¹ Cunkawnah, Bawipa naw m'tumtäng ne chang k'hli awn a pyein ba mä cu, ² "Khankho uknakho cu a hta ah phäh ah hta m'umnak poi bik ciah ghangpughang awn täng ci. ³ Ani naw a khü tu gui cu hta m'umnak poi ah ami law vaiah akchangshäm gui tüi tu pang sei phi, ngami cu kä lawk ci gui. ⁴ Cunkawnah, ani naw a hei a k'changshäm awn, 'Müei ei vai ka pawng pyi ci. Sei la plan ciah khyükhlei gui phi ngawn pyi. Avan a kyage ah kya pyi ci. Hta m'umnak pawi ah law vä ciah ka khü tu gui cu pyein na vä' ciah m'cäi gui ne tüi gui ci. ⁵ Cungphih, ngami naw iket ah kä ng'ngai u ne, tumah cu a lai ah phi kya, ahei tumat cu a sumleinak ah phi kya hteit ci gui. ⁶ A hei gui naw ghangpughang ah changshäm gui cu pha u ne, dukdeiu na u neta, ngawn ci gui. ⁷ Cunung, ghangpughang naw m'lungshe law ne, a gakap gui tüi gui neta, cunah chang k'ngawn gui cu m'di sak gui ne, ami mango phi mei awn m'khih sak gui ci. ⁸ Cunkawnah, akchangshäm gui awn, 'Hta m'umnak pawi cu a kyage ah a kyak tu pang ah phi, khü tu gui cu kä khinkha u sei, ⁹ Lam ng'ghum lam ng'khep guiah hteit u ne, nami hmuh phung cu hta m'umnak pawi ah nami khü tu vai' ciah pyein ci. ¹⁰ Cunung, akchangshäm gui naw, lam guiah hteit u ne, chang k'she phi kyasä, chang k'ni ah kyasä, ami hmuh phung cu k'bum law u sei, hta m'umnak pawi ah k'khin gui awn be lawk ci. ¹¹ Ghangpughang naw k'khin gui hmuh gui khai ah a law ung a cun ung, hta m'umnak pawi sui, kä sui tuk ciah chang tumat cu hmuh ne, ¹² 'Ka teihpüi aw, nang cu hta m'umnak pawisui kä sui ah ihawkcha ah sha ah na lawk ci ma?' Ciah ng'shik ci. Cun ung ani naw a i phi kä pyein ci. ¹³ Cun ung ghangpughang naw, 'A kut-khaw gui khit u ne, k'pung ah akhmüpnak ah k'täm vä. Acun ung vungpyangnak la m'nihtui hamhtepnak om khai' ciah akchangshäm gui pyein na gui ci. ¹⁴ Ikyaseiciung, khü gui akda om pang sei phi, ghü gui ken ci, "ciah pyein ci.

¹⁵ Cun ung pharisee gui naw lut law u ne, Bawipa cu a ng'thu ng'lung gui awn m'hling cung ne pha vaiah ngingoi ci gui. ¹⁶ Cunkawnah, ami ng'düihpüi gui cu Herod ah chang gui awn atäng ah a pei ah tüi law u ne, "Saya aw, Nang cu na ng'düng ciah kya ne, Khanpughi ah ng'thulam cu a ng'thutak awn ng'gui khai ah, na m'theimthang phi kya, chang a u ah hmai phi kä teng ne a u na kyih ng'ä nak kä a om phi kya, kami hmat ci. ¹⁷ Cunkyasei, ihawkcha ah na ng'ngaih na m'thein tu gui ä. Caesar ghangpughang awn a khon pet cu a ng'thu awn ng'gui naw, kä ng'gui naw?" Ciah ng'shisak ci gui.

¹⁸ Cungphih, Jesuh naw ami shetkhat hmat gui ne, "Chang k'ni ah ng'shei ci gui aw, ikyasei nami na hleep ma? ¹⁹ Akhon ngui Taangka phe-ät na m'hmuh vä" ciah pyein sei, ngami naw denari ngui phe-ät cu law püi ci gui. ²⁰ Bawipa naw, "Shin ung a u ah gup, a u ah omnak ma?" Ciah ng'shi gui sei, ²¹ Ngami naw, "Caesar ghangpughang ah gup la omnak nei" ciah pyein ci gui. Bawipa naw phi, "Cunah akyak ung, Caesar ah ka cu, Caesar awn pe vä. Khanpughi ah ka cu, Khanpughi awn pe vä" ciah pyein ci. ²² Ngami cu cunah ng'thu ami ng'yak law ung cäicam u ne, Bawipa ungka hteit ba ci gui.

