¹ Khankho uknakho cu amät ah sapyit lo ah phäh ah bikbi gui ng'vah vaiah kho ngawisik hta ah lut lawk ciah lo-mah awn täng ci. ² Ani naw hnüp-ät ung Denari phe ät ci-ah bikbi gui awn ngüm-ä u ne, ngami gui cu a sapyit loma ah tüi gui ci. ³ Cunkawnah, ani cu khongawi nayi akko hlawk ung hteit ne, a hei gui phi a i kä bi ah, sumleinak hmun ah ami ng'düi hmu gui ne, ⁴ Ngami gui awn, 'Nangmi phi ka sapyit loma ah hteit vä. Nami gah khin ah a phu ng'kheng kaning pe gui khai' ciah pyein seih ngami phi hteit ci gui. ⁵ Cunkawnah khohnüp ng'lung la khok-awi täng ah phi, hteit ne a cunah bi ba ci. ⁶ Mühün nayi akhma nak khin ung phi hteit ne a hei gui ng'düi ci gui hmu ba gui ne, 'Ikyasei, a i kä bi ah shin ung akhnüp-ät lüng, nami ng'düi ma?' Ciah ng'shi gui ci.

⁷ Ngami naw phi, 'A u naw phi keimi kä na ghüh gui se nei' ciah m'shang ba u sei, lomah naw, 'Nangmi phi ka sapyit lo ah hteit vä' cik ci. ⁸ Mü law sei, sapyit lomah naw a imkyong tängpang ci awn, 'Bikbi gui khü gui ne akhnubäih ah lawk ci ungka naw tüin ne, akhtükbäih ah lawk ci ung khüt khai ah ami ng'bi ah phucheng pe gui ä' cik ci.

⁹ Cun ung mühün nayi akhma nak hlawk ung ng'vah gui cu law u ne, Denari phe ät ci-ah gah ci gui. ¹⁰ Akhtükbäih ah a ghüh gui cun phi law u ne, däm tuba khai ah gah khai guiah ng'ngai ci gui. Cungphih, ngami phi denari phe-ät ci-ah gah ci gui. ¹¹ Cunah ngui ami gah law ung ngami naw, ¹² 'Akhnu ah lawk ciah shin gui naw nayi ät hlawk düt ami ng'bi tu pang ah phi, nang bawi naw akhnüp-ät lüng khokhni saw ung akgoige ah kami ng'bik ciah keimi awn atäng täng ah na na m'täng gui ci phäih nei' ciah lomah awn pyein nak ci gui.

¹³ Cungung, lomah naw ngami gui ungka tumat awn, 'Ka teihpüi aw, kei naw nang ah khan ah kä ng'düng khai ah ka bi ah kä kyak ci. Nang cu kei awn denari phe-ät ah ni yum ät ah kä kya naw? ¹⁴ Na ng'kheng cu la ne hteit ä. Nang kaning pet ah mäih ah akhnubäih lawk ciah shin awn phi ka pe hlük ci. ¹⁵ Ka mät ah khawh awn ka bi hlü cu ka bi hning ciah kä kya naw? Käcung, ka m'lung ngaih ani ah phäh ah na na thüinak ci ma?' Ciah pyein ci. ¹⁶ Cunah mäih ah, akhnubäih chang gui cu akhtükbäih ah kya u ne, akhtükbäih chang gui cun phi akhnubäih ah kyak lawk khai gui" cine pyein ci.

¹⁷ Jesuh naw Jerusalem mango ah a hangkai sang ung lam ah angdüihpüi ghaleigoi cu a ng'shengnak ah khü gui ne, ¹⁸ "Ng'ngai vä. Mikmi cu Jerusalem ah mi hteit ci. Chang ah Htapa cu taigütung gui la Cacim saya guiah apnak gah khai. Ngami naw ani cu ngon vaiah tängpang u ne, ¹⁹ gaihginnak, tukthatnak la kutlamtung ung tainak gui bi vaiah khuihei guiah, ap khai gui. Cungphih, akhnüp thum hnüp ung ani cu ghing thawh ba khai" ciah pyein ci.

²⁰ Cung, Zebedee ah hta guiah ami nu naw a hta goi awn atäng ah Bawipa ah k'et law ne, m'khukhudong neta a i bawh tumat Bawipa ah thäh ci.

²¹ Bawipa naw, "A i ma na ng'yakhlü?" Ciah ng'shi sei, ani naw, "Shinah ka hta goi hnih cu na uknakho ah na k'pat täng ah tumat, na k'eng täng ah tumat ah ngoh tu sak goi ä" cik ci.

²² Cungphih, Jesuh naw, "Nangmi naw a i nami na k'thäh kä nami hmat ci. Ka awk vaiah khap nami aw hning khai aw?" Ciah ng'shi gui sei, ngani naw, "Kani aw hning khai" ciah m'shang ba ci goi.

²³ Bawipa naw, "Ka khap cu nami aw hman khai. Cungphih, kei ah pat täng la k'eng täng ah ngok khai cu kei naw ka pet vaiah kä kyak ci. Cun cu kapa naw akbäi pet guiah phäh ah kyak ci. ²⁴ Angdüihpüi gha naw shinah mawng ng'ya u ne cunah ng'phäinau goi ah khan ah m'lungshe ci gui. ²⁵ Cungphih, Jesuh naw khü gui ne, Khuihei gui ung uktu gui naw ami chang guiah khan ah ng'vaikhaw u ne, angvai gui naw ngami ah khan ah aknuipai ah uk thei ci gui. ²⁶ Nangmi ah kyong ah läi ung cunah kä a kyak vai. A u phi nangmi ung kyükyang pi cicu nami täkphan ah kya sä. ²⁷ A u phi nangmi ung ng'vaipi cicu nami changshäm ah kya sä. ²⁸ Chang ah htapa hngaw pang, täkphan khai ah kä lawk ci, ami täkphan vai la chang k'da ah phäh ah lawitnak vaiah a phu ng'kheng ah amät ah ghinnak pek khai ah a law ah mäih ah, nangmi ung angvaihta ah kya hlük cicu nami changshäm ah kya sä. Nangmi ung khawngmang ah kya hlük cicu nami m'ga ah kya sä.

²⁹ Cunkawnah, ngami cu Jericho ungka ami lutlaw ung, chang k'hli naw a hnu ah läk ci gui. ³⁰ Cun sang ung, lam pei ah ngok ciah amik m'dah hnih naw Jesuh naw a hlun law gui ng'ya ni ne, "Bawipa, David ah htapa, keini na m'gein goi ä" ciah vungpyang ci goi. ³¹ Chang k'hli naw a düm ah ani om vaiah m'ngawk ci gui. Cungphih, ngani naw, "Bawipa, David ah htapa keini na m'gein goi ä" ciah vungpyang täi ci goi.

³² Cunung, Jesuh naw ng'düm ne, ngani khü goi neta, "Nangni ah phäh ah a i kaning bi pe goi vai ma?" Ciah ng'shi goi ci.

³³ Ngani naw, "Kani hmuh ba vaiah na na m'dei ba sak goi vaiah kaning ng'yahlü ci nei Bawipa" ciah pyein ci goi. ³⁴ Jesuh naw m'gein goi ne, ani mik cu tawk goi ci. Cunah ng'ghit ung, ngani cu ani mik hmu law nine a hnu ah läk ci goi.