¹ Jerusalem ah va ng'et vu u ne, Olive m'htung phung ah om ciah Bethphage ah ami gawk law ung, Jesuh naw angdüihpüi ghaleigoi khü gui neta, ² "Nami matäng pigaw kyong ah hteit vä. Cunung, ami k'pawn ah ng'senu la apei ah ng'sehta cu a ng'ghit ah nami hmuk khai. Ng'se gui cu phyan u ne, kei ah law püi vä. ³ Tumatmat naw a i baw ami ning ng'shi ung, 'Bawipa naw ng'ya hlük ci' cine pyein vä. Cunah nami pyein ung, cun gui cu a ng'ghit ah ning m'khäh lawk khai" ciah pyein ci.

⁴ "'Teng ä. Na ghangpughang cu ng'senu la ng'sehta ng'cum ne, ⁶ Angdüihpüi gui phi hteit u ne, Jesuh naw a m'cäi guiah mäih ah bik ci gui. ⁷ Ng'senu la ng'sehta law püi u ne, cunah ng'hle goi ah khan ah sui gui dawk u neta, Bawipa cu cunah khan ah ngoh sak ci gui. ⁸ Chang k'hli akda läp läp naw phi ami suinu gui cu lam ah khan ah phah ci gui. Amshah naw shing dung gui ungka a ng'ban gui tupit u ne law püi u ne, lam ah khan ah phah ci gui. ⁹ Bawipa ah ma ah hteit ciah chang k'hli gui la a hnu ah läk lawk ciah chang k'hli gui naw, "David ah htapa aw, Hosana! Angtäighing Khanpughi ah ng'ming awn lawk ciah bawi cu phyisänak om sä. Akhlünpi ung Hosana kya sä" ciah ng'hawh ci gui.

¹⁰ A shikcha ah Bawipa cu Jerusalem ah lut seih, a mango lüng cu thüngkyong sei, "Shinah chang cu a u ma?" Ciah chang van naw pyein ci gui.

¹¹ Chang k'hli naw phi, "Shinah chang cu Kalilee kho, Nazareth mango ungka profet Jesuh nei" ciah pyein ci gui.

¹² Jesuh cu taigüim kyong ah va lut ne, taigüim ung sumlei ci gui avan cu hlawit-täm gui neta, ngui m'thawng ci guiah ami capoi la mümkha yoi ci guiah ami capoi gui buh-tawn ne, ¹³ "'Ka im cu taigünak im ciah khü khai gui' ciah Cacim ung ng'guk lang sei, cun cu nangmi naw m'guk-ei guiah ng'thupnak ah nami lat pyi phäi nei" ciah pyein ci.

¹⁴ Cunkawnah, taigüim ung amik kä hmuk ci gui la a kho ng'khem gui cu a pei ah law u sei, Bawipa naw a lüngtang ah m'gai ba gui ci. ¹⁵ Cungphih, taigü ng'vai gui la Cacim saya gui naw, Bawipa naw abi ah cäicamvai ah mawng gui phi kya, "David ah htapa cu Hosana kya sä" ciah taigüim ung k'hmaw guiah ami ng'hawh phi kya, ami hmuh law ung m'lungshe u ne, ¹⁶ "Shinah k'hmaw guiah ami pyein na ng'ya naw?" Ciah ng'shik ci gui. Jesuh naw, "Ka ng'yak ci." 'Akhmaw gui la suktui k'aw guiah m'gawng ung m'hlümtainak cu Bawipa naw tängpang ci' ciah ng'guk cicu kä nami khe tu man naw?" Ciah ng'shi ba gui ci.

¹⁷ Cunkawnah, Bawipa naw nawng gui shüt ne, mango ungka lut law neta, Bethany pigaw ah hteit ne, acunah pigaw ah mü ät om tuk ci.

¹⁸ Khongawisik hta ung mango ah a law ba ung Bawipa cu m'cawi ci. ¹⁹ Cun sang ung, lam ah baangghing tumat hmuh ne, cunah ghing va k'et neta, acunah a ghing ung a hnah gui bäng hmuh ne, a i a hei kä hmu neta, cunah ghin awn, "Tukbäi tüin ne, a ngawi ah phi nang kä na m'thei ba khai" ciah pyein ci. Cun vai awn, baangghing cu a ng'ghit ah ng'yai law ne chawng ci.

²⁰ Angdüihpüi gui naw, cunah mawng hmuh u ne, cäicam u neta, "Baangghing cu ihawkcha ah a ng'ghit ah chawng lawk ci ma?" Ciah pyein ci gui.

²¹ Jesuh naw, "Akcang kaning pyein na gui ci. Nangmi ung yumnak om ne, ng'ngaih hnih nak kä om ah, shinah baangghing ung ka bi guiah mäih bäng ah kä kya sei, shinah khomhtung awn, 'Ng'nawn ne tuili khui ah ng'kya ä' ciah nami pyein ung nami pyein ah mäih ah kyak khai. ²² Nami taigü law ung, yumnak awn nami taigü phung cu nami gah khai" ciah pyein ci.

²³ Cunkawnah, taigüim kyong ah lut ne a m'thei gui sang ung, taigü ng'vai gui la chang k'hli ungka a ghi ng'vai gui naw a pei ah k'et law u ne, "Shin gui cu nang naw a u ah huham awn na bi ma? Cunah huham cu a u naw aning pet ma?" Ciah ng'shik ci gui.

