¹ Cunung, uktubawi Herod cu Jesuh ah mawngma ng'ya tu neta, ² "Shinah chang cu tuiphum Johan ah kyak ci. Shih nak ungka tho ba pyi ci. Cunkyasei, a huham cu m'dang hlawit ci, "cine akchang gui awn pyein na gui ci.

³ Ayan ung, anau Philip ah chu Herodias awn ani om-ih ah mawng awn, Johan cu pha ne thawng khui ah chum ci. ⁴ Amawngma cu Johan naw, "Nang ghangpughang, shinah hnumi kä na chu na khin ci, "ciah pyein na sei, ⁵ Johan cu ngawn tu hlü pang ne phi, chang guiah mik hmai teng ne, kä ngawn dat ci. Chang gui naw, Johan cu profet tumat ah mäih ah, hmuh u seih, kä ngawn hlawit ci.

⁶ Cunah Herod ng'tüi nak kho hnüp gawk law sei, pawi a bi nak ung, Herodias ah hta hnumihta cu ng'lam seih, Herod cu a m'lung hnip-awi yeikyai lawk tat ne, ⁷ 'Na na thäh gui nü kaning pek khai' ciah ng'thu khän ci. ⁸ Cunah hnumihta naw, anu naw akkhukhai ah mäih ah, "Tuihnim saya Johan ah a lupum cu, tupit ne k'bei ung na peä" cine ng'yoih thäh ci. ⁹ Ghangpughang cu a m'lung kä yeikyai pang ne, ng'thu a khän pyi phi kya, a ng'teipüi guiah hmai phi kya, teng ne, "Pe vä" ciah pyein neta, ¹⁰ chang tüi ne, Johan ah lupum cu thawng khui ah tupit sak gui ci. ¹¹ Lupum cu k'bei ung law püi u ne, hnumihta awn pe u seih, anu ah hteh püi ci. ¹² Johan ah a hnuläk gui naw law u ne, a gook kawit u ne, phuh ci gui. Cunkawnah, Jesuh awn m'thein tuk ci gui.

¹³ Jesuh cu a ng'yak kawnah, cun ungka lut law ne, ng'hleiko ng'cum ne, a ng'thupnak ah hteit ci. Cun cu chang gui naw ng'ya u ne, ami pigo ungka lut law u ne, k'kawnglam awn läk ci gui. ¹⁴ Jesuh cu lut law ne, chang gui a hmuh law gui ung, m'gein gui ne, gopyam ci gui nü m'gaai ba gui ci. ¹⁵ Kho a mü law ung, a ng'düihpüi gui naw Bawipa cu et law u ne, "Shinah hmun cu khokpya ah phi kyak ci. Kho phi mü law pyi ci. Ami pigo ah hteit u ne, ami ei vai cu ami k'hleih vaiah tüi gui ä" ciah pyein u sei, ¹⁶ Jesuh naw, "Ngami gui ami hteh vai kä hlü ci. Ami ei vai cu nangmi naw pe vä" ciah pyein na gui ci.

¹⁷ Angdüihpüi gui naw, "M'htut ng'lung k'hma la nga ng'yun goi hta bäng om ci. Cunkawnah, a hei ei vai keimi ung i kä om ci, "ciah m'shang ba u sei, "Cunah m'htut la nga cu law püi vä" cine pyein na gui ci.

¹⁸ Cunkawnah, chang ng'bum nu cu khomhtung khan ah ami ngoh sak vaiah, pyein na gui ci. ¹⁹ M'htut ng'lung hma la nga ng'yun goi cu la ne, Khankho han dan ne, a bäkhäknak a m'hlümtai kawnah, m'htut la nga cu k'baw ne, angdüihpüi gui awn pe gui ci. ²⁰ Angdüihpüi gui naw, chang gui awn pek ci gui. Chang nü naw ami phü ah ami ei kawnah k'pawih ba ci m'cun u seih, gang ghaleigoi ung akbe ah gah ci gui. ²¹ Ei ci gui cu hnumi gui la k'hmaw gui kä k'khei tu ah, pami gui bäng phya hmakip lawk ci gui.

²² Jesuh naw chang k'hli cu a tüih ba gui kawnah, angdüihpüi gui awn, ng'hleiko ng'cum u ne, tuikam täng ah hteh sak gui ci. ²³ Cunah chang k'hli cu a tüih ba gui kawnah aktaigü vaiah m'htung ah kai ne, a mü law ba phung ung, amät bäng om ci. ²⁴ Ng'hleiko cu tuibüm ng'lung ah a om sang ung, khokhi aih neta, ng'hleiko cu tuihnawk naw k'hnawk ci. ²⁵ Kho a thaih law hlü ung, Jesuh cu tui khan ah m'khan ne, angdüihpüi guiah lawk ci. ²⁶ Cunah Jesuh tui khan ah m'khan ne a law cu, angdüihpüi gui naw hmu u ne, cäicam u ne, "M'gha nei" ciah cäi u ne m'lau ci gui.

²⁷ Jesuh naw a ng'ghit ah, "Kä ng'ä vä! Kei nei. Kä kyih vä!" Ciah pyein na gui ci.

²⁸ Peter naw, "Bawipa aw, nang ah akcang ah na kyak ung, kei cu tui khan ah m'khan ne, nang ah ka law tu vaiah na pyein na ä!" Ciah thäh seih, ²⁹ "Law ä!" Ciah pyein ci. Peter cu kyum law ne, Jesuh ah hteit khai ah, tui khan ah m'khan ci. ³⁰ Kho a khi law aih cu hmu ne, tui khui ah m'dit law ne, "Na k'phyawn ä, Bawipa" ciah m'lau ci.

³¹ Jesuh naw a kut shäng ne, Peter cu k'pang ne, "A yumnak ken ciah chang, ikyasei na ng'ngaih hnih maa?" Ciah pyein nak ci.

³² Ng'hleiko khan ah ani kai ba kawnah, khokhi cun phi ng'düm ci. ³³ Ng'hleiko khan ah om ci gui naw Bawipa k'et law u ne, "Nang cu Khanpughi ah Htapa akcang ah na kyak ci, "ci u ne m'hlümtai ci gui.

³⁴ Tuikam vangtäng ah k'kat u ne, Gennesaret mango ah gawk ci gui. ³⁵ Cunah ng'lei-mah chang gui naw Bawipa mikhmai shüm hmat ba u neta, ami kho nü nü ungka, gopyam ci gui nü ng'khah law püi u sei, ³⁶ a suisak ah m'dawng hta bäng, tawn tu vaiah ng'yoi u ne, acun tawn tuk ci nü, theing nak gah ci gui.