tuba ci. ²⁵ A hnuläk cu a saya mäih ah phi kya, shai cu a Bawi mäih ah phi kya, a kya ung bä khai nei. Im-mah cu Belzabub ciah ami khü ung a k'kyongchang gui cu cunah mä shekha pi khai ah khükhong khai gui. ²⁶ Cunkyasei nangmi cu kä nami kyih vai. Khum ne thup gui nü cu ng’dang lawk khai. A ng’thupnak ungka phi ng’dang lawk khai. ²⁷ Ng’hmüp khui ah kei naw kaning m’thein gui cun phi, nangmi naw a deikhang nak ah nami pyein ba vai. Nami ng'hngakoi kung ah a dümhta ah nami ng’yak gui cu, m’kyung k'khan ah ng'hawh ne pyein vä ciah pyein ah gui ci. ²⁸ Pumsa bäng ngon ne mümcha kä ngon hning cicu kä nami kyih vai. Pumsa la mümcha anik hnih cu, m'htekho ah m'di hning ciah Bawi bäng, nami kyih vai. ²⁹ Bihlii khahta hnih cu ngui phe-ät bäng awn ami yoih ah kä kya naw? Nami pa Khanpughi naw kä hmat ah, cunah bihlii khahta tumat phi m'dek khan ah kä ng'kyak ci. ³⁰ Nami lu mu ng’ma gui avan phi ning k'khe pe gui ci. ³¹ Cunkyasei kä nami kyih vai. Nangmi cu Bihllii kha guiah mä nami küikyang tuba ci. ³² Chang guiah ma ah kei na ngüm-ä ciah a u phi, khankho ah awm ciah ka pa ah ma ah, ka ngüm-ä tuba khai. ³³ Chang guiah ma ah na maa nak cicu khankho ah awm ciah ka pa ma ah, ka maa nak tuba khai.

³⁴ Khomdek khan ah dimgeinak ka law püi khai ah ka lawk ciah kä ng'ngai vä. Dimgeinak ka law püi khai ah, kä ka lawk ci. Khim ka law püi khai ah ka lawk ci. ³⁵ Apa la a htapa, a nu la a hta hnumi, tu-pu la kawihta, tumat la tumat ng'hnungtuk sak vaiah, ka lawk ci. ³⁶ Nami mät ah kyongkhui ungka cu akshekha pi nami ga ah kya lawk khai. ³⁷ Nangmi cu kei nami na m’hni ah mä, nami nupa bawh, nami htanau bawh, nami m'hni pi ah a kyak ung, ka ng'düihpüi ah nami kyak tu vaiah kä nami khinkha ci. ³⁸ Nami mät ah kutlamtung kawit ne ka hnu ah kä nami na läk hlü ung, ka ng'düihpüi ah nami kyak vai kä nami khinkha ci. ³⁹ Nami mät ah hnun ghinnak vai bäng nami k'tha nak ung, nami ghinnak maih khai. Kei ah hmawk ah a ghinnak pek cicu ghinnak hmuk khai.

⁴⁰ Nangmi ning douchang gui ci naw kei na douchang ciah kyak ci. Kei na douchang cicu na tüi lawk ci a douchan ah kyak ci. ⁴¹ Prophet ah hmai teng ne profet douchang cicu ani ungka a ng'cheng gah khai. Ng’düng ciah chang ah mikhmai teng ne, douchang cicu ani ungka a ng'cheng gah khai. ⁴² Ka ng’düihpüi chang ah hmai teng ne, shinah chang tumat mat awn tui khap-ät tu tuk ci a u phi, a ng'cheng kä gah ah kä awm khai ciah kei naw akcang ka pyein ci, "ciah m’cäi gui ci.