²⁴ Jesuh naw, "Kei naw phi tumat kaning ng'shi gui khai. Nami na m'shang ah a kyak ung shin gui a u ah huham awn ka bi ah mawng kaning m'thein gui khai. ²⁵ Johan ah tuihnimnak cu a hawi ah ka ma? Khankho ah ka ma? Chang ungka ma?" Ciah ng'shi gui ci. Cun ung ngami cu mat la mat ngingoi u ne, "Khankho ah ka nei" ciah mi pyein ung ani naw, "Cunah akyak ung, ikyasei Johan cu kä nami yum ma?" Ciah na ng'shi ba gui khai. ²⁶ 'Chang ungka nei' ciah mi pyein ung, chang k'hli gui cu kyih vaiah kyak ci. Ikyaseiciung, ngami ami van naw Johan cu profet tumat ah hmat ci gui" ciah pyein ci gui. ²⁷ Cunkyasei, ngami naw, "Kä kami hmat ci nei" ciah Jesuh m'shang ba ci gui. Cun ung Bawipa naw, "Kei naw phi shin gui a u ah huham awn ka bi ah mawng kä kaning m'thein gui khai. ²⁸ Nangmi naw ihawkcha ah nami ng'ngai naw? Chang tumat ung htapa hnih om ci. Ani naw a htahtük ah hteit ne, 'Ka hta aw, tukngawi sapyit lo ah hteit ne ng'bi ä' cik ci.

²⁹ Cunah a hta naw, 'Kä ka hteit hlük ci' ciah m'shang ba pang ne phi, a kawnah, a m'lung ng'thawng sei, hteit ci.

³⁰ A pa cu a hei a hta ah hteit ne a cukcha ah pyein ba ci. Cunah a hta naw, "Ä yah, Pa aw! Ka hteit khai" ciah pyein pang ne phi, kä hteit ah om ci. ³¹ Cunah htapa hnih ung a u naw ma, a pa ah ng'yakhlü a bi?" Ciah ng'shi gui sei, ngami naw, "A htahtük ah kyak ci, "ciah pyein ci gui. Jesuh naw phi, "Akcang ka pyein cu, a khon louk ci gui la chang hlawhlang gui cu nangmi ah ta mä, ma u ne, Khanpughi ah uknakho ah lut ci gui. ³² Ikyaseiciung Johan cu ng'düngnak ah ng'thu lam awn, nangmi ah law pang sei phi, kä nami yum ci. Akhon louk ci gui la chang hlawhlang gui naw läi, yum ci gui. Nangmi cu cunah mawng gui hmu tu ve u ne, a kawnah phi m'lung m'thawng u ne kä nami yum lawk ci.

³³ M'tumtängnak a hei ng'ngai vä. Lomah tumat om ci. Ani naw sapyit gui geit ne, ng'vong pyang neta, a lo ah sapyit tui suinak khui cawh päng ne, shaum phi co ci. Cunkawnah, cunah a lo cu bikbi gui awn khah gui shüt ne, k'dung ah hteit ci. ³⁴ A m'theih law vaiah a khin a ng'et law ung, sapyit lo ungka a m'theih gui lak khai ah a changshäm gui cu bikbi guiah tüi gui ci. ³⁵ Cun ung bikbi gui naw, ani ah changshäm gui cu pha u ne, tuthat u ne, a hei tumat cu ngawn u ne, tumat cu lung awn voi k'phyeih ci gui. ³⁶ Cunkawnah, akma ah ta mä da ba pi ciah a changshäm gui cu tüi ba gui sei, ngami gui cun phi acunah mäih ah ana ci ba ci gui. ³⁷ Lomah naw, 'Ka hta läi chang m'sui khai gui' ciah pyein ne akhnubäih ah a mät hta cu tüi ci.

³⁸ Cungphih, bikbi gui naw, cunah a hta cu hmu law u ne, 'Shin cu a pakhawh gah khai ah kyak ci. Law vä. Ani mi ngawn u ne, a khawh gui mi lak khai' ciah mat la mat pyein u neta, ³⁹ pha u ne, sapyit ng'vong pung ah kaih gawit gawit u ne, ngawn ci gui. ⁴⁰ Cunah akyak ung, sapyit lomah a law ba ung, cunah bikbi gui cu ihawkcha ci gui khai aw?" Ciah ng'shi gui ci.

⁴¹ Ngami naw, "Cunah chang k'she gui cu akshekha ah ng'thumcha gui ne, a m'theih law ung ani awn a m'theih pek khai ah bikbi a hei gui awn, sapyit lo cu khah gui khai" ciah m'shang ba ci gui.

⁴² Jesuh naw phi, "'Lung im co ci gui naw, ami nawit-heng ah lung cu a hanghleihpi lung ah kya ba ci. Shin cu Angtäighing Khanpughi awn kya ne, mi ma ah cäicamvaiah kyak ci' ciah Cacim ung kä nami k'khe tu man naw? ⁴³ Cunkyasei, kaning pyein na gui cu, Khanpughi ah uknakho cu nangmi ungka la ne, cunah uknakho ah a m'theih pe ba khai ah pakhui awn pe lawk khai. ⁴⁴ Cunah lung ah khan ah ng'kyak cicu a m'te m'te ah hnget khai. Cunah lung cu mat mat ah khan ah a ng'kyak ung ani cu akkhui ah gep khai" ciah pyein ci. ⁴⁵ Taigü ng'vai gui la pharisee gui naw Bawipa ah m'tumtängnak ami ng'yak ung, ami mät ah mawng a pyein cu hmat u ne, ⁴⁶ Bawipa pha vaiah k'thanak ci gui. Cungphih, chang k'hli naw Bawipa cu profet tumat ah ng'ngai ci guiah kya ne, ngami naw chang gui phi kyih ba ci gui.