¹ Cunah khinkha kyinhnüp ung, Jesuh awn kyung-htang kho ami hlunpah sang ung, a ng'düihpüi gui naw m'cawi gui sei, kyung-htang gui cu dü u ne, ei ci gui. ² Pharisee gui naw cun cu hmu u ne, "Na ng'düihpüi gui naw kyinhnüp ung kä bi vai sü bik ci gui phäih nei" ciah Bawipa cu pyein nak ci gui.

³ Bawipa naw phi, "David naw a mät ung tüin ne ani awn om ci gui ami cawi law ung, a i ami bi kä nami k'khe tu man ne maa? ⁴ Ani cu Khanpughi ah imkyong ah va lut ne, taigü ah kawnah a u naw kä ei man ah douthak m'htut cu, a mät bäng kä kya ne a paw gui naw phi kä mi ei vaiah a kyak pang ah phi ei ci gui. ⁵ Cun bäng kä kya ne, kyinhnüp ung taigü im ah om ciah taigü gui naw kyinhnüp ng'thumkhän ami phyet tu pang ah phi, kä hmakat ci guiah mawng, ng'thumkhän cauk ung kä nami khe tu man naw? ⁶ Kaning m'thein gui khai. Taigüim ah mä, küikyang tuba cicu shin ung om ci. ⁷ 'Khyükhlei ngon ne douthak ah mä, chang hei nami chimgein vaiah ka ng'ya hlü pi ci' ciah ng'thu naw a i a pyein hlü nami hmat vai sü ung, ami katnak kä om ci gui cu kä nami m'kat, kä nami m'shukchak khai sü. ⁸ Ikyaseiciung, Chang ah Htapa cu kyinhnüp ah Bawipa ah kyak ci, "ciah pyein ci.

⁹ Cunkawnah Bawipa cu cun ungka naw hteit ba ne tagazayat ah va lut ci. ¹⁰ A cun ung a kutshi tumat om sei, Bawipa ami m'kat nak hlawit vaiah, "Kyinhnüp ung gaigong sak cu ng'thu awn ng'gui naw?" Ciah ng'shik ci gui.

¹¹ Bawipa naw phi, "Nangmi gui ungka tumat mat ah htome tumat cu kyinhnüp ung m'dek khui ah a ng'kyak ung, kä la ba khai nami om naw? ¹² Chang cu htome ah mä a phu küi pi ci. Cunkyasei, kyinhnüp ung, nik ciah khut bi cu ng'thu awn ng'gui ci, "ciah pyein na gui ci. ¹³ Cunkawnah a kutshi awn, "Na kut shäng ä" ciah pyein nak ci. Ani naw a kut akshäng vai awn, a kut vang täng ah mäih ah, akni ah ghing law ne thamah lawk ci. ¹⁴ Cunung, Pharisee gui cu hteit u ne, Bawipa ngawn nak hning vaiah ngingoi ci gui.

¹⁵ Jesuh naw hmat gui neta, a hei ah ng'nawn seih, chang k'da naw a hnu ah läk u ne, ngami ah ami natnak gui päng m'gaai gui ci. ¹⁶ Ani ah a mawng cu a ng'dangshai ah kä mi pyein-ein vaiah pyein na gui ci. ¹⁷ Shin cu profet Isaiah ah ng'thu a kümnak vaiah kyak ci. A pyein ah mawngma cu, ²² Cunkawnah, chang gui naw, khokshe naw kai na seih, k'aang ne, a mik mü ciah chang tumat cu Bawipa ah law püi u sei, Bawipa naw gaai sak sei, cunah ak-aang cu ng'thu law hning ne amik phi m'dei lawk ci. ²³ Cunung, chang k'hli ami van naw cäicam u ne, "Shin cu David ah htapa ah kya hning naw?" Ciah pyein ci gui.

²⁴ Pharisee gui naw ng'ya u ne, "Shin cu khokshe guiah ami ng'vaihta Beelzebub ah huham awn khokshe gui, gawit ciah chang nei" ciah pyein ba ci gui.

