¹ Cunah a ng'düihpüi ghaleigoi awn a päng avan a m'cumcäi gui kawnah, mango pigo gui ung m'theimthang gui vaiah phi kya, ng'thu m'thein gui vaiah phi kya, a cun ungka naw hteit ci. ² Bawipa ah bilawh gui Johan naw thawng khui ungka naw a ng'yak law ung, a hnuläk k'hnih cu tüi ne, "Nang Bawipa cu kyum lawk ci akcang ah na kya naw? ³ Käcung, a hei kami gin vai ma?" Ciah ng'shi sak gui ci.

⁴ Jesuh naw, "Nami hmuh ng'yak gui cu hteit ne m'thein vä. ⁵ A mik m'dah ci gui naw hmu pyi ci gui. Ami khaw ng'khem ci gui cu m'khan ba pyi ci gui. Kheilei naw a ei gui phi theing pyi ci gui. Ami k'hnga pang ci gui naw ng'ya ba pyi ci gui. Shik ci gui ghing ne thawh ba pyi ci gui. Dukhaih ci gui naw ng'thu k'ni ng'ya pyi ci gui. ⁶ Kei ah phäh ah a m'lung-ngaih kä ng'khunghlat cicu a phun shen ci.

⁷ Ngami ami hteh ba kawnah Jesuh naw Johan ah mawng pyein ci: Nangmi cu a i nami shui khai ah k'khokpya ah nami hteh? Kho naw khi sei hnün ciah vaipum nami teng khai maa nami hteh? ⁸ Käcung, hnip-awi ciah sui, sui ciah chang nami hmuk khai ah maa nami hteh? Hnip-awi ciah sui, sui ci gui cu ghangpughang ah mang-im ung nei om ci gui. ⁹ Profet nami hmuk khai ah nami hteit ci maa? Acun k'cang nei. Profet ah mä kükyang pi ciah phi kyak ci. ¹⁰ Cacim naw a pyein cu, 'Teng ä. Na hteh nak vaiah lam pyang khai ah ka ng'shächang cu na ma ah ka tüi ma ci' ciah a pyein ung ani a pyein ah kyak ci. ¹¹ Kei naw akcang ka pyein cu, hnumi ung ng'tüi lawk ci gui nü ung, tuiphum Johan ah mä küikyang tuba ci a u kä ng'tüi phak ci. Cunte, khankho ah a akhmaw pi cu ani ah mä kükyang tuba ci. ¹² Tuiphum Johan ah hnüp ung tün ne tuhbäih khüt seih, khankho uknak kho cu tuk-ah nak gah ci. Tu-at ci gui naw cunah kho cu khäm vaiah k'tha nak ci gui. ¹³ Kya lawk khai guiah a mawng pyein ciah profet guiah cauk gui la Moses ah ng'thumkhän gui cu Johan ah a gawk law hnüp khüt seih, ning m'theimthang gui man ci. ¹⁴ Nami douchan hning ah a kyak ung, ani cu nami ginkyo ah Elijah ah kyak ci. ¹⁵ A ng'hnga om ci phung naw, ng'ya sä. ¹⁶ Shinah ng'shonhta gui cu a i awn ka m'tumtäng vai aw? Shinah ng'shon chang gui cu hlumleinak ah hmun ung ngok ciah k'hmo gui awn täng ne ami paw gui awn shinah pyein nak ci awn täng ci: ¹⁷ Keimi naw nangmi ah phäh ah, pingpät kami ning tum pe pang ungphi, kä nami ng'lam ci. Ng'äi-kyah kami ning ng'äi pe pang ungphi, kä nami kyap ci! ¹⁸ Ikyaseiciung, Johan cu kä eiawk ah a law ung, shin gui naw, 'Ani cu khokshe naw kai nak ci' ciah kyak nak ci gui. ¹⁹ Chang ah htapa cu eiawk ne a law ung, 'Shinah chang cu ei-tat awk-tat ci phäih nei. Ng'lohton louk ci gui la chang k'she guiah pawchang phäih nei' ciah pyein ba ci gui. Cunte, Khanpughi ah cüivai nak cu bilawh nak gui awn ng'dang lawk khai.

²⁰ Cunung, a huham akda a m'dang guiah mango pigo gui cu kä ng'yu u sei, cunah mango gui cu shinah pyein ah gui ci. ²¹ "O Chorazin, nang ung phyun-nak om ci. O Bethsaida, nang ung phyunnak om ci. Ikyaseiciung, nangmi ung m'dang ah huham gui cu Tyre la Sidon gui awn m'dang ung, cunah mango gui cu acau püiah k'pyon k'she hlui u ne, m'but ung ng'thaw neta, ng'yu ba khai gui. ²² Kei naw ka pyein cu, ng'thum m'cha nak hnüp ung, nangmi cu Tyre la Sidon ah mä, tä pi khai ah nami gah khai. ²³ O Kapernaum, nang cu khankho hang khüt khai ah yäkchan nak na gah pang ung phi, m'htekho khüt khai ah ng'nem sak nak na gah khai. Ikyaseiciung, nang ung m'dang ah huham cu Sodom ung m'dang man vai sü ung, cunah mango cu tuhbäih khüt seih, khäng hngaw khai sü. ²⁴ Kei naw ka pyein cu, ng’thu m'cha nak ah hnüp ung, nang cu Sodom ah mä, nui pi khai ah na büiawit khai."

²⁵ Cunung Jesuh naw, "Khankho la khomdek uk ciah kapa, nang cu hmuthmat nak awn kümbe ci gui awn, a u awn kä m'hmu m'dang ne na thupkep ah shin gui cu, akhmaw gui awn na m'dang law ah kyasei, na bäkhäknak kaning m'hlümtai ci. ²⁶ Aw kapa, a shin cu na m'lung duk sak ciah kyak ci. ²⁷ Kapa naw a pängvan cu kei awn na ap pyi ci. Kapa ah kawnah a u naw phi, a Htapa cu kä hmat ci. Pa Khanpughi phi a Htapa la a Htapa naw a m'hmuh a m'dang hlü bäng ah kawnah a u naw kä hmat ci. ²⁸ A phüih güih ne bawngai ci phung aw, kei ah law vä. Kei naw dimdeih hüiyang nak kaning pe gui khai. ²⁹ Kei ung hnip-awi ne ng'neim ciah m'lung om ciah kyasei, ka phüih cu phüi ne kei ung ng'theingthang law vä. Cunung nami hüiyang lawk khai. ³⁰ Ikyaseiciung, ka phüih cu yäi ne yang ci, "ciah pyein ci.