¹ Pharisee la Saducee gui naw Bawipa cu tüitok vaiah et law u ne Khankho ungka cäicam vai a m’dang gui vaiah ng'yoi ci gui. ² Bawipa naw, "Mühün a gawk law ung, 'Khankho cu mühün ah hlen ciah kyasei kho shen khai' ciah nami pyein thei ci. ³ Khongawihta ung phi, 'Khankho ah khongmei k'hlen ng'mei lawk ciah kyasei, khokhi khok-aa gawk lawk khai' ciah nami pyein thei ci. Nangmi cu khankho teng u ne kho i ah a kyak vai nami hmat te pang ah phi, tukbäi a i a kyak law vai kä nami hmat ci. ⁴ Shekha ne kyoikak ciah ng'shonhta naw cäicam vai nami ng'yoih ung, Jonah ah cäicam vaiah kawnah a i cäicam vai phi a i kä ning m'hmu gui vai" cine a pyein päng ah, ngami gui ungka naw hteit ci.

⁵ Angdüihpüi gui naw tui heikam täng ah ami hteh law ung m'htut ami hteh püi vaiah, m'hnih ghüt ci gui. ⁶ Cun ung Jesuh naw, “Pharisee la Saducee guiah k’co cu m'htei na vä" ciah pyein na gui ci.

⁷ Angdüihphüi gui naw, “M’htut kämi law püi ah phäh ah a pyein nei" ciah tumat la tumat ng’cuh ne ng'lan ci gui.

⁸ Cunah a mi ng'ngaih la ami pyeinsak gui Jesuh naw hmat ne, “Ami yumnak ken aih ci gui aw! Ikyasei m'htut kä nami law püi cu nami mät naw nami ng'cuh ma? ⁹ Kä nami m'khomcha ne ma? M’htut m’hma cu chang phya m’hmakip naw ei ne gang ichü akpawih phi kya, ¹⁰ M’htut chih cu chang phya phlikip naw ei ne, gang ichü akpawih phi kya, kä nami shüm ba naw? ¹¹ M'htut ah mawng kaning pyein nak guiah kä kyak ah mawng cu ikyasei kä nami hmat ang? Pharisee la Saducee guiah k'cou cu m'htei na vä" ciah pyein na gui ci. ¹² Cunung angdüihpüi gui naw, Bawipa naw m’htut ungka k’cou ami m'htei nak vaiah a pyein hlü ah kä kya ne, Pharisee la Saducee guiah m’theimthang gui ami m'htei nak vaiah a pyein cu m'khomcha lawk ci gui.

¹³ Jesuh cu Caesarea Philippi kho ah gawk ci. Cunung Bawipa naw angdüihpüi gui awn, “Chang gui naw Chang ah Htapa cu a u pyein u naw?” Ciah ng’shi gui ci.

¹⁴ Angdüihpüi gui naw, “Amshah naw tuihnim Johan ah ning pyein u ne, amshah naw Elijah ah ning pyein ci gui. Amshah naw Jeremiah baw, käcung profet tumatmat ah kyak ci ciah pyein ci gui" ciah m'shang ba ci gui.

¹⁵ Jesuh naw, “Nami mät naw mä, kei cu a u ah nami na pyein naw?” Ciah ng’shi gui sei, ¹⁶ Simon Peter naw, “Nang cu ghin ciah Khanpughi ah Htapa Bawi Khrit ah na kyak ci, "ciah pyein ci.

¹⁷ Cunung, Jesuh naw, “Jonah ah hta Simon, nang cu na phun shen ci. Ikyaseiciung, shinah mawng cu na shisa naw aning m'hmuh ah kä kyak ci. Khankho ah om ciah ka pa naw aning hmuh ah kyak ci. ¹⁸ Kaning pyein nak cu, nang cu Peter ah na kyak ci. Shinah lung khan ah ka khrihtabum cu ka cawh khai. M’htekho k'shoh gui naw phi, shinah khrihtabum cu kä m’khüt khai gui. ¹⁹ Khankho k'shoh htung cu kaning pek khai. Khomdek khan ah na khitpawn gui nü cu khankho ah phi khitpawnnak gah khai. Khomdek khan ah na m'hlawit gui nü cu khankho ah phi m'hlawitnak gah khai" ciah pyein ci. ²⁰ Cunkawnah, Jesuh naw a mät cu Bawi Khrit ah a kyak ah mawng, a u awn phi kä mi m’thein vaiah angdüihpüi gui awn m'cäi gui ci.

²¹ Cungka naw tüin ne, Jesuh naw amät cu Jerusalem ah hteit ne, angvai gui, taigü ng'vai gui la Cacim pyang guiah kut ung khuikha geinbainak gah ne, ami ngon kawnah, akthum hnüp ung ghing thawh law ba khai ah mawng cu angdüipüi gui awn tüin ne m'dang gui ci.

²² Cunung Peter naw, Bawipa cu a phe ah khü ne, m'hting ne, “Bawipa, shinah mawngma cu nang ung kä gawk law sä! Nang ung shinah mäih cu hawi ciah phi kä kya lawk khai” ciah pyein ci.

²³ Cunte, Bawipa naw ng’hlat shi ne, "Nang khogam, ka hnu ah thoi ä! Nang cu ka cheishoh nak vaiah na kyak ci. Ikyaseiciung nang cu Khanpughi ah mawngma gui kä ng'ngaktüh ne, chang ah mawngma gui bäng na ng’ngaktüh ci” ciah pyein nak ci. ²⁴ Cunkawnah, Jesuh naw angdüihpüi gui awn, "Ka hnu na läk hlü ciah a u phi, a mät maa na ne, a mät ah kutlamtung kawit neta, ka hnu ah ana läk vai. ²⁵ Ikyaseiciung, a mät ah ghinnak k'phyawn hlük cicu a ghinnak di khai. Kei ah phäh ah a ghinnak di ci naw a ghinnak hmuk khai. ²⁶ Chang naw shinah khomdek khan a van a kaa nak ung phi, a mät ah ng’mümcha ghinnak a di ung, a nibä-nak a i awm khai ma? A mät ah a ng’mümcha ghinnak cu a i mäih khawhcham awn m'thawng hning khai aw? ²⁷ Chang ah Htapa cu a khankhochang gui awn atäng ah, a Pa Khanpughi ah bawimang nak awn kyum law khai. A cunung chang gui van awn, ami bilawh ah mäih ah, akni akshe m’cümhnah nak pe gui khai. ²⁸ Akcang kaning pyein nak gui cu, Chang ah Htapa cu a uknak kho awn a kyum law ah mawng, kä hmuh pha ung kä shik khai ah chang amshah cu, shinah hmun ung ng’düi ci gui ung om ci, "cine pyein na gui ci.