¹ Acunah hnüp ung Bawipa Jesuh cu im ungka lut law ne, tuikam pei ah ngok ci. ² Chang k'hli gui cu a pei ah law u ne, ng'cut law u sei, Bawipa cu ng'hleiko khan ah kai ne ngok ci. Chang k'hli van cu tuikam k'kawng ung ngok ci gui. ³ Cun ung Bawipa naw a mawngma akda cu m'tumtängnak gui awn a m'thein law gui ung, "Ng'ngai vä. M'shii k'phu cu m'shii phu khai ah hteit ci. ⁴ A m'shii phu gui ungka amshah cu lam ung ng'kya ne kha gui naw law u ne ei ci gui. ⁵ Amshah cu m'dek ken ne lung ah da nak ung ng'kya sei, m'dek ng'pam neta a ng'ghit ah a ng'lipyo ci. ⁶ Cungphih, kho k'hni so law ne, kho a ng'ling law ung, a pya kä yu thuuk ciah kya neta, ng'yai ne kyek ci. ⁷ M'shii amshah cu ng'hling hmu ah ng'kya ne, ng'hling gui ghingdung law u ne, acun gui cu k'küp u ne khekhtek ci gui. ⁸ M'shii amshah cu kho ng'lei k'ni ung ng'kya ne a thumkip, akchukip, a phya ah pungpya ne m'theitak ci. ⁹ A ng'hna om ci phung naw ng'ya sä" cine pyein ci.

¹⁰ Cunkawnah a ng'düihpüi gui naw et law u ne, "Nang Bawipa a ikyasei, m'tumtängnak gui awn na pyein ma?" Ciah ng'shik ci gui.

¹¹ Bawipa naw, "Nangmi awn Khankho ah a thuuk ng'kau nak gui ning hmatsak gui pang ah phi, ngami awn kä hmat sak guiah kyak ci. ¹² Ikyaseiciung, om ci awn thap ne pe ba sei, ani cu ng'bühmang kümbe law pi khai. Kä om cicu ani ung om hta ci phi lak ba vai. ¹³ Shinah kyasei, kei naw ngami awn m'tumtängnak gui awn ka pyein ci. Ikyaseiciung, ngami cu hmu pang u ne phi kä hmuk ci gui. Ng'ya pang u ne phi, kä ng'yak ci gui. A uitak phi kä k'shing u sei, m'tumtäng ne ka pyein ah kyak ci.

¹⁴ Profet Isaiah naw a pyein man cu kümbe law pyi ci. A ng'thu pyein cu, 'Nangmi naw ng'ya pang u ne phi, a i kä k'shing ah nami ng'ya khai. Hmu pang u ne phi, a i kä m'khomcha ah nami hmuk khai. ¹⁶ Cungphih, nami mik naw hmu ne, nami k'hnga naw ng'ya sei phyisänak om ci. ¹⁷ Akcang kaning pyein nak gui cu, nangmi naw nami hmu gui cu profet akda gui la chang ng'düng gui naw hmu hlü pang u ne phi, kä hmu tu shüt ci gui. Nangmi naw nami ng'yak gui cu, aknui ah ng'ya tu hlü pang u ne phi, kä ng'ya shüt ci gui. ¹⁸ Cunkyasei, m'shii k'phu ah m'tumtängnak cu ng'ngai vä. ¹⁹ A u phi, a kho ah mawngma ng'thu ng'ngai ne kä akshing ung khokshe naw law ne, a m'lungkyong ah phu m'shii gui cu, la ne hteh püi yawp ci. Lam ung m'shii phu cicu, a shin pyein nak hlü ah kyak ci. ²⁰ Lung ah da nak ung m'shii phu nak cicu, ng'thu a ng'yak law ung yeikyai ne, a ng'ghit ah douchang ci. ²¹ Cungphih, ani cu a pya kä yu thuuk ne, ashäng düt ghing ci. Ng'thu ah hmawk ah thüisei khuikha nak bawh, dukdeinak bawh a gawk law ung, a ng'ghit ah kyungtäng ci. ²² Ng'hling hmu ah m'shi phu nak cicu, ng'thu a ng'yak pang ung phi, khomdek ah mawngma gui ung ng'ä ng'ai tat ne, khawhcham guiah tüitoknak naw, ng'thu cu shungkhai sei, kä m'theitak ci pyein nak hlü ah kyak ci. ²³ Kho ng'lei k'ni ung m'shii phu nak cicu, ng'thu ng'ngai ne k'shing ci pyein nak hlü ah kyak ci. Cunah mäih chang cu akcang ah m'theitak ne, amshah cu a phya, amshah cu a chukip, amshah cu akthumkip ah m'theitak ci, "ciah pyein ci.

