¹ Cunah a khin ung angdüihpüi gui naw Jesuh cu et law u ne, "Khankho uknakho ah a u nei a kyüikyangpi ma?" Ciah ng'shik ci gui.

² Cun ung Bawipa naw akhmaw tumat khü ne, ami ng'lung ah m'düih päng neta, ³ akcang kaning pyein ah gui khai. Nangmi cu ng'thawnghlai u ne, akhmaw guiah mäih ah kä nami kyak ung, khankho uknakho ah a hawi ciah phi kä nami lut hning khai. ⁴ Cunkyasei, shinah akhmaw ah mäih ah amät la mät a m'lung ng'neim cicu khankho uknakho ah a kyüikyangpi ah kyak ci. ⁵ Shinah mäih ah akhmaw tumat cu ka ng'ming awn douchang ci naw kei na douchang ci. ⁶ Cungphih, kei na yum ciah shinah akhmaw gui ungka tumatmat ng'kyungtäng sak cicu aknui däm ciah gawitlung a gawn ung bat ne, tuili thuuk khui ah yuk shum ung ani phäh ah ni tuba ci.

⁷ Shinah khomdek cu ng'kyungtäng katkawng sak ci guiah om ah phyunak om ci. Ng'kyungtäng katkawng sak ci gui, kä gawk-ein law vaiah khen ne kä gah vai. Cungphih, ng'kyungtängnak gawk law sak cicu phyunak om ci. ⁸ Na kut, käcung, na khaw naw aning katsak ah a kyak ung acun cu tupit ne ghawit ä. Kut goi käcung khaw goi ani k'hnih awn angtäi mei khui ah shumnak na gah ah ta mä, kut tumat, käcung, khaw tumat awn ghinnak kho ah na luh tu ung ni pi khai. ⁹ Cunkawnah, na mik naw aning katsak ah a kyak ung cun cu kawih ne ghawit ä. Na mik a ni k'hnih awn m'htemei khui ah shumnak na gah ah ta mä, mik tumat awn ghinnak kho ah na luh tu ung ni pi khai. ¹⁰ Shinah k'hmaw gui ungka tumatmat cu kä nami hmuhshim-ein vaiah m'htei na vä. Ikyaseiciung khankho ah om ciah ami khankhochang gui cu khankho ah om ciah kapa ah hmai kyang, angtäi ah hmuk ci gui cicu kaning m'thein gui ci. ¹¹ Akcang ka pyein cu chang ah hta cu ghük ci gui hunphyawn vaiah kyum lawk ci. ¹² Ihawkcha ah nami ng'ngai naw? Chang tumat ung htome phya a omnak ungka tumat cu a maih law ung, ani naw kokip-lei-ko cu khomhtung ah nawng shüt ne, ghük ciah htome tumat hteit neta shui khai ah kä kya naw? ¹³ Akcang kaning pyein nak gui cu, ani naw cunah htome a hmuh vai awn, kä ghükmaih ah om ciah htome kokip-lei-ko ah khan ah a yeikyai ah ta mä, cunah htome tumat ah khan ah yeikyai ba pi khai. ¹⁴ Cunah mäih ah, khankho ah om ciah nami pa naw shinah k'hmaw gui ungka a tumat phi a dimaih vaiah kä ng'yahlü ci.

