¹ Akhnüp chuk nak phlän sei Jesuh naw Peter, James la James ah a nau Johan cu khü gui ne khomhtung k'hlün ah hteh püi gui ci. ² Acunung Bawipa ah a mui cu akküikyang ah ng’thungthawng ci. A mikhmai cu khokhni vai süah k’khang ne a suinu cu a deikhang ah mäih ah bawk ci. ³ Moses la Elias cu a mi ma ah ng’dang law nine, Bawipa awn ng’thunghta ci gui. ⁴ A cunkawnah Peter naw, “Bawipa, shinah hmun cu omnak hlü vaiah kyak ci. Nang ah phäh ah tumat, Moses ah phäh ah tumat, Eliah ah phäh ah tumat, phungshaum thum cu na yum ung ka co hlük ci, "ciah pyein nak ci.

⁵ Cunah a pyein sang ung, deikhang ciah khongmei naw k’küm gui ne, “Shin cu ka yum ka m’hni ah ka hta ah kyak ci. Ani ah ng’thu cu ng’ngai vä” ciah khongmei ungka k'aw cu ng'thang lawk ci.

⁶ Angdüihpüi gui naw cunah k’aw a mi ng’yak law ung, aknui ah kyikyawk u ne m'dek ung ng'bawlawk ci gui. ⁷ Jesuh naw k'et law gui ne a kut awn tawk gui neta, “Ng’düi vä, kä kyi vä” ciah pyein ah gui ci. ⁸ Ngami naw ami täu law ba ung, Jesuh kawnah a hei u phi kä hmu ba ci gui.

⁹ Cunkawnah, khomhtung ungka a mi kyum law sang ung, “Chang ah Htapa cu shih-nak ungka kä a thawh ba pha güt, shinah nami hmuh cu, a u awn phi kä nami m’thein vai” ciah pyein ah gui ci.

¹⁰ Angdüihpüi gui naw, “Ikyasei Elijah cu ma ne lawk khai ciah Cacim hmat saya gui naw a mi pyein ang?” Ciah Bawipa cu ng'shik ci gui.

¹¹ Jesuh naw, “Elijah cu law ne a pängvan pyangtham ba khai cicu akcang ah kyak ci. ¹² Cunte, Elijah cu gawk law pyi ci. Cunte, chang gui naw ani kä hmat u ne, ani cu ami hlü hlü ah omkya nak ci gui. Cunah mäih ah Chang ah Htapa cu ngami ah kut ung dukdeinak gah lawk khai ciah kaning pyein na gui ci” cine pyein na gui ci. ¹³ Cunkawnah, angdüihpüi gui naw tuihnim Johan m'shu ne Bawipa naw a pyein nak guiah mawng cu k'shing lawk ci gui.

¹⁴ Cunkawnah, chang k'da a awmnak ah gawk law u sei, chang tumat cu Bawipa ah ma ah law ne m'khukkhudong neta, ¹⁵ “Bawipa, ka hta na m’gein tu peä. Ikyaseiciung ani cu aknui ah gu ne ng’hloei ng’kyongtat ne, mei ung phi kya, tui ung phi kya a shäng shäng lut thei ci. ¹⁶ Cunkyasei, na ng’düihpüiguiah ka law püi te ngami naw kä m’gai hlawt ci gui” ciah pyein ci.

¹⁷ Jesuh naw, “O a yumnak kä awm ne be kä khüt ciah ng'shonhta gui aw, kei cu nangmi awn igüt atäng ah ka om khai aw? Kho icäp kaning ng'ngai pe gui vai aw? Akhmaw cu kei ah law püi vä” ciah pyein ci. ¹⁸ Cunkawnah, Jesuh naw khokshe cu k'täm sei khokshe cu akhmaw ungka lut law ne dawng sei, cung ka naw akhmaw cu gai ba ci.

¹⁹ Cunkawnah, angdüihpüi gui naw ami mät bäng Jesuh ah law u ne, “Kei mi naw khokshe cu ikyasei kä ka mi k'täm hning ma?” Ciah ng'shik ci gui.

²⁰ Jesuh naw, “Kä nami yum ah hmawk ah kyak ci. Akcang kaning pyein nak gui cu, nangmi ung anhta ui teih hman yumnak a om ung, shinah khomhtung cu, 'Shin ungka naw cein ung va ng'nawn ä' ciah nami pyein ung a cunah mäih ah kyak khai. Nangmi hmawk ah kä kya hning khai a i kä awm khai. ²¹ Cunte, cänah mäih khokshe cu taigünak la ei hlawinak kä awm ung kä dawng man ci, "ciah pyein ci.

²² Ngami cu Kalile kho ah a mi ng’bum sang ung Jesuh naw, “Chang ah Htapa cu chang guiah kut ung ap lawk khai. ²³ Chang gui naw ngon khai gui. Cunkawnah, akthum hnüp ung ghingtho ba khai” cine pyein sei, angdüihpüi gui cu aknui ah thüi ci gui.

²⁴ Kapernaum mango ah a mi gawk law ung, pum-im a khonlouk gui naw Peter cu law shi u ne, “Nami Saya naw Pum-im a khon pe ne ma?” Ciah ng'shik ci gui.

²⁵ Peter naw, “Pek ci” ciah m’shang ba gui ne im kyong ah ava luh ung, Jesuh naw, “Simon, nang naw iah na ng'ngai naw? M’dek khan ghangpughang gui naw a u ah nei a khon ami louk man? A mi hta ah ma? Chang hei guiah ma?" Ciah ng’shik ci.

²⁶ Peter naw, “Chang hei guiah nei ami louk man” ciah pyein sei, Jesuh naw, “Cunah a kyak ung ami htanau gui ung kä louk man ci gui. ²⁷ Cunte, kä mi ng'kyungtäng-ein vaiah tuinu ah hteit ne nga va leng ä. Akhtükbäiah na pha ah nga cu la ne a m'gawng na k'hmawn ung ngui a phe na hmuk khai. Cun cu la ne kei la nang ah phäh ah pe gui ä" ciah pyein ci.