¹ Cun ung Jerusalem mango chang Pharisee gui la Cacim pyang saya gui naw et law u ne, ² "Cau chang phyim pupa gui naw ami na m'theimthang ah thungyo gui cu ikyasei na hnukläk gui naw kä mi läk ma? Ei kä mi ei pha ung ami kut hngaw kä m'shi ci gui" cine pyein ci gui.

³ Bawipa naw, "Ikyasei Khanpughi ah ng'thu kä läk pang u ne, nami mät ah ng'thungyo gui düt nami läk ma? ⁴ Khanpughi naw, 'Nami nupa nami kyih-a vai' cine ng'thu kä m'khän naw? 'A m'gawng awn a nupa pyeimshet cicu ngon vai' ciah Cacim ung lawk ci. ⁵ Cungphi, nangmi naw a u naw phi a nupa awn shinah a pyein ung k'cang ciah nami pyein ci: 'Nangni nu la pa, Kä ning m'htei goi hning vai nei. Nangni awn kaning pet goi vai sü te cu, Khanpughi awn ka pet vaiah ng'thu ka khän pyi ci cine a pyein ung, ⁶ A cunah chang naw a nupa a kyih-a vaiah kä hlü ci' ciah na mi pyein ci. A shikcha ah nangmi naw nami mät ah thungyo ah phäh ah Khanpughi ah ng'thumkhän nami maa nak ci. ⁷ Chang k'ni ah ng'she ci gui aw, nangmi ah mawng cu Isaiah naw, ¹⁰ Cunung Bawipa naw chang k'hli cu khü gui ne, "Ng'ngai u ne k'shing hmat vä. ¹¹ M'gawng khui ah lut ci naw, chang cu kä m'shemshai sak ci. M'gawng ungka lut lawk ci naw vah, chang cu m'shemshai sak ci, "ciah pyein na gui ci.

¹² A hnukläk gui naw et law u ne, tukbäih na pyein ah ng'thu cu Pharisee gui naw ng'ya u ne, kä mi yum khet ah mawng na hmat naw?" Ciah ng'shik ci gui.

¹³ Bawipa naw cunphi, "Khankho ah om ciah ka pa naw, kä a ng'lin ah a ghing phung cu, ng'mawi yawp khai. ¹⁴ Ngami gui cu ghing-om tu cang u sä. Ngami cu a mik m'dah gui lamshüm ciah amik m'dah guiah kyak ci gui. Amik m'dah naw amik m'dah lam a m'shüm tu ung, anik hnih cu khuighawk ah ng'kyak khai goi" ciah pyein ba ci.

¹⁵ Peter naw, "Cunah m'tumtängnak cu keimi awn na m'thein tu gui ä" cine ng'shi sei, ¹⁶ Jesuh naw, "Tukbäih kaning m'thein gui cu nangmi ungka a u naw phi kä hmat kä k'shing ne maa? ¹⁷ M'gawng khui ah lut ci phung cu, khon kyong ah gawk ne, ng'no nak ah nawng shüt ah mawng cu kä nami hmat ne maa? ¹⁸ M'gawng ungka lutlawk cicu m'lungkhui ungka law ne, chang cu m'shemshai sak ci. ¹⁹ Kä nik ci ng'ngaktüh nak, chang ngon nak, chang ah chuhta katnak, pletdeng nak, chang ah khawh m'guuk nak, hlee pyein nak, pawchang ah a thang m'shetnak gui cu chang ah m'lung ungka lut law ne, ²⁰ Chang m'shemshai sak ciah kyak ci gui. Kut kä m'shi ne ei ei naw chang m'shemshai sak ciah kä kyak ci, "ciah pyein na gui ci.

²¹ Cunkawnah, Jesuh cu, cunah hmun ungka naw hteit ne, Tyre la Sidon mango ah pigo guiah hteit ci. ²² Cun ung a cunah kho ungka Canaan ng'hnumi tumat cu lutlaw ne, "David ah htapa, na m'gein ä. Ka htahumi cu khokshe naw kai na sei, aknui ah geinvai ci nei" ciah vungpyang ci.

