¹ Cunkawnah, Jesuh naw chang k'hli la angdüihpüi gui awn, a pyein nak gui cu, ² "Cacim saya gui la Pharisee gui cu Moses ah ngoh nak ung ngok ci gui. ³ Cunkyasei, ngami naw ami ning pyein nak gui avan cu läk u ne ghin püi vä. Cungphih, ngami ah omkya ah mäih ah kä nami omkya tu vai. Ikyaseiciung, ngami cu ami pyein tu pang ah phi, kä ghin püi ci gui. ⁴ Ngami naw aknui gih ciah phüih gui m'khäp u ne, chang gui awn k'phüih thei ci gui. Ami mät naw läi, ami kutpyang hman awn phi kä tawn hlük ci gui. ⁵ Ngami cu ami bi phung chang naw a hmuh vai phäh düit ah bik ci gui. Ikyaseiciung, aknuipai ah ng'sui ng'awi, awinak ci gui. ⁶ Ei-awknak pawi gui ung aknipi ngoh-nak gui phi kya, ng'bumhtoinak gui ung akhlünpi ngoh-nak gui phi kya, ⁷ hlumleinak ah chang gui naw Saya cine ami khü vai phi kya ng'yahlük ci gui. ⁸ Cungphi nangmi cu saya ciah ami ning khü vai kä nami khin ci. Ikyaseiciung, nami Saya cu a tumat bäng om ne, nangmi nami van ng'phäinau ah nami kyak ci. ⁹ Khomdek ah khan ah a u awn phi Pa ciah kä nami khü vai. Ikyaseiciung, Nangmi ung Khankho ah Pa tumat bäng om ci. ¹⁰ Nangmi cu, 'Khawngmang' ciah phi khü kä nami dou khin ci. Ikyaseiciung, nami 'khawngmang' cu Bawi Khrit tumat bäng ah kyak ci. ¹¹ Nangmi ung akküikyangpi cu nami m'ga ah kyak khai. ¹² Amät naw mät m'hlümtai cicu ng'neimsaknak gah ne amät naw mät ng'neimsak cicu m'hlümtai yäkchanak gah khai.

¹³ Chang k'ni ah ng'shei ciah cacim saya gui la pharisee gui aw, nangmi ung phyunak om ci. Ikyaseiciung, nangmi cu khankho m'kawit k'khai u ne, nami mät phi kä nami lut ci, lut tu hlü ci phi nami kham ci. ¹⁴ Chang k'ni ah ng'shei ciah cacim saya gui la pharisee gui aw, nangmi ung phyunnak om ci. Ikyaseiciung, hmeinu guiah im gui cu gut gui u ne, nami shetkatnak nami shung hlü ah phäh ah, a ng'shäi läp läp ah nami taigü thei ci. Nangmi cu aknuipi ah ng'thumchanak nami gah khai. ¹⁵ Chang k'ni ah ng'shei ciah cacim saya gui la pharisee gui aw, nangmi ung phyunnak om ci. Ikyaseiciung, chang tumat cu Jew pa-hta chang ah a kyak law tu vaiah, tui lam k'kawng lam hteit shüi shüi u ne, pa-hta chang ah a kyak kawnah, cunah chang cu nangmi ah mä shekha tuba ciah m'htelam chang a goi ah nami kyak sak ci.

¹⁶ Amik m'dah ciah lamshüm gui aw, nangmi ung phyunnak om ci. Nangmi naw, 'A u phi Taigüim awn ng'phyun ne aktaigü ung a i kä mawng ci. Taigüim ungka ghui awn ng'phyun ne taigü ungvah pang ci' ciah nami pyein ci. ¹⁷ Amikmü gui aw, a i nei a küikyang pi? Cunah ghui ma? Käcung, cunah ghui theingthap sak ciah taigüim ma? ¹⁸ Cunkawnah, nangmi naw, 'A u naw phi douthaknak mangkyak awn a ng'phyun ung a i kä pang ci. Cungphi, mangkyak ung om ciah douthak awn a ng'phyun ung pang ci' ciah nami pyein ci. ¹⁹ Ami m'dah gui aw, a i cu a küikyang pi? Douthak ma? Käcung, douthak theingthap sak ciah mangkyak ma? ²⁰ Cunkyasei, douthaknak mangkyak awn ng'guin ne ng'thu cicu mangkyak awn atäng ah acunah khan ah om ci gui nü awn ng'guin ne pyein ci. ²¹ Cunah mäih ah, Taigüim awn ng'guin ne pyein cicu taigüim awn atäng ah acun ung om ciah Bawi cu ng'guin ne a pyein ah kyak ci. ²² Khankho awn ng'guin cicu Khanpughi ah mangkyak awn atäng ah acunah khan ah ngok ciah Bawi awn ng'guin ciah kyak ci.

