¹ Bawipa Jesuh cu pum-im ungka a luh law ba sang ung, angdüihpüigui naw k'et law u ne, pum-imnu ung ami cawhkyan gui m'hnuh ci gui. ² Bawipa Jesuh naw, "Shinah a mawngma gui avan nami hmuk ciah kä kya naw? Kei naw akcang ka pyein cu, lung tumat ah khan ah tumat phi kä ng'tai ba ne, avan maih law yawp khai" ciah pyein ci.

³ Cunkawnah, Bawipa Jesuh cu Olive khomhtung ung a ngoh sang ung, angdüihpüigui ami mät bäng naw k'et law u ne, "Tukbäih na pyein ah a mawng gui cu a i ah khin ung kya lawk khai ma? Nang na kyum law ba khin la khomdek a ng'pyi law ah khin ung a i gui a ng'dang law vai gui na m'thein gui ä" ciah ng'shik ci gui.

⁴ Bawipa Jesuh naw, "A u naw phi kä ami ning m'hleimhlak-ein gui vaiah m'htei vä. ⁵ Ikyaseiciung, chang k'da cu kei ah ng'she u ne ning law shi u neta, 'Kei cu messiah nei' ciah pyein u ne chang akda m'hlemhlak lawk khai gui. ⁶ Ng'tuk ng'at ah mawng gui la ami ng'tuk ng'at law vaiah mawng gui nami ng'ya lawk khai. M'htei na u ne kä nami kyikyawk vai. Ikyaseiciung cun gui cu kya lawk to khai. Cunte, khomdek ah a khütnak kä gawk law phak ci. ⁷ Chang pakhui tumat la tumat, uknak khopäng tumat la tumat, ng'tuk ng'at u ne, kho nü nü ah ei kho she ne, shihpi thüng khai. ⁸ Cun gui van cu, gawk law khai ah khuikha geinbainak ah a ng'tüinnak bäng ah kyak ci. ⁹ Cunah khin ung, chang gui naw nangmi cu dukdeinak la ngawnshih nak ah ning ap khai gui. Ka ng'ming ah hmawk ah phi pakhui nü naw ning thüi nak khai gui. ¹⁰ Cunah khin ung, chang k'da cu ami hnu ah ng'hlat ba u ne, ami mät tumat naw tumat ng'ap tuk khai gui. ¹¹ Ami mät ge mat la mat thüisei nak khai gui. Hlehlak ciah profet gui akda gawk law u ne, chang k'da m'hlemhlak khai gui. ¹² Chang k'she da law pi täi ne, ng'khawtshengnak maih lawk khai. ¹³ Cunte, a khüpnak khüt seih bekhüt cicu hunnak gah khai. ¹⁴ Chang nü ah hmukshing tumat ah kyak khai ah, khankho uknak ah mawng ng'thu k'ni cu kho ng'nü ah pyein nak om khai. Cunkawnahvah, a khütnak gawk lawk khai.

¹⁵ Cunkyasei, profet Daniel naw ng'thu a pyein ah mäih ah, m'dimdap thei ciah a m'shemshai cu theingcim ciah hmun ung a ng'düi nami hmuh law ung, Cacim k'khe ci naw k'shinghmat sä. ¹⁶ Cun ami hmuh law ung, Juhdah kho k'chang gui cu khomhtung ah dawng u sä. ¹⁷ M'kyung khan ah om cicu im kyawng ah ka a khawh, la ba khai ah kä kyum-ein sä. ¹⁸ Lai ah om ci phi a suisak la ba khai ah a hnu ah kä ng'hlat-ein ba sä. ¹⁹ Cunah a khin ung, pummah ci gui la htayüt shäm ci gui cu yaica khai gui. ²⁰ Nami dawngnak vaiah khin cu khohlik kho la kyinhnüp ung kä ng'awt-ein vaiah taigü vä. ²¹ Ikyaseiciung, khomdek a ng'tüin law ung tüin ne kä kya man ci. Ngawi ah kä kya ba khai. Aknui ah shekak ciah yaicanak cu acunah khin ung gawk lawk khai. ²² Cunah a khin cu a ng'shäi ah a kyak ung a u phi kä phyawng hlawit khai. A ghü guiah hmawk ah cunah khin cu tawi khai. ²³ Cunah khin ung, chang hei naw, 'Teng ä. Sha ah Bawi Khrit om ci.' Käcung, 'Ca ah om ci' ciah a pyein ung kä na k'cang na vä. ²⁴ Ikyaseiciung, Bawipa ah ng'she ci gui la profet ah ng'she ci gui cu gawk law u ne, a ghü gui pang hngaw ami m'hlemhlak vaiah, cäicat vai gui la cäiaih vai gui m'dang lawk khai gui. ²⁵ Ng'ngai vä. Cunah mawng gui cu kä gawk law pha ge ung kaning m'thein gui ci. ²⁶ Cunkyasei, chang gui naw, 'Teng ä. Bawipa cu k'bung ah om ci' ciah ami pyein ung phi kä nami lut law vai. 'Imkyong ah nei om ci' ami ci ung phi kä nami yum vai. ²⁷ Ikyaseiciung, lai ah lüp cu hngilaw lam ungka naw hngikyak täng khüt khai ah a deikhang ah mäih ah, Chang ah Htapa ah kyum law ba cu täng khai. ²⁸ Akshi ah omnak ah langtaa gui cu ng'bum khai gui.