²⁴ Bawipa naw a hei m'tumtängnak gui pe ne a pyein gui cu, "Khankho cu a lai ung m'shii k'ni phusho ci awn täng ci. ²⁵ Cungphih, chang gui ami ih sang ung ani ah ga cu law ne, kyung m'shi guiah ng'lung ah khumghaw m'shii gui phu neta hteit ba ci. ²⁶ Geitkaw gui ng'lipyo ne a dunghing law ung khumghaw dung gui phi ng'dang lawk ci. ²⁷ Cun ung lo mah ah akchangshäm gui cu law u ne, 'Bawi aw, na loma ah m'shii k'ni gui phusho ah kä kya naw? Cunah akyak ung, khumgho dung gui cu a hawi ungka ma a ng'lipyo law?' Cine ng'shik ci gui.

²⁸ Lo-mah naw phi, 'Shin cu ga ah bi ah kyak ci' cine pyein ci. Cun ung akchangshäm gui naw, 'Cunah a kyak ung keimi naw hteit u ne, khumgho dung gui cu kami mawih vai aw?' Cine ng'shik ci gui.

²⁹ Cungphih, lo-mah naw, 'Cunah kä nami ci vai. Khumgho nami mawih ah a kyak ung, kyunghtang dung gui hngaw ng'ghä khai ah a pya ungka naw nami mawih tuvet vaiah ng'ä vai kyak ci. ³⁰ Get khämnak khin khüt khai ah ani k'hnih ng'ghotai ni sä. Geitkhämnak a khin a gawk law ung geitkhäm ci gui awn, "Khumghaw dung gui cu akhtükbäih ah mawih u ne, cun gui cu mei awn m'khih vaiah, akhtau phäh phäh ah pawk u ne khit vä. Kyung-htang gui läi cu ka k'khei ah m'cun ne khäm vä" cine ka pyein khai' ciah pyein ci, "cine pyein na gui ci.

³¹ Bawipa naw a hei m'tumtängnak gui pe ne a pyein nak ba gui cu, "Khankho cu anhta-ui awn täng ci. Chang tumat naw cunah ui cu la ne, amät ah loma ah a phu law ung, ³² cun cu a ui gui nü ah mä yo pi ci. Cungphih, a ng'ghotai law ung, a hei thui-an gui ah ta mä, dämpi ne, a ng'ban gui ungphih khankhokha gui law u ne, ami ng'bu tu u neta, om hlawit khai guiah a dung ah kya lawk ci, "ciah pyein ci. ³³ Ahei m'tumtängnak a pyein nak ba gui cu, "Khankho cu k'cou awn täng ci. Hnumi tumat naw cun cu la ne, kyung khui taang thum ung shum sei kyunghtang avan cu ng'phüi sak thei ci, "ciah pyein ci.

³⁴ Jesuh naw shinah mawngma gui cu m'tumtängnak gui awn chang k'hli awn m'thein gui ci. M'tumtängnak mah mah ah kä kya ne a i kä pyein ci. ³⁵ Shin cu, "Khomdek a ng'tüin law ge ung ka thup gui cu m'tumtängnak gui awn kei naw ka m'dang khai" ciah profet gui awn ka pyein nak gui a kümbe vaiah phäh ah kyak ci.

³⁶ Cunkawnah Bawipa naw chang k'hli gui nawngshüt gui ne, imkhui ah avalut ung a ng'düihpüi gui naw et law u ne, "Loma ungka khumgho dung gui awn m'tumtängnak ah mawng na k'khukhai tu gui ä" ciah pyein ci gui.