²⁵ Cunung, Jesuh naw ngami ah ng'ngaktüh gui hmu gui ne, "Amät ah khopäng tumat ah kyong ah mat la mat ng'hnungtuk nak om cicu di khai. Akkyong ah ng'hnungtuk nak om ciah mango la kyongkhui phung cu kä khäng shou khai. ²⁶ Khogam naw khogam a gawit täm ung a mät ah kyong ah ng'hnungtuk nak om ci. Cunah a kyak ung, ani ah a khopäng cu a i hawkcha ah khäng shou khai ang? ²⁷ Kei naw Beelzebub ng'ngaih-u ne khokshe gui ka gawit ah a kyak ung, nangmi ah nami hta gui naw a u ah ng'ming awn cu khokshe gui ami gawit? Cunkyasei, ngami naw ng'thu ning m'cha lawk khai gui. ²⁸ Cungphih, kei naw Khanpughi ah Mümcha Theing awn khokshe gui ka gawit täm ah a kyak ung, Khanpughi ah a kho cu nangmi ah gawk law pyi ci. ²⁹ Akthamah cu akhtükbäih ah kä khitkhon ung ihawkcha ah a im ah va lut ne, a khawhcham gui cu lak hlawit vai aw? Khitkhon kawn bä bä ah vah, a im khui ah lut ne, a khawhcham gui la ne gah khai. ³⁰ Kei täng ah kä om cicu kei na ga nak ciah kyak ci. Kei awn atäng ah kä khämtawng cicu, phuphyang ciah kyak ci. ³¹ Cunkyasei, kaning m'thein gui khai. Chang gui cu Khanpughi ami pyeinmshet la ami katnak law ung, hmaphyawnnak ami gah tupang ah phi, Mümcha Theing ami katnak ung läi, kä gah hlawit khai gui. ³² Akchang paw pyein m'she ne katnak cicu ng'ngaih nak pet a gah tu pang ah phi, Mümcha Theing pyeimshek ci läi cu, a tukbäih phi kya, ngawi ah phi kya, ng'ngaih nak pet kä gah khai. ³³ A dung cu a m'theih awn hmat ah kyasei, a m'theih ani ung a dung nik ci ciah hmat vä. Käcung, a m'theih kä ani ung, adung kä nikci ciah, hmat vä. ³⁴ K'phyu k'she gui aw, chang k'she ah kya u ne, akni ah mawngma cu ihawkcha ah nami pyein hning khai aw? Ikyaseiciung, nami m'lung khui ah a be ah mäih ah, nami m'gawng naw pyein thei ci. ³⁵ Chang k'ni naw akni gui cu akchei k'ni ungka pyein thei ci. Chang k'she naw phi, akshe gui cu akchei k'she ungka pyein thei ci. ³⁶ Ka pyein khai. Chang gui cu a u kä nibä sak khai ah ami pyein ah ng'thu ng'lung guiah phä ah, ng'thumchanak hnüp ung, ng'thumchanak gah khai gui. ³⁷ Ikyaseiciung, na ng'thu ng'lung gui awn na ng'düng ciah m'hnütbäi nak na gah khai. Käcung, na pyein ah ng'thu gui awn, na kak ciah m'hnütbäinak na gah khai" ciah pyein ci.

³⁸ Cunkawn ah, Saya amshah la Pharisee amshah gui naw, "Saya aw, Na m'dang ah cäicam vai gui kami hmu hlük ci nei" ciah Bawipa awn pyein nak ci gui.

³⁹ Bawipa naw phi, "Shekha ne pletdeng ciah hta ng'shon naw cäicam vai a hmuh hlü ung, profet Jonah ah cäicam vaiah m'hmuh m'dang ah kawnah, a hei a i, kä m'dang vai. ⁴⁰ Jonah cu nga-nu ah poi khui ah m'hnüp thum a awm ah mäih ah, chang ah htapa cu m'dek khui ah m'hnüp thum awm khai. ⁴¹ Ng'thu m'cha law ung, Nineveh mango chang gui cu shinah hta ng'shon gui awn atäng ah ghingtho law ba u ne, shinah hta ng'shon ah katnak m'dang khai gui. Ikyaseiciung, ngami cu Jonah ah ng'thu ng'shä nak awn, ng'yuu ci gui. Teng vä. Shinah hmun ung, Jonah ah kükyang tuba ci om ci. ⁴² Ng'thu a m'cha law ung, a siiptäng ungka nughangpughang cu shinah hta ng'shon awn atäng ah ghingtho law bane, shinah hta ng'shon ah katnak cu m'dang lawk khai. Ikyaseiciung, ani cu Solomon ah hmuhmatnak ng'thu a ng'ngaih vaiah khomdek ah vakhütnak ungka lawk ci. Teng vä. Shinah hmun ung, Solomon ah mä, kükyang tuba ci om ci. ⁴³ Mümcha k'she cu chang ungka a lut law ba ung, kho ng'yung k'kang guiah hteit shüi shüi neta, a ng'dümnak vaiah hmun, shui thei ci. ⁴⁴ Kä a hmuh ung, ka lut law nak ah im ah ka htei ba khai cine, a gawk ba ung, cun ah im cu ng'awng ne, a ng'hlipkhoi a hmuh ung, ⁴⁵ Ani ah ta mä, shekha tuba ciah mümcha k'she chih cu khü tuba ne, cunah chang ah kyong ah lut püi gui ci. Cunah chang ah a hnutäng ah a omkya cu, a matäng ah a omkya ah mä, shekha tuba ci. Shekhak ciah shinah pakhui cu acunah mäih ah kyak khai" ciah pyein ci.

⁴⁶ Bawipa naw chang k'hli a pyein nak sang ung, Bawipa ah anu la a nau gui naw Bawipa ami ng'thu püi vaiah k'pung ah ng'düi ci gui. ⁴⁷ Chang tumat naw, "Na nu la na nau gui naw ning ng'thu püi hlü u ne, k'pung ah ng'düi ci gui nei" ciah pyein sei, ⁴⁸ Bawipa naw, "Ka nu, ka nau gui cu a u gui maa?" Cine m'thein lawk ci gui pyein nak ci. ⁴⁹ Cunkawnah, a ng'düihpüi gui cu yon gui ne, "Shin gui cu ka nu, ka nau gui nei. ⁵⁰ Khankho ah om ciah ka pa ah ng'yakhlü bik cicu ka nau, ka be, ka nu gui nei" ciah pyein ci.