²³ Cunte, Bawipa naw m'kha-ät phi kä m'shang ci. Angdüihpüi gui naw k'et law u ne, shinah ng'hnumi cu hteh ba sak ä" ciah pyein ci gui.

²⁴ Bawipa naw, "Kei cu ghük ciah Israel pakhui ungka maih ciah hto gui bäng ah vah, ana tüih law ah ka kyak ci, "ciah m'shang ci.

²⁵ Cunte, cunah hnumi naw et law ne, Bawipa ah ma ng'bolawk neta, "Bawipa, na m'gein ä" ciah pyein ci.

²⁶ Bawipa naw, "Hta guiah ei cu la ne ui awn m'bei cu kä nik ci, "ciah pyein ba ci.

²⁷ Cunah hnumi naw, "A cun nei Bawipa. Cunte, uihta gui hngaw naw ami bawi ah ei ng'theh cu bäm tu man ci gui" cine m'shang ba gui ci.

²⁸ Cunung Jesuh naw, "O nu ng'vai aw, na yumnak cu kükyang aih ci. Na ng'yakhlü ah mäih ah nang ung kya sä" ciah pyein seih, a htahnumi cu acunah ng'hngi khin ung tüin ne, gai ba ci.

²⁹ Cunkawnah, Jesuh cu a cunah hmun ungka lut law ne, Kalilee tuinu tuikam pei ah hteit ne, khomhtung ah kai ne ngok ci. ³⁰ Cunung chang akda naw a khaw ng'khem ci gui, a mik m'dah ci gui, ak-ang gui, apum kä ng'küm ci gui ungka naw tüin ne a hei natnak awn ng'hlo-ei ci gui cu law püi u ne, a pei ah a kholek kung ah m'shän ci gui. ³¹ Ami natnak gui cu gaai sak gui sei, k'ang ci a ng'thu law phi kya, kä kümpäng ci a kümpäng law phi kya, a khaw ng'khem ci a hteh law phi kya, amik m'dah naw a hmuh law phi kya, chang k'hli naw ami hmuh law ung cäicam u ne, Israel pakhui ah Khanpughi ah bawimangnak cu m'hlümtai ci gui.

³² Cunung, Jesuh naw angdüihpüi gui cu khü gui ne, "Shinah chang gui ka m'gein gui ci. Hnüp thum lüng, kei awn atängah om ci gui. Ami ei vai pi kä om ba ci. A i kä m'bei guiah ami hteh ba vai kä ka yum ci. Cunah ami hteh ba ung, lam ah ami k'tha maih khai" ciah pyein na gui ci.

³³ A ng'düih büi gui naw phi, "Shin hlawk ah da ciah chang gui naw ami phü vaiah ei, shinah khopyaa ah keimi naw ihawcha kami gah hning khai aw?" Ciah pyein ba ci gui.

³⁴ Jesuh naw, "Nangmi ung m'htut i chü om naw?" Ciah ng'shi gui sei, ngami naw, "M'htut khih la ngahta api om ci, "ciah pyein ba ci gui. ³⁵ Cunung, Bawipa naw chang k'hli cu m'dek ah khan ah ami ngoh vaiah pyein ne, ³⁶ M'htut ng'lung chih la nga gui cu la ne, a bäkhäknak a m'hlümtai kawnah, cun gui cu k'bou ne, angdüipüi gui awn pe gui ci. Ngami naw phi chang k'hli gui awn teipai ci gui. ³⁷ Chang gui van naw ei ne phü ci gui. Cunkawnah, pawih ciah m'htut hek gui cu ko u sei, gang chih lawk ci. ³⁸ Ei ci gui cu hnumi la akhmaw kä pyein ah pami bäng phya-phlikip lawk ci. ³⁹ Cunkawnah, Bawipa naw chang gui cu a tüih ba gui kawnah, ng'hleiko ung hangkai ne, Magadan gawnu ah pei tuikam ah gawk ci.