²³ Chang k'ni ah ng'shei ciah cacim saya gui la pharisee gui aw, nangmi ung phyunnak om ci. Ikyaseiciung, nangmi cu cüngüp, samung htamgu la ziya thui-an gui nü ung m'bum gha ng'bum ät nami pet ungphi, aktungpi ah kyak ciah taga nak, chikhna nak la bekhütnak gui cu nami nawit-heng ci. Shin gui cu bi vaiah a kyak ah mäih ah, akkhan ah pyein gui cun phi kä nawng vai. ²⁴ Lamshüm ciah a m'dah gui aw, pi m'khang tumat hngaw kä nami dük-ein vaiah tui m'cim ne nami awk tu pang ah phi, kalauk nami m'yo pyi ci.

²⁵ Chang k'ni ah ng'shei ciah cacim saya la pharisee gui aw, nangmi ung phyunnak om ci. Ikyaseiciung, khap la k'bei ah akpung täng düt ah m'shi u ne, akkyong täng ung kä ng'düng khai ah guittepnak la mät ah ng'yakhlü ah läknak gui bäng ah be ci. ²⁶ Amik m'dah ciah pharisee gui aw, khap ah akkyong täng ah akhtükbäih ah theingthap sak ma vä. Cunah nami ci ung, akpung täng phi theingthap lawk khai.

²⁷ Chang k'ni ah ng'shei ciah cacim saya la pharisee gui aw, nangmi ung phyunnak om ci. Ikyaseiciung, nangmi cu a bawk awn hlüp ah ng'phuh khui awn nami täng ci. Cun gui cu, akpung täng ah akkyom ah ng'dang tu pang ne phi, akkyong täng ah changshi ah guh gui la amshemshai gui a päng päng awn be ci. ²⁸ Cunah mäih ah, nangmi cun phi, akpung täng ah chang guiah ma ah ng'düng ci vai süah nami kyak tu pang ah phi, akkyong täng ah chang k'ni ah ng'she nak la kä ng'düng khai ah om ih nak gui bäng awn nami be ci.

²⁹ Chang k'ni ah ng'shei ciah cacim saya la pharisee gui aw, nangmi ung phyunnak om ci. Ikyaseiciung, nangmi cu profet guiah ng'phuh khui gui cawh u ne, chang ng'düng guiah ng'phuh-im gui pyangtham u ne phi, ³⁰ 'Keimi cu pupa guiah ng'shon ung om vai sü ung, profet gui shi m'hlon ci guiah ami püipaw ah kä kyak tu vai sü' ciah nami pyein ci. ³¹ Shinah mäih ah nangmi cu profet gui ngon ci guiah ng'shonhta ah nami kyak ah mawng nami mät naw nami m'dang ci. ³² Nangmi naw phi, nami pupa guiah katnak chyü nami k'pha tu vaiah k'be tu vä. ³³ K'phyu gui aw, phyu k'she gui aw, m'htekho ah ng'thumchanak ungka naw, ihawkcha ah nami phyawng hlawit khai aw? ³⁴ Cunkyasei, kei naw profet gui, hmuhmatchang gui la cacim saya gui cu nangmi ah ka tüi lawk khai. Cunung, nangmi naw ngami gui ungka, amshah gui cu ngon u ne, kutlamtung ung k'tai u neta, amshah gui cu nami taigüim gui ung tuthat u ne, mang-gaw tumat ungka naw tumat läk u ne nami dukdeiu nak khai. ³⁵ Cunkyasei, ng'düng ciah Abel ah shi ungka naw tüin ne, taigüim la mangkyak ah ng'lak ung, nami ngon ah Berechiah ah hta Zechariah ah shi khüt khai ah m'dek ah khan ah nami m'hlawn ah ng'düng ci guiah shi ah phu gui nü cu nami khan ah gawk lawk khai. ³⁶ Akcang kaning pyein na gui ci. Shin gui nü cu shinah ng'shonhta ung gawk lawk khai.

³⁷ O Jerusalem, Jerusalem, profet gui ngon ne amät ah ami tüih law gui phung, lung awn voi ne ngon ciah mango, ainu naw a chei gui a ng'phya k'ka ah akbum guiah mäih ah kei naw na hta gui cu ka k'bum gui vaiah aksho vei ka ng'yahlü ci. ³⁸ Cungphih, nang naw kä na ng'yahlük ci. Teng ä. Nami im cu chang ah kä omnak ah nawngshütnak gah khai. ³⁹ Kaning pyein nak gui cu, 'Angtäighing Khanpughi ah ng'ming awn lawk ciah Bawi cu phyisä nak om sä' ciah kä nami pyein pha ah khüit tukbäih ung tüin ne nangmi naw kei cu api ah phi kä nami na hmuh ba khai" ciah pyein ci.