³⁷ Cunung, Bawipa naw, "M'shii k'ni phusho cicu chang ah htapa ah kya ne, ³⁸ loma cu shinah khomdek ah kyak ci. M'shii k'ni cu Khankho ah htanau gui kyak ci. Khumgho gui cu khokshe ah htanau guiah kyak ci. ³⁹ Khumgho m'shii gui phusho ciah ga cu khokshe ah kyak ci. Khämtawngnak a khin cu khomdek ah a ng'pyi nak a khin ah kya ne, khämtawng ci gui cu khankhochang guiah kyak ci. ⁴⁰ Cunkyasei, khumgho dung gui mawih ne mei awn m'khih ah mäih ah, khomdek ah a ng'pyi nak a khin ung a cunah mäih ah kyak khai. ⁴¹ Chang ah htapa naw a mät ah khankhochang gui cu tüi law gui sei, ngami naw hmakat sak gui ci gui la, kä ng'düng ci bik ci gui avan cu, a kho ungka mawih gui päng u ne, ⁴² Mei ng'ling m'tapphum khui ah shum gui khai. Acun ung, thüikyah nak la, m'nihtui ha m'htepnak om khai. ⁴³ Cun ung chang ng'düng gui cu ami pa ah kho ah khokhni ah mäih ah, deikhang khai gui. Akhnga om ci naw ng'ya sä.

⁴⁴ Khankho cu lai ung thup ah khawhcham awn täng ci. Chang tumat naw acun a hmuh law ung thup ba ne, yeikyai neta hteit ba ne, ani ung om ci gui nü, yawi ne cunah lai cu k'hleih ci. ⁴⁵ Cunkawnah, khankho cu cümlungküi shui ciah hlumlei-chang awn täng ci. ⁴⁶ Cunah hlumlei-chang naw aknui ah küi ciah cümlung a hmuh law ung, hteit ne, a mät ah gah hning phung gui yawi neta, cunah cümlung cu k'hleih ci.

⁴⁷ Cunkawnah, khankho uknakho cu tuinu kyong ah yukcha ne nga a päng päng phak ciah ng'vaai awn täng ci. ⁴⁸ Nga awn a be law kawnah, ngakshui naw k'kawng ah a kaih kawnah ngo ne, nga k'ni gui cu a pem khui ah thun neta, kä nik ciah nga gui cu k'pung ah ghawit ci. ⁴⁹ Cunah mäih ah, khomdek ah a khüt law ung khankhochang gui cu kyum law u ne, chang düng gui ungka chang k'she gui cu la u ne, m'tai gui päng u neta, ⁵⁰ Thüikyah nak, m'nihtui ha m'htepnak ah m'taphum mei khui ah yukchak khai gui.

⁵¹ Shin gui avan cu nami k'shing naw?" Ciah ng'shi gui sei, angdüihpüi gui naw, "Kami k'shing ci, "cine m'shang ba ci gui.

⁵² Bawipa naw phi, "Cunkyasei, khankho uknakho ah ng'düihpüi ah kya lawk ciah cacim saya van naw amät ah khawhcham gui ungka a khawh thai la akphyim gui cu lak ciah im-mah awn täng ci, "ciah pyein ci. ⁵³ Jesuh cu shinah m'tumtängnak gui a pyein kawnah acunah hmun ungka naw hteit ba ci.

⁵⁴ Cunkawnah Bawipa cu amät ah omnak mango ah hteit ne taigüim ung chang gui cu m'thei gui ci. Cun ung chang gui naw cäi u ne, "Shin naw shinah hmuhmatnak gui la, huham gui cu a hawi ungka naw a gah ma? ⁵⁵ Shin cu lethtama ah a hta ah kä kya naw? Anu cu Mary ah kya ne, anau gui cu James, Joses, Simon la Judas ni ah kä kya naw? ⁵⁶ A be gui ami van phi mikmi awn atäng ah om ci guiah kä kya u naw? Cunah a kyak ung, shinah chang naw shin gui nü cu, a hawi ah ka, a gah ma?" Ciah pyein u ne, ⁵⁷ Bawipa cu ng'hnungtuk püi ci gui. Jesuh naw phi, "Profet cu amät ah mango la amät ah im ah kawnah a hawi ah phi kä chang m'suinak kä om ci, "ciah pyein ci. ⁵⁸ Bawipa naw ngami ah kä yumnak ah hmawk ah acun ung cäicamnak gui akda kä bik ci.