²⁹ Cunah yaicanak ah khin a gawk law kawnah k'cha cu kä k'khang ba khai. Aisi gui phi khankho ungka ng'kya law yawp khai. Khankho huham gui phi thüngkyong lawk khai. ³⁰ Cunung, Chang ah Htapa ah hlüngtainak cu khankho ah ng'dang law khai. Khomdek khan chang van naw ami hmuh law ung, vukyap u ne Chang ah Htapa cu a hlüngtai küikyangnak awn khongmei ng'cum ne a kyum law ba cu hmuk khai gui. ³¹ Cunkawnah, Chang ah Htakpa naw a ng'shawng ah ng'ging ciah akphyungheng awn atäng ah a khankhochang gui tüi gui sei, ngami gui naw Bawipa ah ghüghäk gui cu hngilaw hngikyak ahtum ahlip gui ungka k'bum lawk khai gui.

³² Theighing awn m'tumtängnak mawngma ungka ng'theingthang vä. A ng'ban gui tawit law ne, a hnah gui a m'thüi law ung kho ghe ng'et lawk ci ciah nami hmat ci. ³³ Cunah mäih ah, nangmi phi shinah mawng gui nami hmuh law ung, Chang ah Htapa cu m'kawit pei ah gawk law pyi ci ciah k'shing vä. ³⁴ Kei naw akcang ah ka pyein cu, shinah mawng avan tukbäih ghing ciah chang gui kä a mi shih pha ung gawk law khai. ³⁵ Khankho la khomdek kä ni khän ungphi, kei ah ng'thu cu khäng khai. ³⁶ Cunah hnüp la cunah khin cu a u naw kä hmat ci. Khankhochang gui naw kä hmat ci gui. A Htapa a mät naw phi kä hmat ci. Kapa Khanpughi bäng naw hmat ci. ³⁷ Chang ah Htapa a kyum law ba cu Noah ah khin ung a kyak ah mäih ah kyak khai. ³⁸ Ikyaseiciung, tui naw kä alin gui pha ung, Noah cu htinpaw khui ah a lut hnüp khüt sei, chang gui cu eiaw düt u ne, ng'chungla düt ah om ci gui. ³⁹ M'liktui phu law ne chang van a m'di law gui hnüp khüt khai ah, ami mükmeh ah mäih ah Chang ah Htapa a kyum law ba hnüp ungphi kyak khai. ⁴⁰ Cunung, lai ah om ciah chang hnih ungka tumat cu ng'khah püi ne tumat cu pawih shüt khai. ⁴¹ Hlum hluk ciah hnih ungka tumat cu ng'khah püi ne tumat cu pawih shüt khai. ⁴² Nami Bawi cu a i hnüp ung a law ba vai kä nami hmat ciah kyasei m'htei ne ging vä. ⁴³ Immah naw m'guk-ei a law nak vaiah a khin a hmat ung, kä mi m'guk-ein pe hlawit vaiah ngäng khai ah mawng nami hmat ci. ⁴⁴ Cunkyasei, pawmhtei ne om vä. Ikyaseiciung, kä nami ng'ngaktüh nak khin ung Chang ah Htapa cu kyum lawk khai.

⁴⁵ A mät ah imkyong chang gui awn a khin a gawk law ung eiawk vai tängpang khai ah a bawi naw akbäi ah bekhüt ne hmuhmat lunglang ciah changshäm a u ma? ⁴⁶ A bawi a gawk law ba ung a m'cäi ah mäih ah a ng'bi ah mawng a Bawi naw a hmuh cu a vaai phyak ci. ⁴⁷ Akcang kaning m'thein gui cu, a bawi naw a mät ah khawhcham gui nü a m'htei vaiah ani cu k'bäi ci. ⁴⁸ Cunte, shekhak ciah changshäm naw, 'Ka bawi cu shokshüi ngai khai' ciah ng'ngai ne, ⁴⁹ A paw changshäm gui cu tuthat gui ne, eiawktat ci gui awn atäng ah eiawk ci. ⁵⁰ Cunah changshäm ah bawi cu ani naw kä a ngaktühnak ah khin la hnüp ung gawk law ba ne, ⁵¹ Ani cu aknui ah tuthat ne chang k'ni ah ng'she ci gui awn atäng ah tha gui khai. Acun ung thüikyapnak la m'nihtui ha m'htepnak om khai.