¹ Jesuh cu ng’thu a pyein kawnah Kalile hmun ungka naw ng’hlat ne Jodan tuikam vangtäng Judah kho ah hteit ci. ² Chang akda naw a hnu läk u sei, a cunah hmun ung gopyam ci gui m’gai ba gui ci.

³ Pharisee amshah naw Bawipa cu ami hleep hlü phäh ah k'et law u ne, “Chang naw a i mawngma ah hmawk ah phi kya, akchuhta a ng’tai püi ung ng’thumkhän awn ng'gui khai yaw?” Cine ng'shik ci gui.

⁴ Bawipa naw, “Tüipyang ciah Hunbawi naw akhtük ge ung, ngani cu pami la hnumi ah tüipyang goi ci. ⁵ 'Cunkyasei pami cu a nupa nawng ne akchu awn ng’pungkhap nine, ngani goi cu pum-ät hla-ät ah kyak khai goi' ciah a pyein ah mawng cu kä nami k'khei tuman naw? ⁶ Cunkyasei, ngani cu k'hnih ah kä kya ba nine tumat ah kya lawk ci goi. Cunah kyasei, Khanpughi naw ng'pungkhap sak goi ne a m'chum goi cu chang naw kä m’tai goi sä” ciah pyein ci.

⁷ Pharisee gui naw, “Cunah a kyak ung, ng’tai nak ca pe ne chuhta ng’tai püi vaiah Moses naw ikyasei thumkhän a tha ma?” Ciah ng'shik ci gui.

⁸ Bawipa naw, “Nami m’lung m’li aih sei Moses naw nami chuhta awn nami ng'tai hlawit vaiah tängpang ci. Cunte, akhtük ah cunah ng'phyüngtainak kä om ci. ⁹ Cunkyasei kaning pyein na gui khai. Pami naw akchu cu a hei pami awn ani kat ah hmawk ah kä kya pang ne, kä a ng'taipüi vai. Kä cunah chu mah ba cicu akchuhta kat na ne pletdeng ciah kyak ci, "ciah pyein ci.

¹⁰ Angdüihpüi gui naw, “Ng’chungla goi ah ng'lak ung cunah a awm ung, kä ng’chungla ne om cu ni tuba khai” ciah pyein ci gui.

¹¹ Bawipa naw phi, “Shinah ng’thu cu chang nü naw kä dou chang hlawit ci. A awm sak hlawit ah chang vah douchang hning ci gui. ¹² Ikyaseiciung, a nu ah poi khui ge ung kä kyongkhui mah hlawit khai ah ng’tüilawk ci da ci. Amshah cu chang guiah om ah kä kyongkhui mah ah om ci. Khankho ah hmawk ah kä kyongkhui mah ci gui phi om ci. Shinah mawng cu douchang hning ci naw douchang sä” ciah pyein ci.

¹³ Cunkawnah, a kut taih ne aktaigü pet gui vaiah akhmaw gui cu chang gui naw law püi ci gui. Cunte, angdüihpüi gui naw ngami gui cu k’she nak ci gui. ¹⁴ Jesuh naw, “Akhmaw gui kei ah law u sä. Kä maa na vä. Ikyaseiciung Khankho uknak cu ngami guiah kho ah kyak ci” ciah pyein ne, ¹⁵ Ngami ah k’khan ah a kut a taih kawnah a cungka naw hteit ci.

¹⁶ Cunkawnah, chang tumat naw a pei ah k'et law ne, “Saya aw, angtäi ghinnak ka gah vaiah akni i mäih ka bi vai aw?” Ciah ng’shik ci.

¹⁷ Bawipa naw, “Nik ciah a mawngma ikyasei na na ng’shi ma? Nik ciah Hunbawi tumat bäng awm ci. Angtäi ghinnak ah na luh hlü ung ng’thumkhän awn na ghin vai” ciah pyein ci.

¹⁸ Ani naw phi, “A hawnah ng’thumkhän gui ma?” Ciah ng’shi ba sei, Jesuh naw, “Chang kä na ngawn vai. Chang ah htabe kä na kat nak vai. Kä na m’guk vai. Kä k'cang ci ung na hmukshing ci vai süah kä na hle vai. ¹⁹ Na nupa na kyi-a vai. Namät naw namät na m’hni mäih ah na im ng’gi lou ng'phei m’hni ä” cine pyein nak ci.

²⁰ Cunah k'hmawchang naw, “Ka k'hmaw hta ge ung tüin ne, cunah ng’thumkhän gui cu ka läk pyi ci. Ahei a i hlü ba naw?” Ciah m’shang ci.

²¹ Jesuh naw, “Na kümpäng hlü ah a kyak ung, hteit ne na khawhcham gui yoi netah dukhaih ci gui awn na pet vai. Cunah na bi ung, Khankho ah khawhcham na gah ba khai. Cunkawnah law ne, ka hnu na läk ä” ciah pyein nak ci. ²² Cunah k'hmawchang cu ng’bühmang chang ah kya ne, cunah ng’thu a ng’ya ung thüsei ne hteit ba ci.

²³ Cunung Jesuh naw, “Kei naw akcang ka pyein cu, ng’bühmang chang cu Khankho a lut tu vaiah khak aih ci. ²⁴ Thap ne kaning pyein na gui khai. Ng’bühmang chang cu Khankho a lut vaiah mä ng’pyüm ah k'khi ung kalauk a lut vaiah ng'hlawi tuba ci” ciah angdüihpüi gui cu pyein na gui ci.

²⁵ Angdüihpüi gui naw cunah ng’thu ami ng’yak law ung aknui ah cäicat u ne, “Cunah a kyak ung a u naw hunnak gah hlawit khai yaw?” Ciah pyein ci gui.

²⁶ Cunte, Jesuh naw teng k'kheng gui ne, “Shinah a mawng cu chang gui naw kä mi m'khütnäng tu pang ah phi, Khanpughi naw apängvan m'khütnäng ci, "ciah pyein ci.

²⁷ Cunkawnah, Peter naw, “Keimi naw a van nawng shüt ne, na hnu kami ning läk ci. Cunkyasei keimi naw a i kami gah tuk khai ma?” Ciah ng'shik ci.

²⁸ Jesuh naw, “Kei naw akcang ah kaning pyein nak gui cu, a pängvan akthai ah pyanthamnak ba a khin a gawk law ung, Chang ah Htapa cu a bawimangnak awn kümbe ciah a mangkyak ung ngo ne, ka hnu na mi na läk ciah nangmi gui phi, mangkyak ghaleigoi ung ngo u ne Israel pakhui ghaleigoi cu ng’thu nami m'chak khai. ²⁹ Kei ah ng'ming ah hmawk ah a im phi kya, a phäinau phi kya, a nupa phi kya, a htanau phi kya, a kho a m'dek phi kya, nawng ci phung cu, a phungkheng a phya ah gah ba ne angtäi ghinnak pakhawh phi gah khai. ³⁰ Cunte, ma-bäih ci gui akda cu akhnu-bäih ah kya u ne, akhnu-bäih gui akda cu ma-bäih ci gui kyak khai gui.