²³ Acun hnüp ung, thawhbanak kä om ci ciah pyein ci guiah Sadducess gui naw a pei ah et law u ne, ²⁴ "Saya aw, chang tumat cu kä htanau ah a shih ung a nau naw a phäi ah chu khäm tuba ne, a phäi ah hta ng'shon a m'düin vai ciah Moses naw na m'cäi gui ghit ci. ²⁵ Keimi ung ng'phäinau chih om ci ungka, a ng'vaipi cu chumah ne kä ng'shonhta ah shi sei, akchu cu anau naw khäm tuba ci. ²⁶ Akhnih nak la akthumnak ung tüin ne akchih nak khüt khai ah acunah kyak ci gui. ²⁷ Akhnu khüt ah cunah hnumi phi shik ci. ²⁸ Cunkyasei, ghingthawhbanak hnüp ung, cunah hnumi cu cun ah ng'phäinau chih ungka a u ah chu ah kyak khai aw? Ikyaseiciung, ngami ami van cu cunah hnumi awn ng'pungkhap pyi ci gui?" Ciah ng'shik ci gui.

²⁹ Jesuh naw, "Nangmi naw Cacim phi kya, Khanpughi ah huham phi kya, kä k'shing u ne, akshing ah nami lak ci. ³⁰ Ikyaseiciung, ghingthawhbanak hnüp ung chang gui cu ng'chungla nak kä om ne, hta m'umnak phi kä om khai. Khankho ah om ciah khankhochang guiah mäih ah kyak khai gui. ³¹ Shik ci guiah ghingthawhbanak ah mawng Khanpughi naw, ³² 'Kei cu Abraham ah Khanpughi, Isaac ah Khanpughi, Jakob ah Khanpughi ah ka kyak ci. Khanpughi cu akshi guiah Khanpughi ah kä kyak ci. Akghing guiah Khanpughi ah kyak ci' ciah apyein cu kä nami k'khe tu man naw?" Ciah pyein ci. ³³ Chang k'hli gui naw ami ng'yak law ung Bawipa ah m'theimthang gui cu cäicam u ne, m'hlümtai ci gui.

³⁴ Sadducee gui naw Bawipa cu a i phi kä mi m'shang tuba hlawit ah mawng Pharisee gui naw ami ng'yak law ung atäng ah ng'bum law u ne, ³⁵ Ngami ungka cacim saya tumat naw Bawipa cu hleep hlü ne, ³⁶ "Saya aw, ng'thumkhän gui ung, a i ng'thumkhän cu akhlüntaipi ma?" Ciah ng'shik ci.

³⁷ Bawipa naw, "'Angtäighing na Khanpughi cu na m'lung avan, na ghinnak avan la na hmuhmatnak avan awn na yumhni vai.' ³⁸ Shin cu akhlüntaipi ng'thumkhän ah kyak ci. ³⁹ Akhnih nak ng'thumkhän cun phi, acunah mäih ah kya ne, 'Na im ng'güi lo ng'phei chang paw cu namät ah mäih ah na m'hni vai' ciah kyak ci. ⁴⁰ Ng'thumkhän cacim la profet cacim gui avan cu shinah ng'thumkhän hnih ung phung ci, "ciah pyein ci.

⁴¹ Cunkawnah, pharisee gui ami ng'bum sang ung, Jesuh naw, ⁴² "Nangmi naw Bawi Khrit cu ihawkcha nami ng'ngai naw? Ani cu a u ah hta ma?" Ciah ng'shi gui sei, ngami naw, "David ah htapa ah kyak ci, "ciah m'shang ba ci gui.

⁴³ Bawipa naw, "Cunah akyak ung, David naw ani cu Mümcha Theing awn, 'Bawi' ciah khü ne, ⁴⁵ Cunah, David naw Bawi Khrit awn Bawi ciah a khü ung, Bawi Khrit cu ihawkcha ah a htapa ah kyak khai aw?" Ciah pyein ci. ⁴⁶ Cunung, Bawipa cu ng'thu m'kha ät hman ah m'shan ba vaiah a u naw phi kä m'khüt ba ci. Cunah hnüp ung tüin ne, a u naw phi Bawipa cu ng'shikcanak gui kä ng'shi ba dat ci gui.