¹⁵ Na phäinau naw aning katnak ung hteit ne, nani mät bäng ah ng'yak vaiah m'cumcäi ä. Ani naw na pyein a ng'yak ung na phäinau cu na gah pyi ci. ¹⁶ Kä a ng'ngaih ung, hmukshing chang hnih, käcung thum ah ng'thu m'cäi gui awn nami ngingoi pyeinsak phukpit nak hlawit vaiah a hei tumat, käcung hnih cu namät awn atäng ah ng'khah püi vai. ¹⁷ Ani naw ngami guiah ng'thu a i kä a ng'ngaih ung, khrihtabum awn m'thein ä. Khrihtabum ah ng'thu kä a ng'ngaih ah a kyak ung, a khohei chang vai sü la a khonlouk ciah chang ah mäih ah na tha vai. ¹⁸ Akcang kaning pyein ah gui khai. Khomdek khan ah nami khitkhon phung cu Khankho ah phi khitkhonak gah khai. Khomdek ah khan ah nami m'hlawit gui phung cun phi khankho ah m'hlawitnak gah khai gui. ¹⁹ Cunkawnah, akcang kaning pyein nak gui cu, nangmi ung chang hnih naw ani taigü phung ah phäh ah, khomdek ah khan ah ani m'lung a ät ung, khankho ah om ciah kapa naw ngani ah phäh ah kümbe sak khai. ²⁰ Ikyaseiciung, chang hnih käcung chang thum naw ka ng'ming awn a hawn ung bawh ami ng'bum law ung ngami ah ng'lung ah ka om ci, "ciah pyein ci.

²¹ Cun ung Peter naw a pei ah et law ne, "Bawipa, ka phänau naw ana katnak ung a i chü vei ka ng'ngaih pet vai ma? Chih vei ma?" Ciah ng'shik ci.

²² Jesuh naw, "Chih vei ah kä ka pyein ci, chihkip akchih vei khüt khai ah ka cik ci. ²³ Cunkyasei, khankho uknakho cu amät ah changshäm gui awn cayin bi hlük ciah ghangpughang awn täng ci. ²⁴ Ani cu cayin tüin ne a bi law ung talent phya phya a m'thung vai om ciah chang tumat cu ama ah law püi ci gui. ²⁵ Cungphih, ani ung a m'thungnak vai i kä om sei, amät ung tüin ne, akchuhta la a khawhcham gui nü cu yawi ne a m'thung vaiah a bawi naw k'bäi ci. ²⁶ Cunung, akchangshäm naw ng'bawlawk ne a bawi ah ma ah m'khukhudawng neta, 'Na m'gein nä. Kaning m'thung vai avan kaning m'thung khai nei' ciah pyein ci. ²⁷ Cunah changshäm cu abawi naw m'gein law ne m'hlawit neta a m'thung gui vai cun phi nawng pe ci. ²⁸ Cunte, cunah changshäm naw hteit ne, ani ungka Denari phya puk ciah a changshäm paw tumat cu hmu neta pha ne a gawn k'hte ne, 'Na lak ah na pu gui na m'thung ä' cik ci.

²⁹ Cun ung a changshäm paw naw ng'bawlawk ne, 'Na m'gein toä. Kaning m'thung ba khai nei' ciah ng'hungpa nak ci. ³⁰ Cungphih, ani naw a paw ah pyein kä ng'ngai pe ah, a paw naw a pu gui kä a m'thung ba chüih, thawng khui ah ghum ci. ³¹ A hei a paw changshäm gui naw cunah mawngma ami hmuh law ung aknui ah thüisei u ne, ami bawi ah hteit u neta, a mawngma gui nü cu m'thein ci gui.

³² Cun ung bawi naw cunah changshäm cu khü ne, 'Shekhak ciah Changshäm aw, nang naw na ng'hungpa na seih, na pu gui nü kaning m'gein ci. ³³ Kei naw kaning m'gein ah mäih ah nang naw phi na changshäm paw cu na m'gein khin ciah kä kya naw?' Ciah pyein ci. ³⁴ A shikcha ah a bawi cu m'lungshe ne, a pu gui nü a m'thung pyi khüt khai ah thawng ghum ne dukdeiunak khai guiah kut ah ap ci. ³⁵ Nangmi tumat täi naw phi nami phäinau cu nami m'lungkyong ah kä nami ng'ngaih pe ung khankho ah om ciah kapa naw acunah mäih ah ning ci gui khai" ciah pyein ci.